Fransa Parlamenti Rusiyanın "Vaqner" özəl hərbi şirkətini terror təşkilatı kimi tanıyıb. Bu barədə keçirilən səsvermədə parlamentdə iştirak edən 331 deputatın hamısı layihənin lehinə səs verib.
Qətnamə, həmçinin, Avropa İttifaqını "Vaqner"i Aİ-nin terror təşkilatları siyahısına daxil etməyə çağırır.
Aİ artıq "Vaqner"ə qarşı bir sıra sanksiyalar tətbiq edib. 2022-ci ilin aprelində Aİ özəl hərbi şirkətin rəhbəri Yevgeni Priqojini Ukraynadakı müharibə ilə bağlı sanksiya tətbiq edilən şəxslər siyahısına daxil edib, bu ilin aprelində isə "Vaqner" sanksiyaya məruz qalan qruplar siyahısına əlavə edilib.
“Vaqner” Rusiyanın leqal hesab etdiyi hərbi qüvvələrindən sayılırsa, bu qərarı necə şərh etmək olar və bunun hansı nəticələri ola bilər? Ən əsası, Fransa parlamenti nə əcəb ASALA və onun etdiyi cinayətləri əbədiləşdirən Ermənistan hökümətinə qarşı belə addımlar atmır?
Hərbi-siyasi ekspert Emin Həsənli “Bakı-Xəbər”ə açıqlamasında bildirdi ki, Qərb və ABŞ Rusiya-Ukrayna müharibəsinin hər sahədə davam etməsini istəyir: “Həm hərbi, həm də siyasi sahədə bunun uzadılmasının şahidi oluruq. Bunu uzatmaqla Rusiyanı tam diz çökdürmək istəyirlər. Sovet İttifaqının dağılmağında Əfqanıstanın oynadığı rol nə olubsa, Rusiya üçün də bunu Ukrayna oynayır. Prosesi uzatmaqla həm də Rusiyanın parçalanmasına nail olmaq istəyirlər. Rusiyanı istədilər Suriyada belə bataqlığa salsınlar, alınmadı. Ukraynada buna nail ola biliblər. Məqsəd aydındır. Avrasiyanın ən böyük dövləti olan Rusiyanı üzücü müharibəyə sövq etməklə, özlərinə ram etmək. Bu, olduqca amansız mübarizədir. Qərb və ABŞ Ukraynaya kifayət qədər maddi və mənəvi dəstək olur. Bu müharibənin bir tərəfi də budur ki, Rusiyanın üzdə olan adamlarını arzuolunmaz elan edirlər. Onları sanksiya altına salırlar. Belə sanksiyaları Rusiyanın banklarına və şirkətlərinə də tətbiq edirlər. İndi də bu ölkənin ayrı-ayrı birləşmələrini terrorçular siyahısına salırlar. Bu müharibədə Rusiya haqsızdır, başqasının ərazisinə soxulmamalıydı. Ancaq Rusiyanın da öz həqiqətləri var ki, Qərb Rusiyanın sərhədlərinə yaxınlaşıb. Rusiya həmin əraziləri özünün təhlükəsizlik zonası elan edib. Ukrayna müharibəsi hətta bəzi bitərəf ölkələri belə Rusiyaya qarşı qoya bildi. Əvvəl İraq və Suriyaya görə ABŞ-ın nüfuzu aşağı idi. Hazırda həmin vəziyyətə Rusiya düşüb. ABŞ-ı isə dünyanın təhlükəsizliyini düşünən bir ölkə kimi təqdim edirlər. Fransa zamanında Rusiyaya meyl edirdisə, hazırda ABŞ-ın təsir dairəsində qalmağı daha məqbul sayır. Ona görə də onların istəklərinə uyğun olan qərarları qəbul edir. Müharibənin uzadılması da ABŞ-ın planlarına uyğundur. Türkiyə tərəfləri barşdırmağa cəhd etsə də, buna nail ola bilmədi. Fransanın ermənilərə və onların terror mahiyyətinə loyallığı isə həmin ölkənin açıq şəkildə ermənipərəst olmasından qaynaqlanır. Bunu da biz gözəl bilirik”.
Qeyd edək ki, Britaniya hökuməti də yaxın həftələrdə "Vaqner" özəl hərbi şirkətini terror təşkilatı kimi tanımağa hazırlaşır. Bildirilib ki, Böyük Britaniya hakimiyyəti iki aydır Rusiyaya təzyiq göstərmək məqsədilə “Vaqner”i terror təşkilatları siyahısına salmaq üçün hüquqi əsaslar hazırlayır. “Vaqner”ə müvafiq statusun verilməsilə Böyük Britaniya təşkilata mənsub olmağı, onun təşkil etdiyi tədbirlərdə iştirakı, ona dəstəyi ifadə etməyi və ya onun simvollarını taxmağı cinayət sayır.
Bundan əlavə, silahlı qrupa qarşı maliyyə sanksiyaları tətbiq oluna bilər. Təşkilat üzvlərinə Britaniya məhkəmələrində jurnalistlərə və hüquq müdafiəçilərinə qarşı iddialar irəli sürmək qadağan edilə bilər.
Məhəmmədəli QƏRİBLİ
