Qərbi azərbaycanmlılar tarixi vətənlərindən zorla qovulduqdan sonra hayların saxtalaşdırma işini genişləndirmək üçün əl-qolları tamamilə açıldı. Əllərinə düşən fürsətdən yararlanaraq hər cür saxtalaşdırma işlərinə baş vururlar.
Çox təəssüflər olsun ki, saxtakarlıq və uydurmalarına xarici alimləri də şərik etməkdədirlər. Son illər Hayastan rəhbərliyi tez-tez müxtəlif xarici ölkələrdən arxeoloq qrupları dəvət edir ki, gəlib orada arxeoloji qazıntılar aparsınlar. Təbii ki, haylar xarici arxeoloqlara bu ərazinin qədim yerli sakinləri barədə məlumat vermirlər və özlərini “aborigen” kimi qələmə vermək üçün dəridən-qabıqdan çıxırlar. Təəssüf ki, xaricdən gələnlər də onların yalanlarına asanlıqla uyur.
İndi də erməni mediası yazır ki, polşalı arxeoloqlar Ermənistanda 3000 illik “çörək sobası” aşkar ediblər. Qeyd edirlər ki, Ermənistanda böyük binanın xarabalıqlarını qazarkən arxeoloqlar qeyri-adi bir məhlul müşahidə ediblər. İddia edirlər ki, guya Metsamor arxeoloji sahəsindəki arxeoloqlar bir neçə “çörək sobası” aşkar ediblər ki, bu da xarabalıqlar arasında böyük binanı xatırladıb.
Qazıntıların aparıcı arxeoloqu Kşiştof Yakubiak Polşada “Science” nəşrinə bildirib ki, materialı, məhlulu təhlil etdikdən sonra tədqiqatçılar bunun əslində qədim un olduğunu başa düşdülər. Arxeoloji ərazilərdə nadir hallarda tapılan unun xarabalıqlarda “bir neçə kisə tapıldığı” iddia edilib. “Qeyri-adi tapıntı arxeoloqlara dağılmış binanın 3000 illik böyük çörək sobası (zavodu) olduğunu müəyyən etməyə imkan verdi”- erməni saxtakarlığına uyan polyak arxeoloq deyib.
Ekspertlər iddia ediblər ki, guya “bu sobadan eramızdan əvvəl XI əsrin sonundan eramızdan əvvəl IX əsrin əvvəllərinə qədər istifadə edilib”.
Arxeoloqların fikrincə, sözüdedən şəhər eramızdan əvvəl IV minillikdən XVII əsrə qədər davamlı olaraq məskunlaşıb. Guya Metsamorun ən qədim hissəsində - nekropol və ya qəbiristanlığı olan divarlı yaşayış məntəqəsində qazıntılar zamanı 100-ə yaxın şəxsin dəfn edildiyi “məlum” olub.
Arxeolqlar deyiblər ki, guya “Metsamor eramızdan əvvəl VIII əsrdə fəth edilib və Urartu krallığının bir hissəsi olub”.
Qeyd edirlər ki, Metsamorun qazıntıları 1965-ci ildə başlayıb və hələ də davam edir. “Miami Herald”-ın məlumatına görə, Polşa-Ermənistan birgə qazıntıları 2013-cü ildə başlayıb.
Erməni saxtakarlığına uyan və erməni lobbisinin əlində oyuncağa çevrilən polşalı arxeoloqların iddia etdiklərinə şərh verən alimlərin sözlərinə görə, erməni mediası yenə də təhriflə məşğul olur.
“Onlar muzdlu arxeoloqları əllərində oyuncağa çeviriblər”
AMEA-nın A.Bakıxanov adına Tarix İnstitutunun əməkdaşı Faiq İsmayılov “Bakı-Xəbər”ə bildirdi ki, polşalı arxeoloqların indiki Hayastanda arxeoloji qazıntılar aparması birbaşa erməni saxtakarlığına dəstək verməkdir. “Söhbət təkcə polyak arxeoloqlarından getmir, ermənilər ümumiyyətlə ABŞ-dan, Fransadan, Rusiyadan arxeoloqlar cəlb edirlər. Arxeoloqlar ora pulsuz gəlmir. Onlar xariciləri, o cümlədən də polyak arxeoloqlarını pul müqabilində prosesə cəlb edirlər, onlar da ermənilərin xeyrinə işləyirlər. Onlar muzdlu arxeoloqları əllərində oyuncağa çeviriblər. Deyim ki, Metsamorun yerləşdiyi ərazi Göyçə gölü hövzəsidir. Bu ərazi də qədim Azərbaycan türklərinin torpaqlarıdır”-deyə bildirən F.İsmayılovun sözlərinə görə, ermənilər yalnız indiki Hayastanda deyil, vaxtilə işğal etdikləri Ağdam ərazisində də xarici arxeoloqların iştirakı ilə “Tiqranakert” axtarıblar. “Xarici alimlər uzun illər Ağdamın Şahbulaq qalasında qanunsuz arxeoloji qazıntılar apardılar. Onlar muzdlu arxeoloqlardan istrifadə ediblər, indi də edirlər. 10-a yaxın xarici ölkədən ora arxeoloqlar cəlb etmişdilər. 3 min il yaşı olduğu iddia edilən “çörək soba”sı məsələsinə gəlincə, o çağda çörək sobasından istifadə edilirdimi? Sobada çörək bişirilməsinə nə zaman başlanılıb? Əvvəllər çörək başqa vasitələrlə bişirilərdi. 3 min il yaşlı “çörək soba”sı aşkarlanmasına inanmıram, çünki çörək sobası “gənc” bir qurğudur. Ona görə də, polyak arxeoloqlarının ermənisayağı davranışları pul müqabilində edilən saxtakarlıqdan başqa bir şey deyil. Elmi əsası olmayan fikirin heç bir mənası yoxdur, bu, cəfəngiyyatdan başqa bir şey deyil. Bu gün Qərbi Azərbaycandakı irsimizə haylar nə qədər sahib çıxmaq istəsələr də, biz sübut edirik ki, bu maddi irsin, mədəniyyətin ermənilərə heç bir aidiyyəti yoxdur. Bunlar Azərbaycan türklərinin irsidir”-deyə F.İsmayılov vurğuladı.
İradə SARIYEVA
