“İstər regional inkişafla, istər beynəlxalq məsələlərlə, istərsə də ölkələrin ərazi bütövlüyü ilə bağlı siyasətimiz tamamilə aydındır. Azərbaycan geosiyasi dəyişikliklər nəticəsində daha güclü olacaq. Biz artıq bunu görürük”.
Bu fikirləri Prezident İlham Əliyev Şuşada keçirilən “Böyük Avrasiya geosiyasətinin formalaşması: keçmişdən bu günə və gələcəyə” mövzusunda konfransda çıxışında səsləndirib.
“Ermənistanın Qarabağı Azərbaycanın bir hissəsi kimi başa düşməyə, təkcə başa düşməyə deyil, açıq şəkildə qəbul etməyə yaxınlaşması da qismən geosiyasi dəyişiklik, qismən də “kimsə gəlib onların yerinə döyüşəcək” illüziyalarının çökməsi ilə əlaqədardır”, - deyən dövlət başçısı bildirib ki, Avropanın enerji təhlükəsizliyini gücləndirmək üçün hazırda Azərbaycanın enerji ehtiyatlarına əvvəllər olduğundan daha çox ehtiyac var.
Görünən odur ki, yeni geosiyasi reallıqlar Ermənidstanı Qarabağı Azərbaycanın bir hissəsi kimi tanımağa vadar edir.
“Ermənistanın Qarabağı ölkəmizin tərkib hissəsi kimi tanımaqdan başqa alternativi yoxdu”
Mövzu ilə bağlı fikirlərini “Bakı-Xəbər”lə bölüşən Demokratik Dəyişim Partiyası Təşkilat Komitəsinin sədri Əli Mustafayev hesab edir ki, tarixən Ermənistan xarici və beynəlxalq qüvvələr tərəfindən himayə olunub: “Ermənilərin Cənubi Qafqazda məskunlaşması, dövlət yaratmaları, güclənməsi, daha sonra Azərbaycan ərazilərini işğal etmələri öz hünərləri deyil. Bütün bunlar ermənilərin himayədarları hesabına mümkün olub. Həm açıq, həm də gizli dəstəyi hesabına onlar buna nail olublar. Hətta son günlər Ermənistan rəhbərliyinin çox açıq şəkildə təşvişini də hiss etdim ki, ölkənin təhlükəsizlik sisteminin dağılmasını, yeni təhlükəsizlik sistemininin qurulmasının vacibliyini gündəmə gətirirlər. Bu isə o deməkdir ki, ermənilər özləri-özlərini qorumur. Bunların sankı hansısa başqa bir beynəlxalq sistemi var və bu sistem onların təhlükəsizliyini qoruyur. İndi həmin sistem çöküb və yaxud da hansısa bir formada regionda baş verən proseslərə reaksiya vermir, Azərbaycanın qarşısını almır. Bu da erməniləri vəlvələyə salıb ki, indiyə qədər onları qoruyanlar, onların əvəzinə döyüşənlər hardadılar. Anlaşılan odur ki, ermənilər bir növ çaşqınlıq içindədilər. Ona görə də Ermənistanın Qarabağı Azərbaycanın tərkib hissəsi kimi tanımaqdan başqa alternativi yoxdu. Həm geosiyasi dəyişikliklər bunu diqtə edir, həm də hansısa himayədarı gəlib onun yerində döyüşmək istəmir. Ancaq 90-cı illərdə vəziyyət belə deyildi. Rusiya hərbi baxımdan Ermənistanın yerinə döyüşdü, Fransa və ABŞ da siyasi-iqtisadi nöqteyi-nəzərdən bu ölkəni himayə etdi. Nəticədə 30 il ərazilərimiz işğal altında qaldı. Azərbaycanın geosiyasi çəkisi, rolu artdıqca, ermənilərin bəsləndikləri “dənizdən-dənizə böyük Ermənistan“ xəstə xəyalları puç olur. Azərbaycanın Avropa üçün vaçib enerji və nəqliyyat tərəfdaşına çevrilməsi erməni lobbisinin təxribatçı fəaliyyətini müəyyən qədər məhdudlaşdırır. Əvvəlki dövrlərdə olduğu kimi istədiklərini edə bilmirlər. Ona görə də nəticə etibarı ilə bütün bunları Ermənistan nəzərə almalı və illüziyalardan əl çəkməlidir. Qarabağ hesabına Ermənistanı böyütmək dönəmi bitib. Ermənistan dövlət olaraq var olmaq istəyirsə, Azərbaycanla anlaşmalıdır. Yəni Azərbaycanla sülh sazişi imzalayıb Qarabağın Azərbaycana məxsus olduğunu etiraf etməlidir”.
Vidadi ORDAHALLI
