Mayın 19-da Rusiya xarici işlər naziri Sergey Lavrovun dəvəti ilə Moskvada Azərbaycan Respublikası xarici işlər naziri Ceyhun Bayramov və Ermənistanın xarici işlər naziri Ararat Mirzoyan arasında danışıqlar aparılıb.
Xarici İşlər Nazirliyindən verilən məlumata görə, nazir Ceyhun Bayramov və Ararat Mirzoyan Azərbaycan, Ermənistan və Rusiya liderlərinin üçtərəfli bəyanatlarının icrası ilə bağlı mövqelərini təqdim ediblər.
Tərəflər “Sülh və dövlətlərarası münasibətlərin qurulması haqqında” saziş layihəsi üzərində işi davam etdiriblər. Tərəflər arasında hələ də fikir ayrılıqlarının mövcud olduğu mövzular ətrafında konstruktiv fikir mübadiləsi aparılıb.
Nazirlər Azərbaycan və Ermənistan arasında danışıqların təşkilinə görə Rusiya tərəfinə minnətdarlıqlarını bildiriblər. Tərəflər müzakirələri davam etdirmək barədə razılığa gəliblər.
Azərbaycanın xarici işlər naziri Ceyhun Bayramov və Rusiya xarici siyasət idarəsinin rəhbəri Sergey Lavrov arasında təkbətək görüş olub, daha sonra tərəflər arasında nümayəndə heyətlərinin iştirakı ilə geniştərkibli görüş keçirilib.
Həmin gün Lavrovla Mirzoyan arasında da ikitərəfli görüş olub.
S.Lavrov Azərbaycan, Rusiya və Ermənistan liderləri tərəfindən imzalanmış üçtərəfli bəyanatların mühüm əhəmiyyətə malik olduğunu qeyd edib. O bildirib ki, bütün məsələlərin həllində məhz bu bəyanatlar həlledici rol oynamalıdır: “Bu, sülh müqaviləsinə, kommunikasiyaların açılmasına, eləcə də sərhədlərin delimitasiyası və demarkasiyasına aiddir. Bütün istiqamətlərdə tərəqqi Cənubi Qafqazda sülhə nail olmaq üçün əsas şərtdir”.
XİN rəhbəri onu da qeyd edib ki, Rusiyanın Cənubi Qafqaz regionunda ciddi maraqları var və tarixən burada rola malik olub. Onun sözlərinə görə, rəsmi Moskva regionda sülh və sabitliyin tam bərqərar olmasına töhfə verməyə hazırdır.
Moskvada Azərbaycan, Rusiya və Ermənistan xarici işlər nazirləri arasında üçtərəfli görüşdən sonra Lavrov deyib ki, "Ümid edirəm, Azərbaycan və Ermənistan XİN rəhbərləri arasında birbaşa dialoq əlavə nəticələr əldə etməyə imkan verəcək".
"Təklif edərdim ki, üçtərəfli formatda Azərbaycan-Ermənistan münasibətlərinin normallaşması üzrə bütün məsələlər kompleksi nəzərdən keçirilsin və Rusiyanın malik olduğu, köməklik etmək üçün istifadə edə biləcəyimiz imkanlar nəzərə alınmaqla gələcək addımlar razılaşdırılsın", - o deyib.
Rusiya xarici işlər naziri üçtərəfli bəyanatlarda mahiyyətcə davamlı həllərə nail olmaq üçün yol xəritəsinin olduğunu qeyd edib.
"Cənubi Qafqaz ətrafındakı vəziyyəti təhlil etdik. Hesab edirəm ki, liderlərimizin razılaşmalarına alternativ yoxdur. Regionda sülhün və sabitliyin hökm sürməsində bütünlüklə maraqlıyıq. Bu, Rusiyanın maraqları ilə birbaşa olaraq əlaqəlidir və biz vəziyyətin stabilləşməsi ilə bağlı qərarların icrasına hər vasitə ilə nail olmağa çalışacağıq", - o deyib.
