Türkiyədə keçirilən prezident və parlament seçkiləri hakimiyyətdə olan Ədalət və İnkişaf Partiyasının qələbəsi ilə başa çatdı. Hakim partiya müttəfiqi Milliyyətçi Hərəkat partiyası ilə birlikdə parlamentdə - Böyük Millət Məclisində 321 yer qazanmaqla yanaşı, prezident seçkilərinin ilk turunun da qalibi oldu.
Əksər müşahidəçilərin və ekspertlərin fikrincə, kimin dövlət başçısı olacağı mayın 28-də keçiriləcək ikinci turda müəyyən olunacaq. Ancaq səslərin bir hissəsi hələ də sayılmadığından hər cür sürpriz də istisna olunmur və Rəcəb Tayyib Ərdoğanın birinci turda qalib gəlmək şansı hələ də qalmaqdadır.
Türkiyənin böyük dövlət adamlarından olan Süleyman Dəmirəl deyirdi ki, “boş təncərənin (qazanın) devirəməyəcəyi iqtidar yoxdur!”. Ancaq 20 ildən artıq qardaş dövlətin başında olan Rəcəb Tayyib Ərdoğan bunun həmişə belə olmadığını hamıya birmənalı şəkildə sübut etdi. Tarixinin ən ağır iqtisadi böhranlarından birini yaşayan Türkiyədə üstəlik seçkilər ərəfəsində son yüz ilin ən dağıdıcı zəlzələsi də baş verdi. Nəticədə 50 mindən çox insan uçqunlar altında qalaraq həlak oldu, on minlərlə insan yaralandı, itkin düşdü. Yaşayış evlərinin böyük əksəriyyəti sıradan çıxdı. Bu vəziyyətdə seçkiləri udmaq çoxlarına mümkünsüz görünsə də Türkiyə prezidenti bunu bacardı. Xırda çətinliklər qarşısında özünü itirən dövlət başçılarından fərqli olaraq, o, böyük siyasi liderlərə xas dözüm və dəyanət göstərdi. Xalqla ünsiyyətini bir an da olsun kəsmədi. Səhhətində yaranan problemləri nəzərə almadan seçkiqabağı kampaniya dövründə Türkiyəni qarış-qarış gəzdi, milyonlarla insanın toplaşdığı mitinqlərdə çıxış etdi, seçicilərdə tərəddüdün, şübhənin, ümidsizliyin yaranmasına imkan vermədi.
Şübhəsiz ki, mübarizə bitməyib və müxalifətin vahid namizədi Kamal Kılıcdaroğlu da ikinci turda qələbə şansını hələ də saxlayır. Onun hamıdan əvvəl səsvermədə üçüncü olan Sinan Oğanla əlaqə saxlaması və görüş təklif etməsi ikinci turun kəskin mübarizə şəraitində keçəcəyindən xəbər verir. Çox güman ki, prezident Ərdoğan da onunla görüşəcək və dəstəyini almağa çalışacaq. Səsverməyə bir gün qalmış müsahibə verən Sinan Oğan dəstək verəcəyi namizəddən edəcəyi tələbləri açıqlamışdı. Əsas şərtinin “terrordan uzaq olma”-tələbinin olduğunu bildirmiş və dəstək verəcəyi namizəddən prezident yardımçısı və bir neçə nazir postu istəyəcəyini demişdi. Bazarlıqlar necə keçiriləcək və son nəticədə Sinan Oğan kimin tərəfində olacaq?
Qeyd etməliyik ki, bu bazarlıqlarda qalib gəlmə şansı hər iki namizəddə var və onlar hörmətli Oğanı öz tərəflərinə çəkmək üçün hər şeyi edəcəklər. Qeyd olunmalıdır ki, seçkiqabağı dövrdə hər iki namizəd “çox səxavətli” davrandı və çoxlu real və qeyri-real vədlər verildi. Şübhə yoxdur ki, eyni “səxavət” danışıqlar zamanı da göstəriləcək. Vəzifə paylamaq sahəsində çox “əliaçıq” olan və artıq 7 nəfərə prezident yardımçısı(müavini) postunu verən K.Kılıcdaroğlunun Sinan Oğana da eyni postu təklif edəcəyi və üstəlik bir neçə nazir vəzifəsini də verəcəyi heç kimdə şübhə doğurmur. Bu səbəbdən onun Kılıcdaroğluna dəstək vermə ehtimalı daha yüksək qiymətləndirilir.
Bəs, bu şəraitdə ona şərtlər irəli sürülməsini qəbul etməyən prezident Ərdoğan necə davranacaq? Bu dəfə də dəfələrlə nümayiş etdirdiyi çevikliyi göstərə biləcəkmi? Yoxsa Sinan Oğanın dəstəyindən imtinamı edəcək? Bunu qarşıdakı bir neçə gün göstərəcək. Çox istərdik ki, prezidentlik yarışının üçüncüsü hörmətli Rəcəb Tayyib Ərdoğanı dəstəkləsin və seçkilər onun qələbəsi ilə başa çatsın. Çünki Ərdoğanın qələbəsi həm də Azərbaycanın qələbəsidir!
Abutalıb Səmədov
