Ermənistan parlamentində 44 günlük müharibənin araşdırılması üzrə müvəqqəti komissiyanın fəaliyyət müddəti daha 6 ay uzadılıb. Deputatların 59-u məsələnin lehinə, 29-u əleyhinə səs verib. Müxalifətdən olan 2 deputat isə qanun layihəsini dəstəkləməkdən imtina edib.
İstintaq Komissiyasının sədri Andranik Köçəryan bildirib ki, komissiya işin gedişində həcmi 14 min səhifədən çox olan 4154 məxfi, tam məxfi mətn və qrafik sənədləri tələb edib və qəbul edib: “Onların ətraflı tədqiqi hələ də davam edir. Komissiyaya dəvət olunacaq şəxslərin siyahısı tərtib edilib. Buna əsasən, keçmiş və indiki yüksək rütbəli məmurlar artıq dəvət olunublar və dəvət olunacaqlar”.
Məlumat üçün qeyd edək ki, sözügedən komissiya 2022-ci ilin fevralında hakim “Mülki müqavilə” fraksiyasının təşəbbüsü ilə yaradılıb. Komissiyanın fəaliyyəti çərçivəsində deputatlar 2020-ci ildə müharibə zamanı Ermənistanın müdafiə və xarici siyasətinə başçılıq etmiş şəxslər dəvət olunub. Onların arasında Ermənistanın baş naziri Nikol Paşinyan, Silahlı Qüvvələr Baş Qərargahının indiki rəisi Edvard Asryan, Baş Qərargahın keçmiş rəisi Onik Qasparyan, keçmiş müdafiə naziri David Tonoyan, sabiq xarici işlər naziri Vardan Oskanyan və başqaları olub.
Maraqlıdır, Ermənistan tərəfi sözügedən komissiyanın fəaliyyətini uzatmaqda nə məqsəd güdür?
“Ora dəvət olunanların mütləq əksəriyyəti Paşinyana qarşı müxalif mövqedən çıxış edən adamlardır”
Bununla bağlı “Bakı-Xəbər”ə açıqlama verən hərbi ekspert Ramil Məmmədlinin fikrincə, hakim fraksiyanın məlum təşəbbüsü sırf siyasi məqsədlərə hesablanıb: “Məsələ ondadır ki, Baş nazir Nikol Paşinyan ona qarşı müxalif mövqedə olanları təzyiq altında saxlamaq üçün parlament komissiyasının fəaliyyətini uzadır. Düzdür, Paşinyanın özü də ora çağırılıb, amma bu formal xarakterlidir. Ora çağırılanların tərkibinə baxsaq görərik ki, dəvət olunanların mütləq əksəriyyəti Paşinyana qarşı müxalif mövqedən çıxış edən adamlardır. Çünki 2021-ci il fevralın 25-də o zaman Ermənistan Silahlı Qüvvələrinin Baş Qərargah rəisi Onik Qasparyan və daha bir neçə general Paşinyanın istefasını tələb edib. N.Paşinyan bunu hərbi çevriliş cəhdi adlandıraraq O.Qasparyanı vəzifəsindən azad edib. Məhz bu hadisədən sonra Paşinyan hərbçilərin nə zamansa birləşinb onu istefaya məcbur edəcəyindən ehtiyat edir. Ona görə də 44 günlük müharibədə məğlub olmalarının səbəbini hərbçilərin üzərinə atmaqla özünü sığortalamağa çalışır. Bununla onları təzyiq altında saxlayır ki, ona qarşı hər hansı siyasi fəaliyyətə qalxmasınlar. Yoxsa istintaqın bu qədər uzadılmasının heç bir hüquqi əsası yoxdur. Onu da nəzərə almalıyıq ki, Paşinyan İstintaq Komissiyası hesabına 20 il hakimiyyətdə olan “Qarabağ klanı”nın fəaliyyətini təftiş edir və bundan onlara qarşı təzyiq vasitəsi kimi istifadə edir. Ona görə də bunun arxasında sırf siyasi motivlər dayanır”.
Vidadi ORDAHALLI
