ABŞ Dövlət Departamentinin sözçüsü Vedant Patel brifinq zamanı deyib ki, ölkəsi Paşinyan və Əliyev arasında gözlənilən görüşdə sərhəddən qoşunların geri çəkilməsi məsələsini müzakirə etməyə çağırıb:
"Bu cür zorakılıq Ermənistan və Azərbaycanın davamlı və ləyaqətli sülhə doğru əldə etdiyi irəliləyişə xələl gətirir".
Onun sözlərinə görə, Birləşmiş Ştatlar iki ölkənin başçılarını mayın 14-də Brüsseldə silahlı qüvvələrinin sərhəddən çıxarılmasını müzakirə etməyə və razılığa gəlməyə çağırır.
Patel qeyd edib ki, bu məsələ mayın əvvəlində ABŞ-ın dövlət katibi Entoni Blinkenin iştirakı ilə Vaşinqtonda danışıqlar zamanı müzakirə edilib.
ABŞ-ın bu mövqeyi anlaşılan deyil. Azərbaycan niyə sərhəddən qoşunlarını geri çəkməlidir?
Hərbi-siyasi ekspert, ehtiyatda olan polkovnik-leytenant Daşdəmir Əliyev “Bakı-Xəbər”ə açıqlamasında bildirdi ki, atəşkəs haqqında əldə olunmuş razılaşmaya baxmayaraq, Ermənistan silahlı qüvvələri sərhəddə təxribatlarını davam etdirir. Nəticədə Azərbaycan Ordusunun hərbi qulluqçuları şəhid olub. Prezident İlham Əliyev Azərbaycan Respublikası ilə Ermənistan Respublikası arasında dövlət sərhədinin delimitasiyası üzrə Dövlət Komissiyasının yaradılması haqqında sərəncam imzalayıb. Biz hər zaman sərhədlərin dəqiqləşməsində maraqlıyıq. Ancaq Ermənistan bunu sabotaj edir. Diqqətçəkən məqam odur ki, əvvəlki dövrdə Ermənistan Rusiyaya arxalanır və işğalçılıq siyasətini davam etdirirdisə, son hadisələr artıq bu ölkənin oriyentrlərini dəyişdiyini və açıq şəkildə Qərbdə dəstək axtardığını göstərməkdədir. NATO-nu bölgəyə gətirməyi və öz revanşist məqsədlərini Qərbin əli ilə reallaşdırmağı düşünür.
Ermənistan çalışır ki, kənar beynəlxalq gücləri, ələlxüsus da Rusiyadan başqa qüvvələri Azərbaycanla sərhədə cəlb etsin. Azərbaycan Ermənistanın bu siyasəti ilə barışmır və ermənilərin təxribatlarını cavabsız qoymur. Hər dəfə Azərbaycandan ciddi zərbə alan erməni tərəfi sərhədə beynəlxalq gücləri yerləşdirmək istəyir. Kənar qüvvələrin arxasına sığınaraq öz məkirli siyasətlərini davam etdirməyə çalışırlar. Ermənilərin bu məqsədi çox aydın görünür. Ancaq Azərbaycanın icazəsi olmadan, sərhəd zonalarda hansısa ölkənin təmsilçilərinin yerləşməsi qanunlarımıza ziddir. İlk növbədə ona görə ki, hələ Azərbaycan və Ermənistan arasında müəyyənləşmiş, dəqiqləşmiş sərhəd yoxdur. ABŞ-ın marağı sərhəddə öz nəzarətlərini bərpa etməklə bağlıdır. Azərbaycan nəinki sərhəddən qoşunu geri çəkməlidir, əksinə, orada daha da möhkəmlənməlidir”.
Məhəmmədəli QƏRİBLİ
