Ermənistan dövləti faşistlərə, terrorçulara heykəl qoymaqda dünyada birinci yeri tutur. Bütün dünya ölkələri terrora qarşı birləşdiyi, faşizmə, irqçiliyə, nasizmə barışmaz mövqe göstərdiyi halda, Ermənistan bunun tam əksini edir. Bir müddət əvvəl İrəvanda Türkiyə və Azərbaycanın görkəmli dövlət xadimlərinə qarşı silsilə terror aktları törətmiş "Nemezis" təşkilatına abidə qoyulub. Dünyanın ağıllı kəsimləri “Nemezis” terror qrupuna abidə qoyulmasını sərt tənqid etdikdən, Türkiyə hava sərhədlərini bağladıqdan və sairdən sonra Ermənistanın baş naziri Nikol Paşinyan yuxudan ayılıb ki, “Nemezis” abidəsinin qoyulması rəhbərlik etdiyi ölkəyə ziyandır.
“Armenpress” məlumat yayıb ki, N.Paşinyan “Azadlıq” radiosuna müsahibəsində İrəvanda “Nemezis” abidəsinin qoyulmasını yanlış qərar hesab edib. Paşinyan bildirib ki, abidə hökumətin qərarına əsasən qoyulmayıb, bu yanlış qərar İrəvan şəhər meriası tərəfindən verilib: “Hesab edirəm ki, qərarın verilməsi yanlış olub”.
Paşinyan abidənin ucaldılması qərarını hökumətin vermədiyini bir daha təkrar edərək, demokratiyanın ən böyük çatışmazlıqlarından biri kimi hökumət başçısının hamıya nəzarət edə bilmədiyini deyib.
“Bu abidənin qoyulmasından sonra Paşinyanı çıxılmaz vəziyyətə salan hal baş verib”
AMEA-nın Qafqazşünaslıq İnstitutunun ermənişünaslıq şöbəsinin müdiri, professor Qasım Hacıyev bildirdi ki, Ermənistanda nəinki “Nemezis”ə, eləcə də digər terror təşkilatlarına və terrorçulara heykəllər qoyulub. O vurğuladı ki, xüsusən də R.Köçəryanın, S.Sarkisyanın dövründə terrorçulara, faşist əlaltılarına qoyulan abidələrin sayı daha çox olub. Paşinyanın “Nemezis” abidəsinə qarşı çıxmasını təəccüblə qarşılayan professor Hacıyev “Paşinyanın belə bir açıqlama verməsi çox qəribədir. Erməni elə bir toplumdur ki, onun hər addımı məkrlidir, hər sözü yalandır. Həmişə riyakar siyasəti ilə seçilən Paşinyanın “Nemezis”ə abidə qoyulmasını düzgün qərar hesab etməməsindən təəccübləndim. Ehtimal edirəm ki, bu abidənin qoyulmasından sonra Paşinyanı çıxılmaz vəziyyətə salan hal baş verib. Bu gün Türkiyə hava məkanını bağlayıb, bu heykələ görə Paşinyan hökumətinə qarşı qınaq mövcuddur. İnanıram ki, açıq şəkildə olmasa da, başqa dövlətlər səviyyəsində də Paşinyana iradlar bildirilib. Rusiya özü də Ermənistanın faşistlərə, terrorçulara heykəl qoymasını tənqid etməlidir. Ermənistanın bu siyasəti qonşular üçün də, dünya üçün də ziyanlıdır”.
Q.Hacıyev hesab edir ki, şəhər meriasının hökumətdən xəbərsiz hansısa abidə ucaltması inandırıcı görsənmir. “Mən Paşinyanın səmimiyyətinə şübhə ilə yanaşıram. Əgər doğrudan da məsələ onun dediyi kimidir və meriya özbaşına qərar veribsə, onda bəs Paşinyan kimdir? Necə ola bilər ki, hökumətin razılığı olmadan belə bir addım atılır? Görsənən odur ki, ya Ermənistanda Paşinyanı hökumət başçısı kimi saymırlar, ya da Paşinyan bu açıqlamanı verməklə öz canını məsuliyyətdən qurtarmaq istəyir. Başdan onun belə bir abidənin qoyulacağından xəbəri olub, bu halda onun bunu inkar etməsi gülüncdür. O hökumət başçısıdır, hökumət başçısının səlahiyyəti isə ölkədə hər kəsdən böyükdür. Paşinyanın belə bir acizlik göstərməsi, qeyri-səmimi ifadələr işlətməsi gülünc görsənir. Siz fikir versəniz görərsiz ki, o indiyə qədər heç bir sözünün üstündə durmayıb, sözün altından sivişib çıxıb. Bu isə baş nazirə yaraşmayan bir haldır. Baş nazir kimi, “Nemezis” abidəsinin sökülməsi ilə bağlı qərar verə bilər, bu abidənin əleyhinədirsə niyə o qərarı vermir? Türkiyə “Nemezis”dən sonra davamlı narazılıq edir, Azərbaycan da həmçinin. Paşinyan Türkiyə ilə münasibətləri düzəltmək istəyir. Ondan soruşmaq lazımdır ki, bəs bu halda niyə bizim böyük şəxsiyyətlərimizi qətlə yetirən terror təşkilatına abidə qoyursan? Hesab edirəm ki, bu abidənin qoyulmasında Paşinyan hökumətinin razlığı var. İndi isə vəziyyət bu cür şəkil alıb deyə özünü narazı kimi göstərir”- deyə Q.Hacıyev qeyd etdi.
İradə SARIYEVA
