Rusiya mediası “ənənə”sinə sadiq qalaraq yenə də Ermənistanın tərəfini tutmaqda davam edir. Baxmayaraq ki, Azərbaycan və Rusiya arasında informasiya təhlükəsizliyinə dair sənəd imzalanıb, amma rus mediası ermənipərəstlikdən əl çəkmək istəmir.
Mayın 11-də Ermənistanın qəsdən törətdiyi sərhəd təxribatı ilə bağlı da eyni mövqe sərgiləyir. Azərbaycan Xarici İşlər Nazirliyinin (XİN) Ermənistanın törətdiyi sərhəd təxribatı zamanı verdiyi "...Ermənistanın danışıqlar prosesinə xələl gətirən bu kimi əməlləri ciddi formada beynəlxalq ictimaiyyət tərəfindən rədd edilməli və qınanmalıdır. Ermənistanın təxribatlarının qarşısını almaq məqsədilə Azərbaycan Respublikasının Silahlı Qüvvələri bütün lazımı tədbirləri görür. Vəziyyətin qəsdən gərginləşdirilməsinə görə bütün məsuliyyət Ermənistanın hərbi-siyasi rəhbərliyinin üzərinə düşür” bəyanatı, nədənsə, Rusiya mediasının yadına düşməyib və onlar burada Ermənistanı “sülhpərvər” kimi qələmə verməyə çalışıblar. Azərbaycan XİN-in bəyanatını gözardı edib Ermənsitan XİN-in təxribatçı, uydurma bəyanatını yayıblar.
Ermənistan XİN-in yaydığı bəyanatı həvəslə tirajlayıblar ki, bu üzdəniraq bəyanatda da Azərbaycana qarşı əsassız olaraq “Soçidə üzərinə götürdüyü öhdəliklərə hörmətsizlik nümayiş etdirir” kimi iddia irəli sürülüb.
Guya ki, Azərbaycan Silahlı Qüvvələri “yenidən təxribatçı və təcavüzkar hərəkətlərə keçərək, Ermənistanın suveren ərazisini minaatanlardan və artilleriya sistemlərindən atəşə tutub”. Rusiya mediası yazıb bunları. Unudub ki, təxribatı Ermənistan tərəfi törədib və məqsədləri də sülh danışıqlarını pozmaq olub.
Məlum, son sərhəd təxribatı baş verəndə Ermənistandan əvvəl Azərbaycan bəyanat verdi, Ermənistanı sülh danışıqlarını pozmamağa çağırdı. Amma göründüyü kimi, Rusiya mətbuatı bizim XİN-in bəyanatına qətiyyən toxunmur, amma Ermənistanın saxta, məkrli bəyanatını təbliğ edir və bildirir ki, guya Ermənistan Azərbaycana “sülh danışıqlarını pozmağı dayandır” müraciətini edib. Əslində isə, Azərbaycan XİN-in yaydığı bəyanatda Ermənistana xitabən bu çağırış əks olunub.
Rusiya mediası sərhəddə 11 may təxribatları barədə erməni XİN-in uydurma bəyanatına niyə uydu, niyə inandı?
“...İki ölkə arasında problemlərin tam həllində maraqlı deyil”
Beynəlxalq Münasibətlərin Təhlili Mərkəzinin aparıcı məsləhətçisi, siyasi elmlər üzrə fəlsəfə doktoru Mətin Məmmədli “Bakı-Xəbər”ə şərhində “Rusiya mediasının belə qərəzli, tərəfkeş, ermənipərəst mövqe nümayiş etdirməsi, təəssüf ki, yeni hal deyil. Əvvəlki dövrlərdə də rus mediası bu cür mövqe tutub. Onlar həmişə Ermənistanın mövqeyinə yer veriblər. Bu dəfə də Rusiya mediası daha çox Ermənistan tərəfindən, Ermənistan XİN-in bəyanatına istinad edib. Bu da bir daha Rusiyanın Ermənistanla Azərbaycan arasında problemlərə (post müharibə problemlərinə) yanaşmasını dolayı şəkildə ifadə edir. Təbii ki, Ermənistan Rusiyanın regionda hərbi-siyasi müttəfiqidir. Müttəfiqlik davam edir. Hesab edirəm ki, Rusiya iki ölkə arasında problemlərin tam həllində maraqlı deyil”-deyə bildirdi.
M.Məmmədlinin sözlərinə görə, Rusiyanın belə bir mövqe nümayiş etdirməsi həm də bu məqamla bağlıdır. “Nəticədə belə bir mövqe iki ölkə arasında sülh prosesinə də neqativ təsir göstərir”-deyə M.Məmmədli qeyd etdi.
Əli TURABOV
