Azərbaycan Ermənistanla münasibətlərin normallaşması prosesinə beynəlxalq ictimaiyyətin töhfəsini yüksək qiymətləndirir. Bunu Azərbaycanın xarici işlər naziri Ceyhun Bayramov İslandiyanın Reykyavik şəhərində Avropa Şurasına üzv ölkələrin dövlət və hökumət başçılarının dördüncü Zirvə Görüşündə deyib.
Daha sonra nazir bunları qeyd edib: “Son aylar ərzində aparılan bir sıra danışıqlara baxmayaraq, vəziyyət əvvəlki kimi gözləntilərimizə cavab vermir. Azərbaycan normallaşma prosesinə beynəlxalq ictimaiyyətin töhfəsini və bu kontekstdə Ermənistanla Azərbaycan arasında etimadın möhkəmləndirilməsi üzrə Aİ Şurası çərçivəsində göstərilən səyləri yüksək qiymətləndirir”.
Bütün hallarda belə bir təşəbbüs normaldır. Ümumilikdə, beynəlxalq ictimaiyyətin bu prosesə töhfəsi nədən ibarətdir? Ümumiyyətlə, beynəlxalq ictimaiyyətin bu işə töhvəsini yetərli saymaq olarmı? Təkcə bu kifayətdirmi və beynəlxalq ictimayyət tərəfindən daha nələr edilməlidir?
“Beynəlxalq ictimayyətin Azərbaycanın üzləşdiyi mina problemi ilə bağlı çağırışları bu baxımdan faydalı ola bilər”
Mövzu ilə bağlı “Bakı-Xəbər”ə açıqlama verən İrəvan Azadlıq Təşkilatının sədri Təbriz Musayevin fikrincə, beynəlxalq ictimaiyyətin iki ölkə münasibətlərinin normallaşmasına töhvəsi var, amma bunu yetərli saymaq olmaz: “Bir neçə dəfə Azərbaycan və Ermənistan ictimaiyyət nümayəndələrinin, elm adamlarının, mədəniyyət nümayəndələrinin müəyyən çərçivədə qarşı tərəfin nümayəndələri ilə təmasları olub. Hiss olunur ki, beynəlxalq ictimaiyyət bu cür təmaslara, görüşlərə müsbət prizmadan yanaşır. Belə təmaslar əsasən xarici dövlətlərdə olur. Məlum məsələdir ki, belə dialoq xarakterli təmasların artması münasibətlərin normallaşmasına müəyyən zəmin yarada bilər. Düzdür, yalnız ictimai təmaslar və beynəlxalq ictimaiyyətin buna dəstək verməsi bütün problemlərin həlli demək deyil. Ancaq nəzərə alsaq ki, Azərbaycan 44 günlük Vətən müharibəsində işğala əsasən son qoyub, ölkəmizin ərazi bütövlüyü bərpa olunub, o üzdən indi vacib məsələ iki dövlət arasında sülhün əldə olunmasıdır. Hesab edirəm ki, beynəlxalq ictimaiyyət Azərbaycan-Ermənistan münasibətlərinin normallaşmasında daha çox iş görə bilər. Ancaq hələ ki, bu yöndə görülən işləri yetərli saymaq olmaz. Yəni beynəlxalq ictimaiyyətin buna töhvəsi elə də çox deyil. Halbuki, potensial imkanlar yetərincə böyükdür. Hesab edirəm ki, iki ölkə münasibətlərinin normallaşması ilə bağlı çağırışlar artmalıdır. Məsələn, Azərbaycan ərazilərinin azad etdikdən sonra çox ciddi mina problemi ilə üz-üzədir. Ərazilərimiz minalarla həddən ziyadə çirkləndirilib. Fikrimcə, beynəlxalq ictimaiyyətin Azərbaycanın üzləşdiyi mina problemi ilə bağlı çağırışları bu baxımdan faydalı ola bilər. Bu, Ermənistanı məcbur edəcək ki, minalanmış ərazilərin dəqiq xəritələrini ölkəmizə təhvil versin. Bununla yanaşı, beynəlxalq ictimaiyyət Birinci Qarabağ müharibəsində itkin düşən 4000 nəfərə yaxın azərbaycanlının yerinin müəyyən olunmasında Ermənistana çağırışlar edə bilər. Bütün bunlar, əlbəttə ki, münasibətlərin yoluna düşməsinə töhfə verə bilər”.
Vidadi ORDAHALLI
