Prezident İlham Əliyev Şuşada keçirilən “Böyük Avrasiya geosiyasətinin formalaşması: keçmişdən bu günə və gələcəyə” mövzusunda konfransda sualları cavablandırarkən bəyan etdi ki, Azərbaycan “Bir kəmər, bir yol” layihəsinin, xüsusilə indi mühüm hissəsi hesab olunur və Mərkəzi Asiya tərəfindən bizim infrastrukturumuzu istifadə etməyə böyük maraq var:
“Ötən ilin sonunda Çin, Qırğızıstan, Özbəkistan və Xəzər arasında yeni dəmir yolu əlaqəsinin qurulmasına başlanılıb. Bu layihə bir neçə il müzakirə mərhələsində idi. Buna artıq rəsmi olaraq başlanılıb və bu onu göstərir ki, əgər başlayıbsa, deməli işləyəcək. Mütləq daha çox yük daşınacaq. Hazırda biz Xəzərin şərq sahillərində və ümumiyyətlə Mərkəzi Asiyada tərəfdaşlarımızla birlikdə vahid tariflərin müəyyən olunması üzərində, bu yolun təkcə nəqliyyat təhlükəsizliyi baxımından deyil, həm də kommersiya baxımından əhəmiyyətli olması üzərində işləyirik və bu mümkündür”.
Görünən odur ki, Azərbaycan tərəfi Mərkəzi Asiya ölkələri ilə nəqliyyat sahəsində əlaqələrin genişləndirilməsində qərarlıdır.
“Bu baxımdan Prezidentin toxunduğu məsələlər, irəli sürdüyü prinsiplər mühüm əhəmiyyət kəsb edir”
Sözügedən məsələni “Bakı-Xəbər”ə şərh edən millət vəkili Vüqar Bayramov hesab edir ki, Azərbaycan həm nəqliyyat dəhlizlərinin, həm də beynəlxalq yükdaşımaların inkişafında maraqlı olan ölkədir: “Azərbaycan eyni zamanda Orta Dəhlizi regional olaraq yaxından dəstəkləyən ölkələrdən biridir. Çünki bu, bir tərəfdən region ölkələrinin gəlirlərinin artırılması baxımından vacibdir, digər tərəfdən regional ölkələr arasında əməkdaşlığın gücləndirilməsinə xidmət edir. Belə olan halda, təbii ki, “Bir kəmər, bir yol” lahiyəsinin əsas elementlərindən biri də məhz Orta Dəhlizdir. Ona görə də Azərbaycan əvvəldən sözügedən layihəyə töhfə verən ölkədir. Bu isə onu göstərir ki, bir tərəfdən infrastrukturun inkişaf etdirilməsi, digər tərəfdən elektron xidmətlərdən daha çox istifadə işlərin kömpleks şəkildə həyata keçirilməsini ortaya qoyur. Bütün bunların nəticəsində ölkəmiz üçün dövlət gəlirlərinin artması baxımından yeni imkanlar yaranacaq. Bu baxımdan nəqliyyat və logistika sahəsində aparılan siyasət Azərbaycanda iqtisadiyyatın diversifikasiyası, ölkəyə daha çox valyutanın daxil olması baxımından əhəmiyyətlidir. Bu, həm də Azərbaycanın geosiyasi mövqeyinin daha da güclənməsinə xidmət edir. Bununla yanaşı, Mərkəzi Asiya ölkələrinin sosial-iqtisadi inkişafına müsbət təkan verəcək. Söhbət Orta Asiya ölkələrindən gedir. Logistik imkanların şaxələndirilməsi sayəsində həm Orta Asiya ölkələrinin tranzit gəlirləri artacaq, həm də bu ölkələrə xarici sərmayə qoyuluşları üçün yeni imkanlar yaranacaq. Orta Asiyanın bəzi dövlətlərinin xarici sərmayələrə böyük ehtiyacı var. Bu baxımdan Prezident İlham Əliyevin toxunduğu məsələlər, irəli sürdüyü prinsiplər mühüm əhəmiyyət kəsb edir. Hesab edirəm ki, sadalanan məsələlərlə bağlı Mərkəzi Asiya ölkələri səylərini artırmalıdır”.
Vidadi ORDAHALLI
