Şuşada Prezident İlham Əliyevin xalqa müraciəti, səsləndirdiyi fikirlər Azərbaycanın yeni müstəqiilik tarixinə bir baxış, eyni zamanda görülən işlərin hesabatı kimi dəyərləndirilir. Bu müraciət fonunda bir daha bəlli oldu ki, Azərbaycan ordusu ulu öndər Heydər Əliyevin, eləcə də xalqımızın əsas arzusunu yerinə yetirdi.
Məlumdur ki, Heydər Əliyev hakimiyyətdə təmsil olunsaydı, heç vaxt erməni millətçiləri Azərbaycan ərazilərini işğal edə bilməzdilər. Daim xalqın son ümidi olan bu dahi Azərbaycan övladı vəzifədən gedəndən sonra xalqımızın düşmənləri baş qaldırdı, torpaqlarımız işğal olundu. Amma elə Heydər Əliyevin əsasını qoyduğu ordu quruculuğu və ölkənin hərtərəfli inkişafı siyasətinin uğurla davam etdirilməsi 2020-ci ildə 44 günlük Vətən müharibəsi Azərbaycan tarixinə qızıl hərflərlə yazılan qələbənin əldə edilməsində başlıca rol oynadı. Müzəffər Ali Baş Komandanımız İlham Əliyevin rəhbərliyi ilə rəşadətli ordumuz düşməni darmadağın etdi. Beləliklə, torpaqlarımızın işğalına son qoyuldu. Xalqa müraciətində Prezident İlham Əliyev bu xüsusda qeyd edir: “Qarabağı azad görmək Heydər Əliyevin və bütün dünya azərbaycanlılarının əsas arzusu idi. Biz bu arzunu, Azərbaycan xalqının arzusunu yerinə yetirdik. 2020-ci il 8 noyabr tarixdə əbədi qalacaq. O gün mənə, bax, bu meydandan Şuşanın azadlığı ilə bağlı hərbi raport veriləndən sonra, bu binanın üstünə Bayrağımız qaldırılandan sonra atamın məzarını ziyarət etdim və ürəyimdə dedim ki, “Tapşırıq yerinə yetirildi. Məruzə edir Ali Baş Komandan İlham Əliyev!”. Ondan sonra Şəhidlər Xiyabanını ziyarət etdim, şəhidlərimizin ruhu qarşısında baş əydim, ürəyimdə dedim ki, qanınız yerdə qalmadı”. Dövlət başçısı Azərbaycanın inkişaf yolu ilə bağlı da mühüm mesajlar verdi. Qarabağ və Zəngəzurun bərpası missiyasını da uğurla icra edəcəyini bəyan edən ölkə başçısı Azərbaycan-Ermənistan sərhədində sərhəd-buraxılış məntəqəsini qurmaqla və orada üçrəngli bayrağımızı qaldırmaqla ərazi bütövlüyümüzün tam şəkildə bərpa olunduğunu bildirdi. Bununla yanaşı, mülki missiyamızı da şərəflə yerinə yetirəcəyimizi qeyd etdi. Ümumiyyətlə, Heydər Əliyevin quruculuq işlərini Prezident İlham Əliyevin böyük uğurla davam etdirməsi işğaldan azad edilmiş torpaqlarda görülən işlərdə də öz əksini tapır. 30 ilə yaxın dövrdə düşmən tərəfindən tamamilə dağıdılmış Qarabağın və Şərqi Zəngəzurun qısa vaxt ərzində sürətlə cənnətə çevrilməsi çox şeydən xəbər verir. Bu bir daha sübut edir ki, dağıdıcılığı, vəhşiliyi həyat tərzi seçən Ermənistandan fərqli olaraq, Azərbaycan hər zaman quruculuğa, inkişafa hesablanan siyasət həyata keçirib: İşğaldan azad edilmiş ərazilərdə, o cümlədən Şuşada postmüharibə dövründə görülən işlər həm bizim qurucu xalq olduğumuzu, həm də bu torpaqların gerçək sahibləri olduğumuzu təsdiqləyir. Onu da qeyd edim ki, təkcə ötən bir neçə gün ərzində prezident İlham Əliyev tərəfindən Qarabağ və Şərqi Zəngəzurda 10 yaşayış məntəqəsinin təməlinin qoyulması, dövlət başçısının bir çox sosial, infrastruktur obyektlərinin açılışlarında iştirakı, layihələrin gedişatı ilə yerində tanışlıq və nəzarət tədbirlərinin aparılması da deyilənlərə növbəti sübutdur. Dövlət başçısının bəyan etdiyi kimi, bütün bu quruculuq işlərinin təməlində Azərbaycan xalqının maraqları dayanır.
Hazırda Qarabağ və Şərqi Zəngəzurun bərpası istiqamətində genişmiqyaslı işlər görülür. Bu prosesdə Birinci vitse-prezident Mehriban Əliyevanın rəhbərlik etdiyi Heydər Əliyev Fondu da böyük işlər görür. Həyata keçirilən yenidənqurma prosesində ölkəmizin hədəfi keyfiyyət və sürəti birləşdirməkdir. Azad edilmiş bəzi şəhərlərin baş planları artıq hazırdır. Şuşa şəhərinin baş planı onun möhtəşəm tarixi irsinin qorunması üzərində qurulub. Qarabağ bölgəsinin sənaye mərkəzinə çevriləcək Ağdamda on minlərlə sakin üçün nəzərdə tutulmuş tamamilə yeni şəhər inşa olunur. Ərazisi 200 hektar təşkil edən Ağdam Sənaye Parkı artıq fəaliyyət göstərir, sərmayədarlara və sahibkarlara açıqdır. Zəngilan şəhəri onun təbiətə inteqrasiyası və park şəhərinə çevrilməsi baxışı ilə inşa edilir. Minalardan təmizlənən ərazilərdə, ilk növbədə, zəruri infrastruktur qurulur. İşğaldan azad edilmiş ərazilərdə zəruri infrastruktur quruculuğu proqramı çərçivəsində beynəlxalq səviyyəli üç hava limanının inşasının da sosial-iqtisadi önəmi kifayət qədər böyükdür. İşğaldan azad olunmuş ərazilərdə reallaşdırılan bərpa proqramı çərçivəsində, həmçinin, üç onillik ərzində erməni vandalları tərəfindən dağıdılmış və yaxud təhqir edilmiş mədəni-dini abidələrimizə də, necə deyərlər, yeni həyat verilməsi nəzərdə tutulub və artıq bu istiqamətdə işlərə başlanıb. Şuşada Yuxarı Gövhər Ağa, Saatlı məscidlərinin bərpadan sonra açılışları bunun azsaylı nümunələrindən biridir. Xüsusən də Prezidentin ailəsi ilə birlikdə Yuxarı Gövhər Ağa məscidini ziyarət etməsi dövlət-din münasibətləri, dini abidələrin, adət-ənənələrimizin qorunub saxlanmasına yüksək diqqətin göstəricisidir. Mədəniyyət paytaxtımız Şuşada indiyədək çox böyük işlər görülüb və bərpa işləri yüksək tempdə davam etdirilir. Qarabağda həyat 30 ilə yaxın müddətdən sonra yenidən öz axarına qovuşur. Bütün azad edilmiş ərazilərin yaxın tezlikdə inkişaf ünvanı olaraq anılacağı artıq bütün dünyada qəbul edilir.
Samirə SƏFƏROVA
