İranın “islam”, “şiə” amilindən sui-istifadə edərək insanları öz casus şəbəkəsinə cəlb etdiyi məlumdur. Molla rejimi Azərbaycanda da özünün casus şəbəkəsini yaratmağa nail olub və son aylar Azərbaycanın müvafiq qurumlarının keçirdikləri əməliyyatlar nəticəsində mollakratiyaya nökərçilik edən şəxslər saxlanıb.
Demək olar ki, “silahdaşları”nın onları ələ verməsi nəticəsində hər gün yeni casuslar ifşa olunur, həbs edilirlər. Saxlanılan şəxslər ifadə verərkən molla rejiminə işlədiklərini və mollaların tapşırıqlarını yerinə yetirdiklərini, İran xüsusi xidmət orqanları ilə işbirliklərini etiraf edirlər. İranın casus şəbəkəsinin üzvləri ifşa olunduqca İran rəsmiləri onlardan imtina etməyə başlayırlar. Heç yutub qəhrəmanları olan “Hüseyniyyun” terrorçuları da onların adını çəkmir. Molla rejimi mümkün qədər həbs edilən şəxsləri özündən uzaq tutmağa çalışır. Azad İran kanalı İSNA-ya istinadən yazır ki, İran XİN-in sözçüsü Naser Kənani İslam Respublikasının Azərbaycanda həbs edilən İran agentura şəbəkəsinin üzvləri ilə hər hansı əlaqəsini inkar edib. Kənani casus şəbəkəsi ilə molla hökumətinin heç bir əlaqəsi olmadığını iddia edir.
Molla rejimi Azərbaycandakı əlaltılarını niyə inkar edir?
“...Saxlanılanlar Qüdsçülərdən, yaxud “Hüseyniyyun”çulardandır və İranın casus şəbəkəsi üzvləridir”
Orta Doğu Araşdırmalar Mərkəzinin rəhbəri, siyasi şərhçi Sədrəddin Soltan “Bakı-Xəbər”ə şərhində bildirdi ki, İran XİN-in sözçüsü N.Kənaninin Azərbaycanda həbs olunan İran agentura şəbəkəsi ilə bağlı verdiyi açıqlama bir qədər dodaqqaçırandır. “Birincisi, Nasir Kənani bu məsələlər üzrə səlahiyyətli deyil. Yəni o, İranın hansı ölkədə neçə casusunun olduğu, onların necə fəaliyyət göstərdiyi məsələsinə məsul deyil. Bu baxımdan, Kənaninin verdiyi açıqlama yetərli sayılmır. İkinci bir tərəfdən, İranda “Hüseyniyyun”çular var, bu, Azərbaycan vətəndaşlarından ibarət formalaşdırılmış bir qrupdur. Bu qrup açıq-aşkar İran İnqilab Keşikçiləri qvardiyasının (SEPAH) Qüds qolu tərəfindən təsis olunub. Sonuncu həbs olunan dəstənin üzvləri də Qüds qolu ilə, “Hüseyniyyun”çularla bağlı olduqlarını etiraf edurlər. Bu isə deməyə əsas verir ki, saxlanılanlar Qüdsçülərdən, yaxud “Hüseyniyyun”çulardandır və İranın casus şəbəkəsi üzvləridir. Çünki Qüds qolu xarici ölkələrdə kəşfiyyat işləri ilə məşğuldur. Bu baxımdan, Nasir Kənaninin açıqlaması yersiz və yetərsizdir. İkinci bir tərəfdən də, dünyanın heç bir yerində XİN sözçüsü casus şəbəkəsinin hansı ölkədə fəaliyyət göstərdiyini hələ etiraf etməyib. Odur ki, Kənaninin də etiraf etməsi mümkünsüzdür”-deyə S.Soltan qeyd etdi.
Leyla QARAXANLI
