Azərbaycanın öz torpaqlarını işğaldan azad etməsi faktını və Ermənistanı məğlub etməsini Birinci Qarabağ müharibəsində iştirak edən erməni “qəhrəmanlar” həzm edə bilmirlər.
Onlardan biri də “Anahid” kəşfiyyat dəstəsinin komandiri, ehtiyatda olan polkovnik-leytenant Anahid Martirosyandır ki, o, Aysor.am-ın “Suallarım var” verilişinin efirində öz cinayətkar mahiyyətini ortaya qoyub, Ermənistanı yenidən Azərbaycana təcavüz etməyə çağırıb, özünün də bu təcavüzdə, işğalda iştirak etməyə hazır olduğunu deyib. Bu azmış kimi, A.Martirosyan Birinci Qarabağ müharubəsində dinc, sivil azərbaycanlılara divan tutan, körpələri, yaşlıları, qadınları işgəncə ilə öldürən, qətl edən caniləri “qəhrəman” kimi qələmə verməkdən çəkinməyib. Qatil Leonid Azqaldyan, Monte Melkonyan, Vladimir Balayan, Arkadi Ter-Tadevosyan kimi Qarabağ, Xocalı canilərini qəhrəmanlaşdıran Anahid Ermənistan hakimiyyətini ittiham edib.
Onu da qeyd edək ki, Anahid Vətən müharibəsində qadınlardan ibarət batalyona rəhbərlik edib və Ermənistanın bu müharibədə məğlubiyyətinin şahidi olub.
“Anahid” kəşfiyyat dəstəsinin rəhbəri olan bu qadın Azərbaycanda hansı cinayətləri törədib?
Tanınmış hərbi ekspert Tərlan Eyvazov “Bakı-Xəbər”ə bildirdi ki, “Anahid” qadın dəstəsi barədə o zaman elə də geniş məlumat olmayıb. T.Eyvazov qeyd etdi ki, Anahidin fikirləri ciddi sayıla bilməz, o, ölkəsinin məğlubiyyətini caniləri yada salmaqla ört-basdır etməyə çalışır. T.Eyvazov hesab edir ki, Anahidin nə deməsindən asılı olmayaraq, erməni cəmiyyəti Azərbaycanla sülh istəyir, bu kimi çıxışlar sülhə qarşıdır. “Bu gün Azərbaycan ordusu Ermənistan ərazisini işğal etməyib ki. O hansı işğaldan danışır. Azərbaycan əsgəri bizə aid ərazidə dayanıb. Bu gün durub kiminsə Azərbaycana qarşı hansısa ittiham irəli sürməsi qəbuledilməzdir.
Qarabağda azərbaycanlılara qarşı erməni canilərinin törətdiyi tükürpədici cinayətlərə “Anahid”in də şərik olduğu şübhə doğurmur. Hesab edirəm ki, bu gün Anahid Martirosyan adlı birinin ortaya çıxıb erməni canilərini “qəhrəmanlaşdırması” yolverilməzdir. Onlar “qəhrəman” yox, cani olublar, körpə qatilləri, cəllad kimi tarixə düşüblər. Özünü kışfiyyat dəstəsinin komandiri kimi təqdim edən qadına gəlincə, onu deyə bilərəm ki, adını daşıdığı “Anahid” Ermənistanın milli “simvolu”dur və onun missiyası dünyaya məlumdur. Erməni qadınlarının müharibəyə hansı məqsədlə qatıldığı məlumdur. Bunu şərh etməyə dəyməz” - deyə T.Eyvazov qeyd etdi.
O bildirdi ki, Birinci Qarabağ müharibəsi dövründə “Anahid” kəşfiyyat batalyonu barədə eşitməyib, amma erməni qadınların əməllərini, müharibələrə hansı səbəbdən cəlb edildiklərini bütün dünya bilir: “Erməni qadınları cinayətkarlıqda, körpələri, yaşlıları qətlə yetirməkdə heç də kişilərdən geri qalmır”.
Əli TURABOV
