Türkiyə öz hava məkanını Ermənistanın “FlyOne Ermənistan” aviaşirkətinin üçüncü ölkələrə uçuşu üçün bağlayıb. Dünyanın 8-dən çox ölkəsinə uçuşlar həyata keçirən “FlyOne” şirkətinə məxsus təyyarələrin sərnişinləri Kişinyov, Moskva, Verona, Parma, Paris, London, Dublin, Lissabon istiqamətlərinə uçuşlardan mərhum olub.
Maraqlıdır ki, az sonra Birləşmiş Ərəb Əmirliyi də erməni aviaşirkətinin öz ölkəsinə ucuşlarını məhdudlaşdırıb. Dubayın aviasiya xidməti laynerin Əl-Məktum hava limanına enişinə icazə vermədiyindən “Fly One Ermənistan” geri dönərək İranın Şiraz hava limanına məcburi eniş edib. Oradan isə sərnişinlərini İrəvana geri qaytaramağa məcbur olub.
Göründüyü kimi, Ermənistanın adıçəkilən aviaşirkətinin beynəlxalq uçuşlardan təcrid edilməsi təkcə “Nemezis” və Türkiyənin buna qarşı cavab tədbirləri və s. məsələlərlə bağlı deyil. Şirkətin son bir ildə ən çox uçuşları Parisə istiqamətlənib, Fransanın Ermənistana son aylarda ərzaq və geyim, məişət əşyaları ilə yanaşı, silah və s. hərbi təyinatlı məhsullar göndərməsi istisna deyil. Çünki Prezident Makron səviyəsində etiraf edilib ki, Ermənistana lazım olan dəstəklər veriləcək.
Hərbi-siyasi ekspert, ehtiyatda olan polkovnik-leytenant İbrahim Rüstəmli “Bakı-Xəbər”ə açıqlamasında bildirdi ki, ermənilərin Azərbaycan və Türk dünyasına qarşı nifrətini formalaşdıran qüvvələr var: “Onlar artıq buna genetik xarakter veriblər. Hələ Birinci Dünya müharibəsində bu adamlar türklərə xəyanət etdilər. Türklərin düşmənləri ilə birlikdə silahlanıb, illərlə birlikdə yaşadıqları türklərə qarşı döyüşməyə başladılar. Sonra da adını erməni genosidi qoydular. Yəni əslində bunu onlar yox, türk və müsəlman dünyasına qarşı fokuslanmış, müxalifətdə dayanmış ölkələr etdilər. Ermənilər balaca bir varlıqdılar. Onlar kimdir ki, bunu formalaşdırsınlar? Demək istəyirəm ki, bu məsələ həmişə aktualdır. Sovet dönəmində az da olsa biz ermənilərlə birlikdə yaşadıq. Çünki Sovet hakimiyyəti illərində ermənilər ətraf dünyadan təcrid olunmuşdular. Konkret olaraq demək istəyirəm ki, ermənilərin silahlanması, Azərbaycan və Türk dünyasına qarşı mübarizə aparması məsələsi daim aktualdır. Onların imkanı olsa bizə ən böyük pislikləri edərlər. Söhbət tək ermənilərdən getmir, fransızların, rusların, farsların, hindistanlıların münasibətlərindən gedir. Ermənilərin əli ilə bizə hər xainliyi edərlər. Bu məsələ ilə bağlı biz həmişə ayıq olmalıyıq. Qədim Çin stratejisinin üçüncü əsas maddələrindən biridir ki, düşmənə döyüşdən qabaq qalib gəlmək lazımdır. Nə qədər ki, erməni havadarları Azərbaycan və Türk dünyasını güclü görəcəklər, öz qınlarında döyüşəcəklər. Bizim zəif yerimizi tapdıqda isə, o dəqiqə qınlarından çıxıb bizim üstümüzə gələcəklər. Heç bir şans və aman verməyəcəklər. Ona görə də, mən razılaşıram bu məsələ ilə. Onların silahlanması prosesi gedir və gedəcək də. Məqsəd nədən ibarətdir? Bu silahlanmanın, ola bilsin ki, bu gün elə bir əhəmiyyəti olmasın. Amma gələcəyə aid silahlanmadır bu. Eskalasiyanı getdikcə dərinləşdirmək, nifrəti, kini daha da möhkəmləndirmək niyyəti var bu silahlanmada, bu düşmənçilikdə. Ona görə də, biz daim bir əlimizdə silah, bir əlimizdə gül tutmalıyıq. Əgər sabah barışıq, sülh olarsa, yenə də bir əlimizdə silah olmalıdır. Çünki tarix bunu sübut edir. Bir səhvi dəfələrlə təkrarlamaq bir faciəni dəfələrlə yaşamaq deməkdir. Ona görə də, biz Ermənistana, ermənilərə və onların havadarlarına münasibətdə ayıqlığımızı heç vaxt itirməməliyik, daim ayaqda dayanmalıyıq. Biz həmişə güclü olmalıyıq”.
Beləliklə, yuxarıdakı əsaslı amillər Ermənistanın “FlyOne Ermənistan” aviaşirkətinin digər xarici və yerli aviadaşıyıcılarla birgə əlaqələri sayəsində qanunsuz daşınmalara cəlb olunduğunu istisna etmir. Bu və digər şübhələr də məhz həmin şirkətin Türkiyə və Birləşmiş Ərəb Əmirliyinin hava məkanlarının üzünə bağlanmasına çox ciddi əsaslar verir. Çox güman ki, burada Ermənistan vasitəsilə Rusiyaya gizli silah ötürmək şübhələri də var.
Məhəmmədəli QƏRİBLİ
