Ermənistanın birinci prezidenti Levon Ter-Petrosyanın baş müşaviri olmuş və 1991-1997-ci illərdə Qarabağ üzrə danışıqlar aparan Jirayr Liparityan İctimai Televiziya müsahibəsində diqqəti çəkən məqamlara toxunub.
O, Bakının İrəvandan Qarabağı Azərbaycanın bir hissəsi kimi tanınması tələbini şərh edib və qeyd edib ki, yeni müharibə olarsa, o zaman Ermənistan daha böyük itkiyə məruz qalacaq: “Bizim buna müqavimət göstərmək imkanımız varmı? Nə üçün əldə edə bilməyəcəyimiz bir şeyi tələb edirik? Əgər biz 2020-ci ilin yayında o vaxt masada olan plana razılaşsaydıq, daha az itirərdik”.
Sabiq baş müşavirin fikrincə, Ermənistan rəhbərliyi yeni razılaşma zamanı çox şey itirəcəyi məntiqini rəhbər tutarsa, yeni müharibə nəticəsində imzalaya biləcəyi sənəddən daha çoxunu itirəcək: “Əgər biz sənədi imzalasaq, başqa heç nəyin baş verməmək ehtimalı ən azı 20 faiz olacaq. Bizim bu şansı itirmək və 100% yeni müharibəyə doğru irəliləmək haqqımız yoxdur. Qarabağ bizim deyil ki, onu təslim edək. Biz artıq Qarabağı itirmişik. Müharibə nəticəsində biz Qarabağ məsələsi ilə bağlı nəsə demək imkanını itirdik”.
Məsələni baki-xebar.com-a şərh edən politoloq Tural İsmayılovun fikrincə, sabiq müşavirin səsləndirdiyi fikirlər reallığı əks etdirir: “Ümumiyyətlə, Jirayr Liparityan son dövrlər Azərbaycanın ərazi bütövlüyü ilə bağlı kifayət qədər aydın mövqe ortaya qoyur. Daha əvvəl Ter-Petrosyanın hakimiyyəti dövründə rəhbər vəzifədə çalışarkən ənənəvi erməni xislətinə xas olan açıqlamalar versə də, son illər daha praqmatik mövqe sərgiləyir. Azərbaycanın ərazi bütövlüyü məsələsində ölkəmizin prinsipial mövqeyini nəzərə alır. Bu baxımdan Jirayr Liparityanın verdiyi açıqlamalar fərqlənir. O, yaxşı bilir ki, Ermənistan hazırkı situasiyada müharibəyə getsə, itirən tərəf olacaq. Bununla Liparityan reallığı əks etdirən mövqe ortaya qoyur. Eyni zamanda, Azərbaycanla Ermənistan arasında sülh sazişinin imzalanmasında gecikmələr baş verdikcə, bundan itirən Ermənistan olur. Sülh müqaviləsi nə qədər gecikirsə, bir o qədər Ermənistan öz inkişafını yubadır. Təcrübəli və ağıllı siyasətçi olaraq Liparityan yaxşı bilir ki, Türkiyə və Azərbaycanla normal münasibətlər qurulmadan Ermənistanın gələcəyi yoxdur. Bu səbəbdən erməniləri kompromislərə çağırır. Ona görə də, Azərbaycanla Ermənistan arasında sülh sazişinin imzalanması mühüm məsələlərdən biri olmalıdır. Sülh sazişinin imzalanmaması vəziyyətin gərgin olmasına, Azərbaycanla Ermənistan arasında toqquşmaların artmasına rəvac verir. Bu toqquşmalarda da ən böyük günahkar əlbəttə ki, Ermənistandır. Ermənistan müxtəlif xarici qüvvələrin əlində oyuncaqdır. Bu üzdən, ermənilərdən Azərbaycana qarşı bir təzyiq elementi kimi istifadə etmək cəhdləri çoxdur. Bu baxımdan artıq Qarabağın Ermənistanın ictimai-siyasi həyatı və tarixi düşüncə şüuruna heç bir aidiyyatı olmamağı ilə bağlı mövqelər erməni ictimai rəyində daha da güclənəcək”.
Vidadi ORDAHALLI
