Avropa İttifaqının Ermənistandakı missiyası ilə bağlı müzakirələr qızışıb. Hətta Erməmistanın özündə belə bu missiyanın effektivsizliyindən şikayət edirlər. Məhz bu səbəbdən də Avropanın təmsilçiləri məsələyə münasibət açıqlamaq məcburiyyətində qalıblar.
Avropa İttifaqının Ermənistandakı nümayəndə heyətinin rəhbəri Andrea Viktorin jurnalistlərə bildirib ki, “Aİ müşahidəçiləri Ermənistana, eləcə də Azərbaycana hesabat vermirlər, onları Brüsselə ötürürlər”.
O qeyd edib ki, Müdafiə Nazirliyinin zabitləri də missiyaya qoşulduğundan, erməni tərəfi vəziyyətdən məlumatlı olur: “Müşahidəçilərin hadisələr baş verən yerdə görünmək həvəsi yoxdur, sərhədi izləyir, gördüklərini qeyd edirlər. Amma bu o demək deyil ki, onlar avtomatik olaraq nəyinsə baş verdiyi bir nöqtəyə çata bilərlər".
“Müşahidəçilər eskalasiyanın baş verdiyi yerə getməməli idilərmi” sualına səfir yalnız iki gün sonra belə bir fürsət əldə etdiklərini deyib:
“Onu da nəzərə almaq lazımdır ki, Ermənistan tərəfi ilk növbədə müşahidəçilərin təhlükəsizliyinə cavabdehdir. Başqa sözlə, müşahidəçilər müəyyən bir nöqtəyə getməkdən imtina etdikdə fərqli vəziyyət yarana bilər.
Amma ora getdilər, qiymətlərini verdilər və bizə yox, birbaşa Brüsselə göndərdilər”.
Çox maraqlıdır, Avropa İttifaqının Ermənistandakı müşahidə missiyasının fəaliyyəti prosesə hansısa yenilik, fayda gətiribmi?
Siyasi şərhçi Sahil Kərimli “Bakı-Xəbər”ə açıqlamasında bildirdi ki, Avropa İttifaqı müşahidəçilərinin Ermənistan ərazisinə gəlişi bölgədə sülhün yox, yeni münaqişə ocağının yaranmasına xidmət edir: “Müşahidəçilərin gəlişindən sonra Ermənistan ordusunun hərbi təxribatlarının intensivləşməsi bunun əyani sübutudur. Görünən odur ki, Aİ missiyası bölgəyə özü ilə sülh əvəzinə qarşıdurma gətirib. Ermənistan hərbi-siyasi rəhbərliyi avropalı havadarlarına güvənərək hər gün hərbi təxribatlar törədir, Azərbaycanın suveren ərazilərinə təhdidlər yaradır, ordumuzun mövqelərini atəş altında saxlayır. Avropa dairələri hər nə qədər sülh mesajları versələr də, reallıq tamamilə başqadır. Çünki son aylarda Ermənistan-Azərbaycan şərti sərhədlərində yaxşıya doğru heç nə dəyişməyib, əksinə, gərginlik daha da artıb. Ermənistan istər danışıqlar masasında, istərsə də hərbi müstəvidə aqressiv mövqe tutub. Bu isə Cənubi Qafqazda təhlükəsizliyə zərbədir. Ermənistanın qeyri konstruktiv addımları sülh prosesinin gələcəyini sual altında qoyur. Bu isə Ermənistanın özü üçün təhlükədir”.
Sahil Kərimli hesab edir ki, bu missiyanın faktiki olaraq Azərbaycan-Ermənistan münasibətlərindəki normallaşmaya heç bir müsbət təsiri və faydası yoxdur: “Əksinə, bu birbaşa olaraq Ermənistanın revanşist hisslərini daha da alovlandırır və Ermənistan müəyyən dərəcədə ümidlənir ki, nə vaxtsa prosesləri öz xeyrinə dəyişə bilər. Son günlərdə sərhəddə, yəni şərti sərhəddə baş verən atışmalar da, fikrimcə, Ermənistan tərəfindən məqsədyönlü olaraq törədilir ki, Azərbaycan tərəfi adekvat cavablar versin və onlar Avropa İttifaqının müşahidə missiyasının buraya əbəs gəlmədiyini bir növ əsaslandırsın. Ancaq görürsünüz ki, faktiki olaraq biz bu müşahidə missiyasının hansısa bir tutarlı sənədini və ya hesabatını hələlik görə bilməmişik. Onlar öz müşahidə missiyaları ilə əlaqədar heç bir iş ortaya qoya bilmirlər".
Məhəmmədəli QƏRİBLİ
