44 günlük müharibə zamanı həlak olmuş erməni hərbçilərin valideynləri və yaxınları, eləcə də bir qrup siyasi və ictimai xadim Ermənistanın hazırkı hakimiyyəti tərəfindən anım günü kimi elan edilmiş “Vətəndaş günü”nü – qeyd edirlər. Ermənistan parlamentinin binasından bu adla xatirə yürüşü başlayıb.
Yürüş başlamazdan əvvəl ictimai və siyasi xadim Edqar Qazaryan jurnalistlərə müsahibəsində qeyd edib ki, hakimiyyətin elan etdiyi “bayram” Ermənistan vətəndaşları tərəfindən tanınmır və qəbul edilmir:
“Hesab etmirəm ki, cəmiyyətimizdə bu gün bayram əhval-ruhiyyəsi olan vətəndaş yoxdur, bu gün kiminsə bayram əhval-ruhiyyəsində olduğunu təsəvvür edə bilmirəm. Amma Azərbaycan-Türkiyə inqilabına qədər bizim təqvimimizdə belə bir cəfəngiyat yox idi, əvəzində əsl bayramlar - 8 May – Şuşanın Qurtuluş Günü ( işğal günü-red) var idi ki, bu da Yerkrapa Günü kimi qeyd olunurdu. Təəssüf ki, bu, Nikol Paşinyanın ilk dəfə baş nazir seçildiyi günə təsadüf etdi. Dövlət həqiqətən də bayramı öz vətəndaşları ilə qələbə, birlik şüarı altında qeyd etdi və indi, bu gün biz burada bu cinayətkar hakimiyyətin əməllərinin qurbanı olmuş vətəndaşların xatirəsini ehtiramla yad edirik”.
Diqqət çəkən vacib məqam odur ki, son vaxtlar erməni siyasilər 44 günlük müharibənin yekunu nəticəsində yaranan geosiyasi vəziyyəti Azərbaycan-Türkiyə inqlabı kimi xarakterizə edir.
Aydın Quliyev: “Bu inqilabın məzmunu ermənilərin təsəvvürlərindəki kimi deyil”
“Bakı-Xəbər” Media Qrupunun rəhbəri Aydın Quliyev məhz bu mövzuya öz sosial şəbəkə hesabında toxunub.
Onun sözlərinə görə, Ermənistanın bəzi ictimai-siyasi xadimləri daşnak rejiminin kapitulyasiyası ilə nəticələnmiş 44 günlük müharibəyə yeni ad veriblər - Azərbaycan-Türk inqilabı:
“Paşinyanın qatı əleyhdarları olan bu şəxslərin məqsədi cəmiyyəti Paşinyanın üstünə daha da qızışdırmaq olsa da, müəyyən mənada haqlıdırlar. Çünki həqiqətən də Azərbaycanın Vətən müharibəsi inqilabdır. Lakin bu inqilabın məzmunu ermənilərin təsəvvürlərindəki kimi deyil. Yəni ermənilər Şuşanın işğal günü olan 8 mayı öz aləmlərində milli bayram kimi qeyd etdikləri halda, birdən-birə hər şey alt-üst oldu və ermənilərin içini yandıran 8 noyabr Zəfəri ortaya qoyuldu. Bunu Laçının işğal və azadolunma tarixləri barədə də demək olar. Ermənilər həqiqətən inqilab olan Vətən müharibəsinin inqilabi məzmununa çox kiçik bir deşikdən baxırlar. Halbuki, məzmun daha böyükdür.
44 günlük müharibənin Azərbaycan-Türk inqilabı olaraq əsl inqilabi məzmunu nədən ibarətdir?
1.Bu sadəcə inqilab yox, Azərbaycan- Türkiyə geosiyasi inqilabı idi…
2.Bu inqilab yeni geosiyasi reallıqlar yaratdı.
3.Bu inqilab saxta erməni iddialarının 100 illik "təntənəli yürüşünün" belini qırdı və İlham Əliyevin "Qarabağ Azərbaycandır" sözləri düyyanın dərk və qəbul etdiyi yeni reallığa çevrildi.
4.Ermənistan dövləti-Diaspor-Lobbi üçlüyünün" məğlubedilməzlik və fövqəlbəşərilik" imici məhv edildi.
5.Azərbaycandan addım-addım torpaq qoparmaq siyasəti əbədi olaraq dayandırıldı və tarixlər boyu itirdiyimiz ərazilərə yenidən Qayıdış, eləcə də həmin torpaqların addım-addım qaytarılması dövrü başladı...
