Mayın 14-də Brüsseldə Mişel, Əliyev və Paşinyan arasında görüşün keçirildiyi vaxt Rusiya prezidentinin mətbuat katibi Dmitri Peskov yerli televiziyaya müsahibəsində növbəti dəfə üçtərəfli sazişin Bakı ilə İrəvan arasında nizamlanma üçün mübahisəsiz əsas olaraq qaldığını bəyan edib:
“Əlbəttə, müəyyən həssas məqamlar var. Bilirsiniz, Rusiya iki il əvvəl imzalanmış o üçtərəfli sənədlərə tam riayət edir. Biz onların hələ də həll üçün mübahisəsiz əsas olduğunu əsas götürürük. Razılaşmaya nail olmaq üçün isə əldə edilmiş razılaşmaların yerinə yetirilməsi yolu ilə getmək lazımdır. Rusiya-Ermənistan-Azərbaycan üçtərəfli sazişlərinin həyata keçirilməsi Cənubi Qafqazda nizamlanmanın əldə olunmasına imkan verəcək. İmzalanmış sənədlər vəziyyətin həlli üçün əsasdır və alternativi yoxdur”.
Maraqlıdır, D.Peskov niyə eyni mövqeyi qısa müddətdə israrla təkrar-təkrar bəyan edir? Belə mövqe sərgiləməkdə Kremlin məqsədi nədir?
“Peskovun timsalında Kreml bu məsələləri təkrar-təkrar dilə gətirməklə, tərəflərə mesaj verir”
Sözügedən məsələni “Bakı-Xəbər”ə şərh edən siyasi şərhçi Azər Həsrət bununla bağlı bir sıra məqamlara aydınlıq gətirdi: “Bütün bunlar onu göstərir ki, Rusiyanın Qarabağla bağlı siyasəti dəyişməyib. Yenə də Azərbaycanla Ermənistan arasında Qərbin birbaşa təşəbbüsü və iştirakı ilə təmaslar oldu. Təmaslar olunca da Rusiya narahat olmağa başladı. Yəni Kreml Rusiyanın iştirakı olmadan Azərbaycan və Ermənistanın bir araya gəlməsinin əngəllənməsi yolunu tutub. Bu, hər zaman belə olub. Üçtərəfli razılaşmaya gəldikdə isə, buna hamıdan çox Rusiya özü əməl etmir. Problem ondadır ki, Azərbaycan ərazisində yerləşdirilən rus sülhməramlıları üzərlərinə düşən vəzifələri icra etmirlər. Çünki Rusiya bunu istəmir. Ona görə də sözügedən məsələnin birdəfəlik həlli uzanır. Bütün bunlar isə o deməkdir ki, burada problem yaradan bir nömrəli dövlət Rusiyadır. İkinci bir tərəfdən, Peskovun timsalında Kreml bu məsələləri təkrar-təkrar dilə gətirməklə tərəflərə mesaj verir. Yəni bunu unutmayın ha! Rusiyanı nə Azərbaycan, nə də Erçmənistan unutmayıb. Sadəcə, biz onlara xatırladırıq ki, bu dünyada Rusiyadan başqa da alternativlər var. Yəni bizim seçə biləcəyimiz daha uyğun alternativlər var. Özü də bu, bir yox, bir neçədir. Moskvaya anlatmağa çalışırıq ki, normal qonşuluq münasibətləri çərçivəsində yaşamaq lazımdır. Yoxsa burada münaqişəni alovlandırmaq, qızışdırmaq, xalqları bir-birinə düşmən etmək çıxış yolu deyil. Bütün bunlarla Rusiya bizi küncə sıxışdırmaq istəyir. O üzdən, tez-tez üçtərəfli 10 noyabr Bəyanatını xatırladır. Onsuz da Azərbaycan üçtərəfli razılaşmadan irəli gələn məsələləri icra edir. Rusiya da, Ermənistan da buyursun eləsin. Bəlkə də Ermənistan etmək istəyir, amma Rusiya qoymur, daha dəqiq desək, buna imkan vermir. Bax budur əsas problem. Ona görə də, Rusiya rəsmiləri üçtərəfli razılaşmanı ard-arda xatırlamaqdansa, dönüb bir özlərinə baxsınlar. Yəni Rusiya öz öhdəliklərini yerinə yetirirmi?”
Vidadi ORDAHALLI
