İrəvanda “Nemesis” terror abidəsinin qoyulması Ermənistanın daxilində də narazılıqla müşaiyət olunur. Qeyd edək ki, “Nemesis” Daşnakstyunun keçirdiyi terror aksiyası olub və bu aksiyanın da qurbanlarının bir neçəsinin adı bizə məlumdur.
“Nemezsis” abidəsi açıqlar-açılmaz, Türkiyədən çox sərt bəyanat gəldi və Ermənistanın bu əməlinə qarşı operativ addım atıldı, Türkiyə Ermənistanla hava yolunu bağladı.
Bildirək ki, terror abidəsinin açılışı ərəfəsində, “Bakı-Xəbər” olaraq, bu abidə açılarsa Türkiyənin ona çox sərt cavab verəcəyini yazmışdıq. Elə də oldu və Türkiyə Ermənistana lazımı cavabı verdi.
“Türkiyə Ermənistanla münasibətlərin normallaşmasında səmimidir. Amma Ermənistanda “Nemesis” abidəsinin qoyulması qəbuledilməzdir”. Bunu bir neçə gün əvvəl Türkiyə xarici işlər naziri Mövlud Çavuşoğlu NTV-yə müsahibəsində deyib.
“Mən bunu qəbul edə bilmərəm. Ermənistanın bu barədə açıqlamaları isə səmimi deyil. Biz adekvat cavab olaraq hava sahəsini bağladıq. Lazım olsa başqa addımlar da ata bilərik”, - nazir bildirib.
M.Çavuşoğlu söyləyib ki, Ermənistan Türkiyəni aldatmağa cəhd etməməlidir
Türkiyənin reaksiyasından sonra Ermənistanın baş naziri Nikol Paşinyan “Azadlıq” radiosuna müsahibəsində “Nemesis” terror aksiyasının üzvlərinə İrəvanda abidə ucaldılmasını yanlış qərar kimi qiymətləndirdi. Paşinyan vurğuladı ki, bu səhv hərəkətdir.
Bu arada, Paşinyanın açıqlaması Ermənistanda müzakirə edilməyə başlayıb. Aysor.am Paşinyanın fikirlərinə “Erməni Soyqırımı” Muzey-İnstitutunun keçmiş direktoru, tarix elmləri doktoru Hayk Demoyanun mövqeyini öyrənib, o da deyib ki, hökumət bu “abidə”ni özünün anti-erməni fəaliyyətinə maneə hesab etdiklərini gizlətmir.
O, həmçinin deyib ki, Paşinyan “Nemesis” abidəsinin qoyulmasını emosional qərar kimi qələmə verib və rasional görünməyə çalışır. O qeyd edib ki, Paşinyan bu açıqlamanı Türkiyə və Ermənistanın münasibətlərini normallaşdırmaq, nizamlamaq üçün verib.
Paşinyanın açıqlamasından sonra “Nemesis” abidəsi sökülə bilərmi?
