Ermənistanın baş naziri Nikol Paşinyanın oğlu Aşot Paşinyanın məlumatı əsasında İstintaq Komitəsi adam oğurluğu maddəsi üzrə cinayət işi açıb. Xatırladaq ki, bu günlərdə Aşot Paşinyanın oğurlanmasına cəhd edilməsi barədə erməni mediasında məlumatlar yayılıb.
Bu fonda cərəyan edən hadisələr və yayılan məlumatlar həm erməni cəmiyyətində, həm də elə Paşinyanın ailəsində xaos hökm sürdüyünü deməyə əsas verir.
Qeyd edək ki, baş nazirin ailəsinə məxsus “Aykakan Jamanak” qəzeti “Aşot Paşinyanı evinin yaxınlığında oğurlamağa cəhd etdilər” başlıqlı məqalə dərc edəndən təxminən bir saat sonra 44 günlük müharibədə həlak olan hərbçilərin valideynləri polisə aparılıb. Onlar Jora Saakyanın atası Vahid Saakyan, Mxitar Qaleyanın atası Qarik Qaleyan və Jora Martirosyanın anası Qayane Akopyandır. “Aykakan Jamanak”ın yazdığına görə, adam oğurluğunda iştirak edənlər “Oğulların harayı” ictimai təşkilatının üzvləridir və onlar Aşot Paşinyanı öz avtomobillərinə minməyə məcbur ediblər. O da qeyd edilir ki, Paşinyanın oğlu küçədə 44 günlük müharibədə həlak olan hərbçilərin valideynləri ilə təsadüfən rastlaşıb. Həmin şəxslər Aşotu maşına əyləşməyə dəvət edib, sonra onu buna məcbur ediblər: “Aşot Paşinyan maşına mindikdən sonra bu şəxslərin davranışını qeyri-adekvat hesab edərək maşını saxlamağı tələb edib. Amma onu maşına mindirənlər sırasında olan qadın itirəcəyi heç bir şeyin olmadığını bildirərək, onu öldürüb Yerablur (İrəvanda hərbi məzarlıq) qəbristanlığına aparacağını deyib”. Ancaq Aşot dayanmış avtomobildən düşə bilib, bu zaman həmin təşkilatın onları təqib edən avtomobili ilə toqquşub. Qəzetin yazdığına görə, Paşinyanın ayağı zədələnib, “Oğulların çağırışı” QHT-nin üzvləri hadisə yerindən qaçıblar. “Azatutyun” radiosunun çəkiliş qrupu “Oğulların harayı” təşkilatının ofisinin qarşısında olarkən polis valideynləri içəri gətirməyə başlayıb. Ölən hərbçi Jora Saakyanın anası Zoranuş Saakyan da təşkilatın ofisində olub və o, gətirilənlər arasında ərinin də olduğunu bildirib. Zoranuş Saakyan təsdiqləyib ki, hadisə baş verən gün, yəni mayın 17-də ölən hərbçilərin valideynlərindən birinin işi üzrə məhkəmə iclasından sonra Aşot Paşinyanla görüşüblər: “Həmin gün məhkəmə var idi, ora gəldi. Böhtan atırlar ki, guya valideynlər onu qaçırıb, amma biz qaçırmamışıq. Qayane Martirosyanın məhkəməsi idi, Qayaneyə dedim gəl, özü gəldi, ona toxunmadıq. Özü də səssizcə oturdu ... və maşından düşdü, getdi”. “Aykakan Jamanak” ölən hərbçi Mxitar Qaleyanın atası Qarik Qaleyanın adam oğurluğuna cəhddə əli olduğunu iddia edib. Saxlanılan zaman “Azatutyun” radiosunun müxbiri ona bir neçə sual verə bilib. O, kiminsə baş nazirin oğlunu qaçırmağa cəhd etdiyini təkzib edib: “O, məhkəmənin yanından keçirdi, sonra valideynlərdən biri ilə oturdu. Analardan biri dedi: biz Yerablura gedirik, bu oğlanların gözünün içinə bax və onların etdiklərini valideynlərinə danış. Maşına mindi, getdilər, hardasa Üçüncü sahədə maşının qapısını açıb düşdü. Yəqin ki, maşın hərəkətdə olub. Arxada gələn beş maşından birində idim, o çıxıb qaçanda mən də onu vurmamaq üçün yavaşladım”. Qarik Qaleyan ötən il bir qrup şəxslə hərbi hissənin ərazisinə daxil olmaq və komandir müavininə qarşı zorakılıq etmək ittihamı ilə həbs edilib, sonra isə zaminə buraxılıb. Mxitar Qaleyanın anası Astğik Qaleyan jurnalistlərə açıqlamasında maraqlı məqamlara toxunub: “Bunun təsadüf olduğunu düşünmürəm, burada bir tendensiya görürəm”. Erməni hərbi qulluqçunun anası qeyd edib ki, Paşinyanın oğlu valideynlərinin etdiklərinə görə üzr istəyib: “Onun necə peyda olduğunu bilmirəm, amma məncə, bu təsadüfi deyil. Özü də valideynlərinin etdiklərinə görə üzr istəyib və deyib ki, valideynlərinə heç nə deyə bilməz. Həmçinin deyib ki, “mənim valideynlərim türkdür”. Bundan başqa deyib ki, evdən çıxıb, onlarla əlaqəsi yoxdur”.
Vəkil Ruben Melikyan isə adam oğurluğu ilə bağlı məlumatların həqiqətə uyğun gəlmədiyini, polisə aparılanlarla görüşməyə hələ vaxtı olmadığını söyləyib: “Mənə dedilər ki, bu doğru deyil, adam oğurluğu cəhdi olmayıb. Düşünmürəm Aşot Paşinyan özünü elə aparıb ki, kimsə ondan atasının etdiklərinə görə cavab tələb etsin. Bu versiya mənə inandırıcı görünmür. Yəni o heç vaxt Nikol Paşinyanın ailəsinin bir çox üzvlərinin həzz aldığı dəbdəbədən faydalandığını göstərəcək davranış sərgiləməyib”. Hələlik, Aşot Paşinyanın sağlıq durumu ilə bağlı məlumat yoxdur. Amma baş verənlərdən sonra “Aykakan Jamanak” video yayımlayıb, orada Aşot Paşinyanın maşından tullanan zaman başqa avtomobillə vurulmasının əks olunduğunu bildirib. Media bu videonun onlara haradan və necə çatdığını dəqiqləşdirməə çalışsa da, müvafiq məlumat verilmir. Polisə aparılanların vəkili Vaan Hovhannisyan isə 44 günlük müharibə zamanı həlak olan Jora Martirosyanın anası Qayane Akopyanın Aşot Paşinyanı maşına dəvət etdiyini əks etdirən video yayımlayıb. Vəkil bu videonun cinayət tərkibini təkzib etdiyini vurğulayıb. Cinayət işinin açıldığı maddədə 4 ildən 8 ilə qədər azadlıqdan məhrumetmə nəzərdə tutulur. Polisə aparılan vətəndaşların hüquqlarının müdafiəsini üzərinə götürən vəkil Vahan Ovannisyan “Azatutyun”a müsahibəsində Viqen Azatyan, Vahid Saakyan, Qayane Akopyan və Qarik Qaloyanın saxlanıldığını bildirib.
Nahid SALAYEV