Tofiq Abbasov: “Azərbaycan öz gücü ilə, dost ölkələrin dəstəyi ilə öz müqəddəs torpaqlarını çirkin ayaqlardan təmizləməyə müvəffəq oldu”
Siyasi şərhçi Tofiq Abbasov isə “Bakı-Xəbər”ə bildirdi ki, erməni xalqının, xüsusilə də ictimai-siyasi sahələrdə fəaliyyət göstərən kəsiminin çox qəribə bir fantaziyası var: “Amma çox təəssüf ki, bu fantaziya ağıllı işlərə, faydalı proseslərə sərf olunmur, əksinə, özlərinin miflərini bir qədər də dərinləşdirirlər və yeni tarix yazırlar. Bu tarix ondan ibarətdir ki, ermənilərin guya Qarabağda buraxdıqları tutovka məhsulu, yəni arağın tarixi eramızdan əvvəl 326-cı ildən hesab olunur. Bu onların səfilliyindən xəbər verir. Halbuki, mən erməni xalqının nümayəndələri içində ağıllı, müdrik adamları da görmüşəm. Onlar birmənalı olaraq ermənilərin bu işğal, qarşıdurma siyasətini inkar edirlər. Deyirlər ki, bu erməni xalqının axırına çıxa biləcək bir ideologiyadır. İndi keçək əsas məsələyə. Birincisi, əgər burda inqilab olubsa, bu, Paşinyanın inqilabıdır. Çevrilişlər olubsa, parlamentdə gülləbaranla olan çevrilişlər idi. Prezident Ter-Petrosyanın hakimiyyətdən silah gücünə uzaqlaşdırılması və.s hamısı inqilabi proseslərdir. Azərbaycan isə öz gücü ilə, dost ölkələrin dəstəyi ilə öz müqəddəs torpaqlarını çirkin ayaqlardan təmizləməyə müvəffəq oldu. Bizim xilasımız bizim özümüzə olan inamın gücündən irəli gəlib. Ermənilər isə özləri inqilabın qurbanına çevriliblər. Nikol Paşinyanın hakimiyyətə gəlməsi inqilabi bir proses idi. Onunla müqayisədə Azərbaycan həmişə üstünlüyü təkamül proseslərinə verirdi. Vaxtında rəhmətlik Heydər Əliyev də deyirdi ki, zaman onsuz da bizə işləyir, bizə də işləyəcək. Onun müdrikliyi bir daha özünü onda təsdiq etdi ki, vaxt gəldi və biz gördük ki, zaman bizə işlədi və biz erməniləri yerlərində oturtduq. Ermənilər ancaq fantaziyalarla yaşayırlar. Skripkanın belə erməni kəşfi olduğunu deyirlər. Onlar özlərini nə hesab edirlər? Onlar belə bir təsəvvür yaradırlar ki, guya biz iki dövlət birləşib ermənilərin dərsini vermişik. Əlbəttə, bu belə deyil. Onlar nə qədər çalışdılar ki, türklərin bizim ordumuzda olmasına mane olsunlar, amma heç nə edə bilmədilər. Birinci müharibədə Rusiyanın məşhur jurnalisti özü danışdı. Azərbaycanlı döyüşçü Vəzirin qəhrəmanlığından danışırdı. Deyirdi ki, üzbəüzdən Pskovun desant batalyonları üzərimizə gəlirdilər. Məni görüb tanıyanda dedilər ki, sən burda xeyir ola? Bildirdim ki, mən bura jurnalist kimi gəlmişəm. Bu, adamın öz etiraflarıdır, bunu həm yazıb, həm də videoda yerləşdirib. Yəni siz özünüz üçüncü qüvvəni, kənar ölkəni həmişə havadar seçmisiz. Bunlar hamısı ondan xəbər verir ki, onlar o dərəcədə özlərindən bədgümandırlar ki, ömrü boyu kimlərinsə dəstəyindən istifadə edib, bizə qarşı işğal siyasətini yeridiblər. Sadəcə, bu etdiklərini pərdələmək üçün çalışırlar Azərbaycanı belə bir obrazda təqdim etsinlər dünyaya. Guya biz özümüz yox, bizim əvəzimizə Türkiyə savaşır. Əlbəttə bu, saxta yanaşmadır. Heç vaxt da həqiqət kimi qarşılanmayacaq. Azərbaycan ordusu çox güclüdür. Təsadüfi deyil ki, dünyada, bir çox ölkələrdə, aparıcı dövlətlərdə, ABŞ-da hərbi məktəblərdə Azərbaycanın tədbiq etdiyi XXI əsr müharibəsinin metodikalarını yaxından öyrənirlər və çalışırlar ki, yiyələnsinlər. Odur ki, biz işlərimizlə onlara cavab veririk və verəcəyik də. Ermənistan bilməlidir ki, onlar bu bölgədə iki əsr bundan əvvəl yad element kimi qeydə alınıblarsa, gərək özlərini normal toplum kimi nümayiş etdirsinlər. Əks təqdirdə onların başı həmişə əziləcək. O ki qaldı bayramlara, bayramlarını keçirsinlər. Mən ermənilərin yerinə olsam, bir bayramın keçirilməsini üstün tutaram - 1828-ci ildə Qafqaz bölgəsinə köcürülmələrini. Təsadüfi deyil ki, 1978-ci ildə Marağa kəndində ermənilərin Qarabağa köçürülməsinin 150 illiyi münasibətilə bir memorial kompleks inşa edilmişdi. 80-cı illərin axırında bu abidəni özləri partlatdılar. Odur ki, bu proseslərdə onlar yalnız birinci köç edənlərin gününü bayram etsinlər”.
Məhəmmədəli QƏRİBLİ