“Böyük ehtimalla, o bu abidəni sökdürməyə hazırlaşır”
BAO sədrinin müavini, fəlsəfə doktoru, siyasi şərhçi Faiq Ələkbərli “Bakı-Xəbər”ə bildirdi ki, indiki Ermənistan hökuməti və onun rəhbərliyi bir tərəfdən Azərbaycanla və Türkiyə ilə münasibətləri düzəltmək istəyir, digər tərəfdən isə terrorçulara abidə qoyur ki, bu da birinci ilə ziddiyyət təşkil edir. O qeyd etdi ki, yalnız Azərbaycanla Ermənistan deyil, həmçinin Türkiyə və Ermənistan arasında da münasibətlərin normallaşdırılması istiqamətində müəyyən addımlar atılırdı. “Əslində, Türkiyə də Ermənistanla müəyyən münasibətləri qurmağa cəhd göstərirdi, təbii ki, Azərbaycanın ərazi bütövlüyünün və digər məsələlərin təmin olunması şərti ilə. Lakin Paşinyan hakimiyyəti buna istəkli göründüyü halda, ölkə daxilində atılan bəzi addımlar tamamilə bunun ziddinədir. Xüsusən də bir terror aksiyasına və onun “qəhrəmanlarına” abidə qoyulması qəbuledilməzdir. Çünki həmin o terrorçuların hədəfində olan insanlar Türkiyə və Azərbaycanın tanınmış ictimai-siyasi, dövlət xadimləri olub. “Nemesis” məhz Azərbaycanın və Türkiyənin tanınmış xadimlərinə qarşı terror edib. Belə olduğu halda, Türkiyə Ermənistanın bu hərəkətini sakit qarşılaya bilməzdi və bu səbəbdən də çox ciddi addım atdı. Türkiyənin əks zərbəsindən payını götürən Paşinyan hökuməti bir terror abidəsinə görə nə qədər ziyan çəkdiklərini dərk etdi. Paşinyan gördü ki, Türkiyə məsələyə bu qədər sərt reaksiya verdi, ona görə də geriyə addım atmaq yolunu seçdi. Düzdür, o deyir ki, bu abidəni hökumətin qərarı olmadan İrəvan meriyası qoyub. O, bunu meriyanın üzərinə atır. Amma mənə elə gəlir ki, bu məsələ hökumətlə razılaşdırılıb. Ola bilsin, Ermənistan hökuməti Türkiyənin bu şəkildə sərt reaksiyasını gözləmirdi. Türkiyə ilə Ermənistan, Ermənistanla Azərbaycan arasında münasibətlərdə irəliləyiş olacaqsa, bu cür abidələrin mövcudluğu yolverilməzdir”.
İndiyə qədər Ermənistanda terrorçulara çoxlu abidələr qoyulduğunu deyən F.Ələkbərlinin sözlərinə görə, bu, münasibətlərin kəskin olduğu dövrlərdə olub, amma münasibətlərin qaydasına düşmək istiqaməti aldığı bir vaxtda İrəvanda “Nemesis” abisinin açılması başqa mətləblərdən xəbər verir. “Bu, Ermənistanın ikiüzlülüyünü, riyakarlığını ortaya qoyur. Əgər doğrudan da münasibətlərin tənzimlənməsini istəyirsə, Paşinyanın “Nemeis”i sökdürməkdən başqa yolu yoxdur. Ya bu abidə sökülməli, demontaj edilməli, ya da Ermənistan Türkiyə ilə normal münasibət qurmaq istəyindən əl çəkməlidir. Çünki “Nemesis”lə normal münasibət bir araya sığmır. Mənə elə gəlir ki, bu məsələ Azərbaycan və Türkiyə rəhbərliyi tərəfindən Ermənistana çatdırlıb. Paşinyanın “Nemesis” abidəsini sökdürməkdən başqa çıxış yolu yoxdur. Bu səbəbdən də hesab edirəm ki, gec-tez o terror abidəsi söküləcək. Ermənistan öz gələcəyini düşünürsə bilməlidir ki, onun gələcəyi Azərbaycana və Türkiyəyə münasibətinin müsbət şəkildə dəyişməsi ilə bağlıdır. Ermənistan Azərbaycana və Türkiyəyə qarşı hədyanlarını, torpaq iddialarını, terror düşüncələrini, ifrat milliyyətçiliyini davam etdirəcəksə Ermənistanın heç bir gələcəyi yoxdur. İranda, Rusiyada, Fransada, Avropada Ermənistana şirin vəd verənlər varsa onlar da bu ölkəni bir alət, maşa kimi görürlər. Bunu Paşinyan dərk etməmiş deyil. Üstəlik, Türkiyənin də mövqeyi ortadadır, ona görə də, Paşinyan hansısa yol tapıb “Nemesis” abidəsini sökdürməlidir. Böyük ehtimalla, o bu abidəni sökdürməyə hazırlaşır”-deyə qeyd edən ekspert bildirdi ki, əks halda o nə Türkiyə, nə də Azərbaycanla normal münasibət qura biləcək.
İradə SARIYEVA
