Son günlər İranın Qum şəhərində baş verənlər diqqət çəkməkdədir. “Hüseyniyyun” terror qrupunun üzvləri olan Orxan Məmmədov və Tohid İbrahimbəylinin Qumda həbs edildiyi barədə bir neçə gün əvvəl məlumat yayılıb.
Uzun müddət məlumat rəsmən təsdiqlənməsə də, Azad İran Teleqram Kanalının IRNA agentliyinə istinadən yaydığı məlumata görə, İran Orxan Məmmədov və Tohid İbrahimbəylinin saxlanıldığını təsdiqləyib. Azad İran teleqram kanalı məlumat yayıb ki, “Hüseyniyyun” təşkilatının 2 üzvü Azərbaycanın irəli sürdüyü ittihamların araşdırılması üçün nəzarətdə saxlanılır.
Bildirilir ki, Azərbaycan hökuməti İrandakı vətəndaşları ilə bağlı bəzi ittihamlar irəli sürüb və bu ittihamların təsdiqi daha çox araşdırma tələb edir. Bu səbəbdən adıçəkilən şəxslər bir çox məsələlərin araşdırılması üçün nəzarətdə saxlanır.
“Hüseyniyyun" terror qruplaşmasının üzvlərinin saxlanılması xəbərinə toxunandığını deyərək bununla bağlı xəbəri təkzib edən İranın məlumatlı təhlükəsizlik rəsmisi Qum şəhərində İRNA-ya müsahibəsində deyib: “İddiaların araşdırılması üçün hazırda sözügedən Azərbaycan vətəndaşları nəzarət altındadır. Azərbaycanın iki vətəndaşına qarşı ittihamların araşdırılması üçün əlavə təhqiqat lazımdır”.
Qeyd edək ki, bir neçə gün əvvəl onların Qumda həbs edildiyi, sonra isə sərbəst buraxıldığı barədə məlumat yayılmışdı.
Məlumat üçün bildirək ki, terror qruplaşmasının üzvlərinin göz altına alınması məsələsinə Milli Məclisin iclasında deputat Ceyhun Məmmədov münasibət bildirib. Millət vəkili “İran tərəfi Azərbaycan ərazisində “Kərimə dövləti”nin qurulması barədə çağırış edən iki azərbaycanlını ölkəmizə təhvil verməlidir”-deyib.
İranın “Hüseyniyyun”un üzvlərini həbs etməsi, yaxud xüsusi nəzarət altına almasını Azərbaycanla münasibvətləri yumşaltmağa doğru bir jest hesab etmək olarmı?
“...Baş verənlər Azərbaycanla İran arasında aparılan danışıqların nəticəsidir”
BAO sədrinin müşaviri, fəlsəfə doktoru, siyasi şərhçi Faiq Ələkbərli “Bakı-Xəbər”ə bildirdi ki, İran Azərbaycan vətəndaşı olan bu iki terrorçunu və başqa terrorçuları çoxdan həbs edib Azərbaycana təhvil verməli idi. “Orxan Məmmədov, Tohid İbrahimbəyli və onlar kimi Azərbaycan dövlətinə xəyanət etmiş başqa şəxslər İran tərəfindən Azərbaycana təhvil verilməlidir. Orxan Məmmədov və Tohid İbrahimbəyli həbs edilibsə, o birbaşa Azərbaycana ekstradisiya olunmalıdır və onlar Azərbaycan məhkəməsi tərəfindən mühakimə olunmalıdır”.
F.Ələkbərli xatırlatdı ki, bir neçə il əvvəl Aktauda Xəzəryanı ölkələrin sammiti zamanı Prezident İlham Əliyev ozamankı İran prezidenti Həsən Ruhani ilə görüşdə ona İranda sığınacaq tapan və müntəzəm olaraq Azərbaycan əleyhinə çıxışlar edən 20 Azərbaycan vətəndaşının siyahısını verib. “Prezident İlham Əliyev o zaman Ruhanidən o 20 nəfərin Azərbaycana təhvil verilməsini tələb edib. O siyahıda Orxan Məmmədovun və Tohid İbrahimbəylinin olması da şübhə doğurmur. Əlbəttə, bu ölkə gec-tez Azərbaycanın tələblərinə əməl etmək məcburiyyətində qalacaq.
Hesab edirəm ki, “Hüseyniyyun” üzvləri ilə bağlı baş verənlər Azərbaycanla İran arasında aparılan danışıqların nəticəsidir. Ehtimal etmək olar ki, Azərbaycanın İran adlanan ölkədən, İran adlanan ölkənin isə Azərbaycandan tələbləri var. Qeyd etdiyim kimi, Azərbaycanın tələblərindən biri “Hüseyniyyun” terror təşkilatının üzvləri olan Azərbaycan vətəndaşları ilə bağlı olub. Mənə elə gəlir ki, əslində, bu bir qədər qarşılıqlı jestlərdir. Belə qənaətə gəlmək olar ki, əgər İran adlanan ölkə “Hüseyniyyun”un üzvləri barədə tədbir görürsə demək nəticə çıxarmağa başlayıb. Sözün düzü, molla rejiminə çox güvənmək də olmaz. Amma ümid edirik ki, bu proses yenə də öz axarında davam edəcək. Biz dəfələrlə şahidi olmuşuq ki, İran adlanan ölkənin bu kimi jestləri müvəqqəti xarakter daşıyır. Amma sonda yenə də öz simaları ortaya çıxır”.
İranın vədlərinə münasibətdə Azərbaycan dövlətinin çox ehtiyatlı olmalı olduğunu deyən F.Ələkbərli vurğuladı ki, İranın bu jesti özünü tam real şəkildə ifadə etməyə də bilər, son anda vədini yerinə yetirməkdən imtina edər. “Buna görə də, İranın bu jestinin mahiyyəti dərindən araşdırılmalı və ona uyğun addımlar atılmalıdır. Amma ehtimallara görə, Tehran rejimi Azərbaycanla münasibətləri yumşaltmağa doğru meyl göstərmək istəyir”- deyə siyasi şərhçi qeyd etdi.
Leyla QARAXANLI
