Ermənistan və Türkiyə parlamentlərinin sədrləri Alen Simonyan və Mustafa Şentop arasında Ankarada keçirilən görüşdə Ermənistan parlamentinin sədri qeyd edib ki, İrəvan Türkiyə ilə münasibətlərin normallaşdırılması prosesində konstruktivlik nümayiş etdirir. A.Simonyan həmçinin vurğulayıb ki, Ermənistanın qonşularına, o cümlədən də Türkiyəyə qarşı ərazi iddiası yoxdur.
O, həmçinin, Türkiyənin Ermənistan aviaşirkətləri üçün hava məkanını bağlamasından təəssüfləndiyini bildirib və bu görüşün problemin həllinə töhfə verəcəyinə ümid etdiyini deyib. M.Şentop isə cavabında qeyd edib ki, Türkiyə tərəfi üçün İrəvanda “Nemesis” abidəsinin açılışı həssas məsələdir və hava məkanının bağlanması səbəbi budur. Ermənistan parlamentinin sədri deyib ki, çoxsaylı proseslərin dayandırılmasının bir çox səbəbləri var, lakin onun səfəri də bu kontekstdə irəliləyiş üçün təkan ehtiva edir.
Göründüyü kimi, Alen Simonyan riyakarcasına deyib ki, Ermənistan Türkiyə ilə münasibətlərin tənzimlənməsində konstruktiv mövqe tutur, Türkiyəyə qarşı ərazi iddiaları yoxdur. Ermənistan necə konstruktivdir, necə Türkiyəyə qarşı ərazi iddiaları yoxdur ki, bu ölkənin dövlət gerbində Agrı dağın şəkli var? Onlar Türkiyə ərazisində olan, daha dəqiq desək, Türkiyənin Ağrı dağının şəklini öz dövlət gerblərinə salıblar və sonra da "bizim Türkiyəyə qarşı ərazi iddialarımız yoxdur, konstruktiv mövqedəyik" deyirlər. Belə konstruktiv mövqe olar?
“Ola bilsin, yaxın gələcəkdə Ermənistanın bu riyakar, işğalçı siyasəti dəyişsin, dəyişməsə xəritədə belə bir ölkə qalmayacaq”
A.Simonyanın bu riyakar, məkrli bəyanatına şərh verən AVCİYA-nın vitse-prezidenti, professor, siyasi icmalçı Məhərrəm Zülfüqarlı baki-xeber.com-a bildirdi ki, Ermənistan rəsmiləri ikiüzlü, məkrli siyasət yürütməkdən usanmır. Onun sözlərinə görə, A.Simonyan da erməni xislətindən kənara çıxa bilməyib. “Hazırda Ermənistan rəhbərlərinin, Paşinyan komandasının yeritdiyi siyasət özündən əvvəlki irqçi komandanın siyasətindən bir az fərqlənir. Paşinyan son zamanlar bəyan edir ki, bizim qonşularımıza qarşı ərazi iddialarımız yoxdur. O deyir ki, qonşularımıza qarşı ərazi iddialarından əl çəkməsək dövlət kimi qala bilməyəcəyik, dövlət kimi qalmaq istəyiriksə, qonşularımıza qarşı ərazi iddialarından əl çəkməliyik. Bilirsiz ki, Ermənistanın əsassız ərazi iddiaları təkcə Azərbaycana qarşı deyil, Gürcüstana, Türkiyəyə və başqa ölkələrə qarşıdır. Hətta ermənilər Rusiyanın Krasnodar vilayətinə, Soçi və başqa şəhərlərə qarşı da iddiada bulunurlar. Yəni ermənilər onları 200 ilə yaxındır ki, himayəsi altına alan Rusiyaya qarşı da bu cür hərəkət edirlər. Türkiyəyə gəlincə, erməni millətçiləri, şovinistləri kənar qüvvələrin əlində oyuncaq olublar və onlardan həm Azərbaycanla, həm də Türkiyə ilə bağlı istifadə olunub. Osmanlı dövründə də xarici qüvvələr bu dövləti laxlatmaq, sarsıtmaq üçün ermənilər kimi xırda, vətənsiz toplumlardan istifadə ediblər. Birinci Dünya müharibəsində ermənilər yaşadıqları ölkəyə xəyanət edib, Rusiyanın xeyrinə qiyam qaldırmışdılar. İndi də dünyaya yalandan qondarma “erməni soyqırımı”nı bəyan edirlər. Bunun da arxasında böyük dövlətlər dayanır. Həmin dövlətlər də Türkiyəyə nə isə verib ala bilmədikdə bu saxta “soyqırım” məsələsini ortaya atırlar”.
M.Zülfüqarlı qeyd etdi ki, bu iddianı ortaya atanların məqsədi Türkiyəni zəiflətmək, ondan təzminat, ərazi qoprmaqdır. A.Simoyanın bəyanatına gəlincə, M.Zülfüqarlı hesab edir ki, bu gün Ermənistan həqiqətən də Türkiyə ilə münasibətləri düzəltmək istəyirsə, saxtakarlıqdan əl çəkməlidir: “Bəli, bir tərəfdən Türkiyə ilə münasibətlərini düzəltmək istəyirlər, bəyan edirlər ki, ona qarşı ərazi iddiaları yoxdur, o biri tərəfdən də Ağrı dağına “Ararat” adı qoyub ondan əl çəkmirlər. Ermənilər dövlət atributu olan gerblərinə Ağrı dağın şəklini əks etdirməklə, futbol komandalarını “Ararat” adlandırmaqla uzun illərdir ki, Türkiyəyə ərazi iddiası edirlər. Ola bilsin, yaxın gələcəkdə Ermənistanın bu riyakar, işğalçı siyasəti dəyişsin, dəyişməsə xəritədə belə bir ölkə qalmayacaq. Ermənistan həqiqətən də konstruktiv mövqe nümayiş etdirirsə, Türkiyəyə qarşı ərazi iddiasında deyilsə, onda dövlət atributu olan gerbi dəyişdirməlidir və onun üzərindən Ağrı dağının şəklini götürməlidir. Çünki normal qonşuluq münasibəti qurmaq istədikləri ölkənin ərazisinin şəklini dövlət atributuna salıblarsa, bu heç də xoş qarşılana bilməz. Ona görə də, yaxşı olar ki, Ermənistan hökuməti, erməni ziyalıları, erməni siyasətçiləri yaxın gələcəkdə qonşularına qarşı dildə yox, əməldə bu cür saxta, qondarma iddialardan əl çəksin və normal münasibətlər qurulsun”.
M.Zülfüqarlı hesab edir ki, dildə “sizə qarşı ərazi iddiamız yoxdur” deyib dövlət gerbində Ağrı dağının şəklini saxlamaq bu ölkənin səmimi olmadığını göstərir: “Ermənistan normal münasibət qurmaq istəyirsə onda öz gerbindən Ağrı dağının şəklini götürsün və onda düşünmək olar ki, o, Türkiyəyə qarşı ərazi iddialarından əl çəkib. Amma onlardan səmimiyyət gözləmirəm. Düşünsünlər, Ermənistanın mövcudluğunun davam etməsi qonşularla normal münasibətlərdən keçir”.
İradə SARIYEVA
