Erməni separatçıların təbliğatını apardığı mitinq Xankəndidə baş tutub və təyin edildiyi saatdan gec başlayıb. Səbəb aksiyaya çox az sayda adamın qatılması olub. Kadrlardan da görünür ki, aksiyada çox az adam iştirak edib.
Mitinqə marağın olmaması təşkilatçıları aksiyanı tez-tələsik yekunlaşdırmağa sövq edib. Beləliklə, vaxtından gec “başlayan” mitinq bir çıxışdan sonra bitib. Bu mitinq həm də Qarabağdakı mövcud reallıqları göstərmiş olub.
Bu mitinq Xankəndidə separatizmin dayaqlarının məhv olduğunun təsdiqləyən faktdır. Qeyd edək ki, bundan öncə separatçıların Xankəndidə keçirdiyi aksiyada 20 min civarında şəxsin iştirak etdiyini görüntüləyən video və fotolar yayılmışdı. Hələ o zaman iştirakçıların Ermənistandan gətirildiyi, mitinqə qatılan hər kəsə 50 dollar verildiyi, Xankəndi ətrafından gələnlərin isə maşınlarının yanacaqla da təmin edildiyi bildirilmişdi. Hazırda Laçın yoluna tam nəzarət edə bildiyimiz üçün Ermənistandan aksiyaya muzdlu iştirakçılar gətirmək mümkün olmur. Bununla separatçıların aksiyası və separatizmin əsl mahiyyəti bu cür üzə çıxmış olurmu?
Siyasi şərhçi Sahil Kərimli “Bakı-Xəbər”ə açıqlamasında bildirdi ki, erməni separatçılarının Xankəndidə keçirdiyi mitinqdə çox az sayda insanın iştirak etməsi əsl reallığı ortaya qoyur: “Görünən odur ki, separatçı rejimin Xankəndi və ətraf ərazilərdə yaşayan erməni əsilli Azərbaycan vətəndaşıarı arasında heç bir dayağı yoxdur. Bu onu göstərir ki, separatçılar artıq son nəfəsini yaşayır. Ötən ilin dekabrından başlayaraq azərbaycanlı ekofəalların Laçın yolunda keçirdiyi etiraz aksiyalarından sonra Qarabağda fəaliyət göstərən qanunsuz silahlı dəstələrə silah-sursat daşınmasının qarşısı alınıb. Bir neçə gün əvvəl Ermənistan - Azərbaycan sərhədində nəzarət buraxılış məntəqəsinin fəaliyətə başlaması isə ümumiyətlə separatçılara ağır zərbə oldu. Düşünürəm ki, bu reallıq separatçılar üçün son deməkdir. Azərbaycan dövləti addım-addım qarşıya qoyduğu hədəflərə doğru irəliləyir və ölkəmizin suverenliyi, ərazi bütövlüyü üçün təhdid yaradan istənilən cəhdin qarşısı qətiyətlə alınacaq.
Erməni mediası yazırdı ki, mitinq Qarabağda imzatoplamanın təşəbbüskarı olan gənclərin təşəbbüsü ilə baş tutacaq. Bu gənclərə Ermənistan parlamentinin İnsan hüquqları müdafiəsi komissiyasının sədri Taquhi Tovmasyan və digər şəxslər qoşulmuşdu. Qarabağda keçiriləcək mitinq 10 noyabr 2020-ci il tarixli üçtərəfli bəyannamənin yerinə yetirilməsi tələbi ilə baş tutub. Ermənilər bilməlidir ki, razılaşmanın tələblərini onların özləri pozur. Azərbaycan həmin tələbləri pillə-pillə yerinə yetirir. Belə təzyiq cəhdləri heç bir fayda verməyəcək. Əvvəllər belə üsullarla ermənilər dünyaya mesajlar verirdilər ki, güya Qarabağda gücdürlər. Artıq mitinqə adam da yığa bilmirlər. Bu həm də o anlama gəlir ki, sadə ermənilər mövcud reallıqları dərk etməyə başlayıblar. Bilirlər ki, Azərbaycanın yurisdiksiyasını qəbul etməkdən başqa şansları qalmayıb. Bu amil bir daha sübut edir ki, Ermənistanın Qarabağdakı proseslərə təsir etmə imkanları get-gedə heçə enir. Ermənistanın proseslərə başqa müdaxilə imkanları da qalmayıb. Yəqin ki, növbəti biabırçılığı yaşamamaq üçün ermənilər bir daha Qarabağda aksiya keçirməyə cəhd göstərməz”.
Məhəmmədəli QƏRİBLİ
