Sərsəng su anbarını çirklədən də, onu fəlakətli vəziyyətə gətirən də Ermənistan olub. Torpaqlarımız işğalda olduğu zaman Ermənistanın Sərsəng su anbarını ekoloji silaha çevirdiyi bütün dünyaya məlumdur.
Təəssüf ki, dünyanın aidiyyəti qurumları Ermənistanla bağlı heç bir tədbir görmədi və uzun illər bu ölkə su terrorunu davam etdirdi. İllər əvvəl haqlı olaraq qeyd edilirdi ki, ermənilərin Sərsəng su anbarı vasitəsilə həyata keçirdikləri ekoloji fəlakət dünya miqyasında aparılan ən böyük humanitar böhranlardandır. Bu böhranı, fəlakəti ermənilər yaratdığı halda, bu gün Qarabağdakı sepratçılar “Sərsəng su anbarının ekoloji böhranı mikroiqlimin kəskin dəyişməsi, bulaqların tükənməsi və müxtəlif bitki və heyvan növlərinin nəslinin kəsilməsi təhlükəsi ilə özünü göstərir”- deyə haray çəkirlər. Bu iddianı separatçıların “Təbiəti Mühafizə Komitəsi” irəli sürüb ki, bəs “Sərsəngdə ekoloji böhran yaranıb”. Erməni mediası yenə də saxta “blokada”dan dəm vurur, yenə də insanların guya “əziyyət çəkdiyini” yazır. Erməni mediası əsassız olaraq iddia edir ki, guya Azərbaycan “yerli mikroiqlimin kəskin dəyişməsinə, yeraltı su ehtiyatlarının azalmasına və tükənmə risqinin artmasına səbəb olan enerji, iqtisadi, humanitar və ekoloji terroru həyata keçirir”. Guya buna görə də “Artsax Respublikasının” yeganə böyük su anbarı bu gün ciddi ekoloji problemlərlə üzləşib.
Baş verənlərə görə Azərbaycanı hədəfə alan separatçılar unutmalı deyillər ki, bu problemin səbəbkarı, Sərsəng su anbarında yaranan ekoloji böhranın, habelə flora və faunaya vurulan ziyanın və sairin bir nömrəli müəllifi Ermənistandır.
“Separatçılar şou yaratmaqdansa, ekologi terror “qəhrəman”ı Ermənistana hesab sorsunlar, çünki baş verənlərin günahkarı odur”
Ermənilərin iddiası ilə bağlı “Bakı-Xəbər”ə şərh verən Elm və Təhsil Nazirliyi Botanika İnstitutunun Geobotanika şöbəsinin aparıcı elmi işçisi, biologiya üzrə fəlsəfə doktoru, dosent Sadıq Qarayev bildirdi ki, sepratçıların ittiham etməli olduğu dövlət Ermənistandır, çünki 30 il müddətində bu ölkənin həyata keçirdiyi su terroru nəticəsində vəziyyət belə şəkil alıb. Sərsəng su anbarı ilə əlaqədar uzun illər böhran yaşandığını deyən S.Qarayevin sözlərinə görə, Ermənistana təsir etmək imkanında olan dövlətlər və beynəlxalq təşkilatlar 30 il müddətində heç bir iş görmədilər. “Heç bir beynəlxalq təşkilat, yaxın-uzaq dövlətlər Ermənistandan ekoloji terroru dayandırmasını tələb etmədi. Bu ölkənin həyata keçirdiyi işğal nəticəsində təbii bulaqlarımız, artezianlarımız, çaylarımız, göllərimiz, su ehtiyatlarımız təhlükə altına düşdü, ekoloji terrora məruz qaldı. Amma o təşkilatlar susdular və məsələyə ikili standartlarla yanaşdılar. Sərsəng su anbarı ilə bağlı Ermənistanın bütün terror əməlləri məlumdur. Biz bu problemi dünya miqyasına çıxarmışıq. Ermənistanın Sərsəng su anbarına qarşı etdiyi terror yalnız Azərbaycana deyil, bütövlükdə Cənubi Qafqaza, onun flora və faunasına, təbiətinə, ekologiyasına yönəldi. O bütün Qafqaza düşmənçilik edib. Təbiət bütövdür, Qafqaz təbiətinə bütöv yanaşmaq lazımdır. Ermənistan 30 il Sərsəng su anbarının ağzını kəsib bizə su buraxmadı və nəticədə də suyun axdığı ərazilərin mikroflorasına, yosununa, ağacına, fauna və florasına, suda, quruda yaşayan canlılara qarşı ekoloji terror etdi. Bu səbəbdən də mövcud durum yaranıb. Separatçılar şou yaratmaqdansa, ekologi terror “qəhrəman”ı Ermənistana hesab sorsunlar, çünki baş verənlərin günahkarı odur”.
S.Qarayev qeyd etdi ki, Vətən müharibəsindən əvvəl də, sonra da Azərbaycana qarşı ekoloji terror davam etdirilir və ermənilər təbii sərvətlərimizi talan edib, yataqlarımızı qanunsuz olaraq istismar ediblər. Azərbaycan ekofəalların haqlı mübarizəsini xatırladan S.Qarayevin sözlərinə görə, bizim ekofəallar öz sərvətlərimizin qanunsuz istismarına, talanmasına, Ermənistana daşınmasına etiraz edirdi və bu aksiya dünyaya səs saldı. Bu gün separatçılarının “ekoloji” aksiya keçirib Azərbaycana qarşı əsassız iddialar irəli sürməsinin yolverilməz olduğunu deyən alimin sözlərinə görə, Azərbaycan alimləri və jurnalistləri ermənilərin qanunsuz əməllərini dünyaya davamlı olaraq çatdırmalıdır. “Bu gün separatçılar Sərsəng su anbarının “ekoloji böharan” içində olduğunu deməklə beynəlxalq aləmin diqqətini cəlb etmək istəyirlər ki, guya bunları Azərbaycan törədib. Əlbəttə, bu yalandır. Biz həqiqətləri dünyaya çatdırmaqda davam etməliyik. Əlimizdə saysız faktlar var. Azərbaycan heç zaman Qarabağda yaşayan ermənilərə hər hansı bir pis niyyət sərgiləməyib, əksinə, onları öz vətəndaşlarımız sayıb və hər cür problemlərini qarşılamağa hazır olduğunu bəyan edib. Sərsəng su anbarından onlar istifadə edir. Hətta keçən il "Azərbaycan Meliorasiya və Su Təsərrüfatı" ASC-nin nümayəndələri yerli mütəxəssislərin iştirakı ilə Qarabağ iqtisadi rayonunda yerləşən Sərsəng su anbarına baxış keçirib”-deyə S.Qarayev əlavə etdi.
Məlumat üçün bildirək ki, mühüm starteji əhəmiyyətə malik olan Sərsəng su anbarı Ulu Öndər Heydər Əliyevin təşəbbüsü ilə tikilib. 1976-cı ildə Heydər Əliyev su anbarının açılışında şəxsən iştirak edib. Azərbaycanın ölkə daxilində yaranan ən bolsulu çaylarından biri olan Tərtərçayın üzərində olan Sərsəng su anbarının ümumi həcmi 560 milyon kubmetrdir. Qarabağ iqtisadi rayonunun ən iri su hövzəsi olan Sərsəng su anbarı vasitəsilə 96 000 hektar ərazi (Bərdə, Tərtər, Ağdam, Ağcabədi, Yevlax və Goranboy) suvarılır. Su anbarı bəndində ümumi gücü 50 mvt olan su eletrik stansiyası tikilib.
Əli TURABOV
