“Ermənistanla Azərbaycan arasında sərhədin demarkasiyası prosesində kəndlər məsələsi qaçılmaz olaraq öz həllini tapmalıdır”. Bunu Avropa İttifaqının Cənubi Qafqaz üzrə xüsusi nümayəndəsi Toivo Klaar Ermənistanın İctimai Televiziyasına müsahibəsində deyib.
T.Klaar qeyd edib ki, sözügedən məsələlərlə bağlı həll yolunun tapılması asan olmalıdır: “Əminəm ki, Ermənistandan keçməklə Azərbaycanın qərb hissəsi ilə Naxçıvan arasında tranzit əlaqələrinin razılaşdırılması məsələsində irəli getmək kifayət qədər asandır və ya asan olmalıdır. Düşünürəm ki, bu, bütün iştirakçı tərəflər üçün maraqlı vəziyyətdir, maraqlı nəticə mövcuddur. Ümid edirəm ki, hər tərəfdən bir qədər xoşməramlıqla biz bu sahədə real irəliləyiş əldə edə biləcəyik. Çünki düşünürəm ki, belə olan halda Azərbaycandan Ermənistandan keçərək Naxçıvana, Naxçıvandan isə Gümrüyə və nəhayət Qarsa gedən dəmiryolumuz varsa, bu təkcə Azərbaycanın deyil, Ermənistanın da maraqlarına uyğundur”.
Görünən odur ki, Avroittifaq işğal altında olan kəndlərin qaytarılması ilə bağlı Azərbaycana dəstək verməkdə qərarlıdır. Söhbət Qazaxın 7 kəndi və Naxçıvanın Kərki kəndindən gedir.
“Bu o deməkdir ki, Ermənistan Azərbaycanın ərazi bütövlüyünü tanımaqda qərarlıdırsa, o zaman...”
Sözügedən məsələni “Bakı-Xəbər”ə şərh edən politoloq Məhəmməd Əsədullazadə Aİ rəsmisinin məlum mövqeyinə müsbət prizmadan yanaşdı: “Ümumilikdə, Azərbaycanla Ermənistan arasında ilk növbədə sülh müqaviləsində kəndlərin qaytarılması həllini tapmalıdır. Bu, olduqca önəmli məqamdır və bunsuz hansısa razılaşmadan söhbət gedə bilməz. Ermənistan işğalında saxladığı kəndləri Birinci Qarabağ müharibəsində ilhaq edib. Ona görə də həmin 8 kəndin Azərbaycana qaytarılması mütləqdir. Bu olmadan Azərbaycanın ərazi bütövlüyünün tam təmin olunmasından söhbət gedə bilməz. O baxımdan hesab edirəm ki, Avropa İttifaqının Cənubi Qafqaz üzrə nümayəndəsinin dedikləri Azərbaycanın maraqlarına uyğundur. Bu o deməkdir ki, Ermənistan Azərbaycanın ərazi bütövlüyünü tanımaqda qərarlıdırsa, o zaman Qazaxın 7 kəndini və Kərkini bizə qaytarmalıdır. T.Klaar açıqlamasında onu da qeyd etdi ki, Amerikanın yanaşmasını qətiyyətlə dəstəkləyirik və həmçinin çox yaxın gələcəkdə Avropa səviyyəsində yeni təşəbbüslərimizin olacağını gözləyirik. Göründüyü kimi, Avropa İttifaqı da anklav kəndlərin qaytarılmasında Azərbaycanı dəstəkləyir. Sözügedən məsələni Azərbaycanla Ermənistan arasında sülh danışıqlarına salıb. Ona görə də Ermənistan tərəfinin hansı mövqe tutmasından asılı olmayaraq, bu kəndlərin qaytarılması həyata keçiriləcək. Xüsusilə Ermənistan çalışırdı ki, bu məsələdən geri addım atsın və anklavlar qaytarılmasın. Lakin məlum oldu ki, Azərbaycanın prinsipial mövqeyi nəticəsində bu məsələ həll ediləcək. Çünki Avropa İttifaqı ilə Azərbaycan arasında siyasi əlaqələr yüksək səviyyədədir. Ona görə də Ermənistan başlanan prosesin qarşısını ala bilməyəcək. Ən azından ona görə ki, Ermənistanın prosesin qarşısını almağa imkanı yoxdur”.
Vidadi ORDAHALLI
