Avropa İttifaqının Ermənistandakı nümayəndəliyinin rəhbəri, səfir Andrea Viktorin Avropa Günü və Aİ-Ermənistan münasibətləri ilə bağlı mətbuat konfransında Brüssel görüşü ilə bağlı maraqlı şərh verib:
“Brüsseldə keçirilən Paşinyan-Əliyev-Mişel görüşündə qoşunların sərhəddən güzgü kontekstində çıxarılması ilə bağlı aydın şəkildə qeyd olunub ki, Ermənistan qoşunlarının sərhəddə yerləşdiyi bir-iki nöqtə var, çox aydın delimitasiya və demarkasiya olmalıdır. Bu ifadə Brüsseldə də işlədilib”.
Jurnalistin hansı məqamların və ya bölmələrin söhbət mövzusu olduğu və təfərrüatları təqdim edib-etməyəcəyinə aydınlıq gətirmək xahişinə Viktorin belə cavab verib: “Xeyr, təfərrüatlarla tanış deyiləm, amma bu barədə eşitmişəm”.
Bir daha görünür ki, Ermənistan öz yalanlarını artıq gizlədə bilmir və onun sərhəddəki təxribatları Avropa strukturları tərəfindən də ifşa olunur.
Avropa Birliyinin bu dəyərləndirməsi barədə ekspertlər nə düşünür?
Hərbi-siyasi ekspert Emin Həsənli “Bakı-Xəbər”ə açıqlamasında bildirdi ki, artıq Ermənistan təxribatçı olduğunu pərdələyə bilmir: “Bunu indi bütün dünya görür. Sərhədlərlə bağlı məsələ də aydındır. Burda Ermənistan qoşunlarının keçdiyi ərazi var, ordan geri çəkilməlidir. Ən böyük məsələ isə Qarabağda hələ də on mindən artıq erməni separatçısının olmasıdır. Onları, bilirsiz ki, Ermənistan həm silahlandırır, həm maddi cəhətdən təmin edir, həm də müharibə qurucuları kimi aylıq əmək haqqı verir. Bunlar hamısı onu göstərir ki, Ermənistan hələ də götürdüyü öhdəlikləri yerinə yetirmir. Xüsusən də 10 noyabr öhdəliyində erməni separatçıları 2020-ci ildə Qarabağdan çıxıb getməli idi. Sual olunur: orada duran separatçılar kimdir? Onlar, aydın məsələdir ki, Ermənistan birləşmələri, erməni ordusudur. Onlar ordan çıxıb getmədikləri halda danışıqların heç bir əhəmiyyəti olmayacaq. Düzdür, Ermənistan Azərbaycanın ərazi bütövlüyünü tanıdığını, sülhü imzalamaq istədiyini bəyan edir. Amma bir tərəfdən də Qarabağda erməni ordusu var və sərhəddə təxribatlar davam edir. Buna baxmayaraq, ayrı-ayrı vaxtlarda Paşinyan deyir ki, guya Ermənistanda 5-ci kalon var. Konkret Rusiyaya bağlı qüvvələr var və onlar təxribat törədir. Onu da başa düşürlər ki, Paşinyan qərar qəbul edə bilər ki, Ermənistan ordusu ordan çıxsın. Bilirsiz ki, ildə bir neçə dəfə dəyişikliklər olur. Ermənistandan olan çağırışçılar Qarabağa gəlirlər, ordan da tərxis olunurlar. Ancaq yaxşı olardı ki, Avropa Birliyinə aid olan danışıqlarda da bu məsələ birbaşa Azərbaycanın tələbi kimi, daha doğrusu, hər iki dövlətin imzaladığı, Ermənistanın üzərinə götürdüyü öhdəlik kimi yerinə yetirilsin. Yaxud da Azərbaycan dövləti özü Ermənistanı buna məcbur edəcək. Sərhəddən qarşılıqlı olaraq qoşunların geri çəkilməsi mümkün deyil. Azərbaycan öz dövlət sərhədini özü qoruyur və lazım olan yerdə də qərarlaşıb”.
Məhəmmədəli QƏRİBLİ
