“Bilirsiz ki, 2018-ci ildən “Utro.az” saytı fəaliyyət göstərir. Baş redaktoru özüməm. İlkin olaraq bu, yalnız onlayn fəaliyyət göstərirdi. Sonralar saytın çap variantı barədə düşündük. Sözün düzü, istəyirdim ki, qəzet formatında olsun. Ancaq ölkədəki qəzet bolluğunu, rəqabəti nəzərə alaraq, jurnal nəşr etmək qərarına gəldik”.
Bu fikirləri “Bakı-Xəbər”ə yeni nəşrə başlayan rusdilli “Utro” jurnalının baş redaktoru Habil Ağazadə (Şakiroğlu) bildirib.
H.Ağazadə qeyd etdi ki, jurnal 2021-ci ildə iki dildə dövlət qeydiyyatından keçib, amma bir dildə nəşr olunur, ayda bir dəfə işıq üzü görəcək: “Xoşbəxtlikdən, jurnalın ilk sayının nəşri ulu öndər Heydər Əliyevin 100 illiyinə təsadüf etdi. Həm biz, həm də müəlliflər bunu böyük məmnuniyyətlə qarşıladıq. Oxucuların da bundan şad olacağına inanırıq. Bildiyiniz kimi, mayın 11-də İrşad oteldə jurnalın böyük təqdimat mərasimi keçirildi. Mərasimdə bir çox tanınmış şəxslər, millət vəkilləri Novruz Aslan, Ceyhun Məmmədov, Mixail Zabelin, Rusiyanın ölkəmizdəki fövqəladə və səlahiyyətli səfiri Mixail Boçarnikov, Belarusun Azərbaycandakı fövqaladə və səlahiyyətli səfiri Andrey Ravkov və başqa nüfuzlu simalar iştirak etdi.
İnanıram ki, jurnal çox böyük uğurla öz fəaliyyətinə davam edəcək. Jurnalın rus dilində nəşr edilməsində məqsədimiz Azərbaycanın haqq səsini beynəlxalq arenaya çatdırmaqdır. Nəzərə alsaq ki, dünyada rusdilli kütlə çox genişdir, Azərbaycanın haqq səsini, ədalətli mövqeyini beynəlxalq ictimiayyətə çatdırmaq üçün jurnalı rus dilində çap etmək qərarına gəldik. Fikrimcə, səsimizi daha çox insanın eşitməsi üçün bu vacib idi”.
H.Ağazadə əlavə etdi ki, hazırda bizə daha çox xaricə çıxmaq lazımdır və bütün dünya ayrı-ayrı dillərdə bizim səsimizi eşitməlidir.
İradə SARIYEVA
