Molla rejimi Azərbaycanla bağlı yanlış informasiyalar yaymaqda davam edir. Əlaltıları vasitəsilə tarixi həqiqəti təhrif edərək uydurmalar yayır.
Məsələn, “Azərbaycan tarixi” adlı Teleqram kanalında yayılan videoda iddia edilir ki, guya Azərbaycanın dövlət müstəqilliyini tanıyan ilk dövlət İran olub. İddia edilənə görə, guya Arif Yunus “ AZERBAЙDJAN V NAÇALE XXI VEKA: KONFLİKTI İ POTENÜİALĞNIE UQROZI “ kitabının 63-cü səhifəsində “hələ SSRİ dağılmamışdan əvvəl, 12 mart 1991-ci ildə İran Azərbaycanın müstəqilliyini tanıyan ilk dövlət oldu və prezident Ayaz Mütəllibov ilk rəsmi səfərini Tehrana etdi...” fikirləri yer alıb.
Doğrudanmı İran Azərbaycanın dövlət müstəqilliyini tanıyan ilk ölkə olub?
“İndi də durub iddia etmələri ki, Azərbaycanın dövlət müstəqilliyini tanıyan “ilk dövlət İran olub”, bu tamamilə ağ yalandır”
İddialara münasibət bildirən siyasi şərhçi Azər Həsrət “Bakı-Xəbər”ə bildirdi ki, İranın Azərbaycanın dövlət müstqəilliyini tanıyan ilk ölkə olduğu barədə iddia əsassızdır. Molla rejiminin daim bizə qarşı yalan siyasət yürütdüyünü deyən A.Həsrət hesab edir ki, teleqramda yerləşdirilən bu iddia da cəfəngiyatdır. “İranın belə bir yalan tirajlaması təəccüblü deyil. Ümumiyyətlə, molla rejiminin aldığı nəfəs belə yalandır. İran tərəfi həmişə Azərbaycanla bağlı öz yalanlarını tirajlayıb. Hətta onlar bir vaxtlar utanmadan iddia edirdilər ki, guya Birinci Qarabağ savaşı dönəmində İran Azərbaycana yardım edibmiş, SEPAH Azərbaycan əsgərlərinə təlim keçibmiş, onlar bizimlə çiyiun-çiyinə erməni işağlçılarına qarşı vuruşubmuşlar və sair. Yəni onlar utanmadan belə yalanlar yayırdılar. İndi də durub iddia etmələri ki, Azərbaycanın dövlət müstəqilliyini tanıyan “ilk dövlət İran olub”, bu tamamilə ağ yalandır. Hamı bilir ki, Azərbaycanın dövlət müstəqilliyini tanıyan ilk dövlət qardaş Türkiyə Cumhuriyyəti olub. Bu bir, ikinci bir tərəfdən də, İran faktiki olaraq günü bu gün də Azərbaycanın dövlət müstəqilliyini əməldə tanımır. Yəni onların bütün davranışları Azərbaycan respublikasının “İranın bir parçası olduğu” görüntüsü yaratmağa hesablanıb. Onlar hətta öz rəsmi təbliğatlarında Azərbaycan Respublikasına “İranın Şimalı” deyə xitab edirlər. Əlbəttə ki, belə bir zehniyyətin durub belə bir yalanla bizim beynimizi qarışdırması mümkün deyil”.
A.Həsrətin fikrincə, sadəcə Azərbaycanda bəzi kəsimlər bütün bunları bilərək, görərək yenə də İrana rəğbəti davam etdirir, sual doğuran da budur. A.Həsrətin sözlərinə görə, çox güman ki, İran o təbliğatı da məhz həmin qüvvələrə dəstək üçün ortaya atıb: “Yəni bir növ onların əlini gücləndirmək üçün bu yalanı ortaya atıblar. Burada da əsasən cahil kəsimə xitab edirlər ki, baxın, İran hətta Azərbaycanın dövlət müstəqilliyini tanıyan ilk dövlətdir”.
Qeyd edək ki, Azərbaycan Respublikasının müstəqilliyini ilk olaraq 1991-ci il noyabrın 9-da Türkiyə Cümhuriyyəti tanıyıb. Daha sonra Rumıniya (11 dekabr 1991), Pakistan (13 dekabr 1991), İsveçrə (23 dekabr 1991), İran (25 dekabr 1991), ABŞ (23 yanvar 1992), Rusiya (10 aprel 1992) ölkəmizi müstəqil dövlət kimi qəbul ediblər. 2 mart 1992 ci-ildə isə Azərbaycan BMT-yə üzv qəbul olunub. Gördüyümüz kimi, İran dövlət müstıqilliyimizi tanıyan 5-ci dövlət olub. Odur ki, molla rejiminin iddiaları yalandan başqa bir şey deyil.
Leyla QARAXANLI
