Molla rejimi Azərbaycanın tarixi şəxsiyyətlərinə, ictimai-siyasi, dövlət, mədəniyyət xadimlərinə qarşı qaralama kampaniyasını davam etdirir.
Müxtəlif sosial şəbəkə platformaları üzərindən yaratdığı Azərbaycandilli seqmentlər vasitəsilə anti-Azərbaycan davranışları sərgiləyən Tehran rejimi Azərbaycan tarixi, dövlət xadimləri, ərazilərimiz və sairlə bağlı dövriyyəyə ağlasığmaz yalan, saxta məlumatlar buraxıb. "Azərbaycan tarixi" adı verdikləri və tariximizi saxtalaşdırmaq yolunu tutan teleqram kanalında hər cür yalan informasiya ilə rastlaşmaq olar. Birmənalı şəkildə molla rejiminin anti-Azərbaycan təbliğatını həyata keçirən kanalda rəsmi Tehrana "bəy tərifi" deyilir.
İranpərəst teleqram kanalı olan "Azərbaycan tarixi" ndə tariximizi qaralamaqla məşğul olanlar qondarma bir iddia da ortaya atıblar. İddia edirlər ki, "Bir kərə yüksələn bayraq bir daha enməz" ifadəsi Azərbaycan Xalq Cümhuriyyətinin banisi Məhəmməd Əmin Rəsulzadəyə yox, Rus çarı Nikolay I Pavloviçə məxsusdur.
Qeyd edirlər ki, Nikolay I Pavloviç (1796 - 1855) 1825-1855-ci illərdə Rusiya İmperatoru olub. O, I Aleksandrın qardaşı, II Aleksandrın atası, l Paulun oğludur.
Guya Rəsulzadədən əvvəl o, "Odnajdı podnətıy russkiy flaq spuskaem bıtğ ne doljen" ifadəsini işlədib.
"Əlbəttə, bu kəlamın müəllifi Rəsulzadədir..."
AMEA-nın Fəlsəfə və Sosiologiya İnstitutunun aparıcı elmi işçisi, fəlsəfə doktoru, BAO sədrinin müavini, siyasi şərhçi Faiq Ələkbərli "Bakı-Xəbər" ə şərhində bildirdi ki, İran adlanan ölkənin şovinistlərinin, fars molla rejiminin təbliğatçılarının Azərbaycan xalqının tarixinə, onun şəxsiyyətlərinə, dövlət xadimlərinə qarşı təxribatlarını normal qarşılamaq lazımdır: "Molla rejimi yaxşı bilir ki, bu bölgədə, hazırda İran adlanan ölkənin ərazisində də ən böyük dövlətləri Azərbaycan türkləri qurub. Əlbəttə, biz yenə də böyük dövlətimizi bərpa edəcəyik...
Təhrif kampaniyası da Tehranın narahatlığının, əndişəsinin göstəricisidir. Bu onların əndişəsinin nəticəsidir ki, Azərbaycan xalqının tarixini saxtalaşdırmağa çalışırlar, müxtəlif vasitələrlə tarixi şəxsiyyətlərimizə iftiralar atırlar.
Molla rejiminin əlaltıları tərəfindən Azərbaycan Xalq Cümhuriyyətinin qurucusu Məhəmməd Əmin Rəsulzadənin məşhur kəlamının başqa birinin adına çıxılması, fikrin təhrif olunması yolverilməzdir. Əslində, bu rejimdən gözləniləndir və burada qeyri-adi bir hal yoxdur, sırf mollalara xas üsuldur. Əlbəttə, bu kəlamın müəllifi Rəsulzadədir, orijinallığı ona aiddir. "Bir kərə yüksələn bayraq bir daha enməz" fikri dəqiq ifadə olunmuş, mahiyyəti, məzmunu olan fikirdir. Məhəmməd Əmin Rəsulzadədən əvvəl də bayraqla bağlı hansısa fikri rus çarı, fransız kralı, ingilis kralı başqa formalarda ifadə edə bilər, burda qeyri-adilik yoxdur. Məsələn, rus çarı deyir ki, harda bir rus bayrağı dalğalanırsa onu bir daha enməyə qoymamaq lazımdır. Yəni tarixə baxanda bu kimi fikirlərə rast gəlmək olur. Bayraqla bağlı Səlcuqlular, Xarəzmşahlar, Səfəvilər, Osmanlılar, Teymurilər, Çingizxanlar və başqaları tərəfindən ifadə olunmuş çoxlu fikirlər var.
Ancaq burada söhbət fikrin dəqiqliyindən və konkretliyindən gedir. Yəni hər hansısa bir şəhərdə, qalada, gəmidə və s. bayraq dalğalanırsa, istənilən sərkərdə, dövlət başçısı göstəriş verir ki, bu bayrağı enməyə qoymaq olmaz. Bu başqa məsələdir".
F.Ələkbərlinin sözlərinə görə, ancaq Rəsulzadənin ifadə etdiyi bu fikir birbaşa dövlət və dövlətçiliklə bağlıdır. O vurğuladı ki, burada söhbət konkret olaraq Azərbaycan Xalq Cümhuriyyətinin, Azərbaycan dövlətinin müstəqilliyinin qorunmasından və bayrağının endirilməməsindən gedir. "Yəni dövlət qurulub, dövlətin bayrağı qaldırılıbsa o heç bir şəkildə endirilməz. Bu daha çox rəmzi və simvolik məna daşıyır. Zamanla problem yaşamışıq, müstəqilliyimiz qəsb edilib, amma yenidən Azərbaycan Respublikasının müstəqilliyi bərpa olunub və bayrağımız ucaldılıb. İnsanlar o bayrağın ardınca gedib o bayrağı göylərə çəkdilər, ucaltdılar. Bu baxımdan, ariyançı şovinist qrupların təxribatları, tərifləri heç nəyi dəyişməyəcək. Əslində bunları narahat edən Məhəmməd Əmin Rəsulzadənin bu fikrinin uzaq olmayan bir zamanda Təbrizdə, Urmuda, Ərdəbildə, Zəncanda və başqa Azərbaycan şəhərlərində səsləndirilməsi və üç rəngli bayrağımızın dalğalanmasıdır. Bundan əndişə edirlər. Molla rejimi Məhəmməd Əmin Rəsulzadənin "Bir kərə yüksələn bayraq bir daha enməz" fikrini təhrif edib hansısa rus çarının adına çıxmaqla özlərinə təsəlli vermək istəyir. Unudurlar ki, Rəsulzadənin bu fikri sırf dövlətçiliklə bağlıdır".
F.Ələkbərli bildirdi ki, bu baxımdan mollakratiyanın əndişəsi günü-gündən artır.
Əli TURABOV