Lavrov daha sonra deyib ki, Cənubi Qafqazda iqtisadi, nəqliyyat əlaqələri açılmalıdır və əlbəttə ki, Azərbaycanla Ermənistan arasında sülh sazişinin mətni razılaşdırılmalıdır. Sülh sazişi üzərində aktiv şəkildə işlər görülür.
O, həmçinin "ikinci yol" adlanan xətt üzrə ekspertlərin, ictimai təşkilatların və parlamentarilərin əlaqələrinin inkişafının vacibliyini vurğulayıb.
"Təcrübə bunu göstərir və hesab edirəm ki, bu etimadın möhkəmlənməsi üçün əlavə addım qismində olduqca mühümdür", - o deyib.
C.Bayramov deyib ki, Azərbaycan mütəmadi olaraq Ermənistanla postmünaqişə dövründə münasibətlərin normallaşmasının tərəfdarı olub.
"Postmünaqişə dövründə normallaşma müxtəlif istiqamətlərdən ibarət prosesdir. Biz bütün istiqamətlər üzrə paralel çalışmağın tərəfdarıyıq", - o deyib.
C.Bayramov ötən ilin sonlarından danışıqlar prosesində müəyyən durğunluğun müşahidə olunduğunu qeyd edib.
"Prinsipcə may ayından başlayaraq dinamikanın ardıcıl və müsbət xarakter daşımasını çox müsbət qiymətləndiririk. Artıq rəhbərlik səviyyəsində görüşlər keçirilib və sülh sazişi üzrə danışıqlar aparılıb. Hesab edirik ki, bugünkü danışıqlar da məhsuldar olacaq və bir daha bütün məsələlər spektrinin üzərindən keçməyə imkan verəcək. Təbii ki, ikitərəfli əsasda erməni nümayəndə heyəti ilə sülh sazişi ilə bağlı müzakirələri davam etdirmək də yaxşı imkandır", - Azərbaycanın xarici işlər naziri deyib.
Mümkün sülh müqaviləsi layihəsində bir neçə bənd üzrə razılıq əldə edilib. Bunu isə Mirzoyan Ceyhun Bayramov və Sergey Lavrovun da iştirakı ilə Moskvada keçirilən üçtərəfli görüş zamanı deyib.
Erməni diplomat onu da əlavə edib ki, bununla yanaşı regionda kommunikasiyaların açılması, sərhədlərin 1991-ci il “Alma-Ata Bəyannaməsi”na əsaslanan sonrakı delimitasiya prosesində də irəliləyişlər var.
Üçtərəfli görüşdən sonra Lavrovun bu açıqlaması da maraqlı olub. O deyib ki, sülh sazişi ayrıca mövzudur. Tərəflər onun üzərində işləməyə başlayıb.
"Hazırda o həmçinin digər vasitəçiləri də cəlb etməklə aktiv şəkildə müzakirə olunur. Ermənistan və Azərbaycan nazirləri Vaşinqtona səfər etdilər, Ermənistan və Azərbaycan prezidentləri bir həftə bundan əvvəl Brüsseldə görüşdülər. Sülh sazişi üzərində iş şübhəsiz əsasdır. Lakin bu gün tərəfdaşlarımız təsdiqlədilər ki, demilitasiya, nəqliyyat və iqtisadi əlaqələri açmadan, Qarabağda və Ermənistan-Azərbaycan sərhəddində vəziyyət ümumi yaxşılaşmadan sülh sazişinin konkret aspektləri üzrə irəliləmək çətindir", - o deyib.
Lavrov qeyd edib ki, həmkarları liderlərin adıçəkilən üçtərəfli bəyanatları və qeyd olunan istiqamətlərin hər biri üzrə davam edən əlaqələr üzrə həyata keçirilən ümumi səylərdəki aparıcı roluna görə Rusiya tərəfinə minnətdarlıq ediblər.
Sonra Moskvada Azərbaycanın xarici işlər naziri Ceyhun Bayramov və Ermənistanın XİN rəhbəri Ararat Mirzoyan arasında ikitərəfli görüş keçirilib.
Bizi izləyin, ikitərəfli görüşdən analitik xəbərlərimizi davam etdirəcəyik.
Namiq QULİYEV
