Rusiya sülhməramlı kontingentinin yeni komandanı general-polkovnik Aleksandr Lentsovla bağlı xoşagəlməz məlumatlar yayılmaqdadır. Onun həyat yoldaşının erməni, həm də erməni millətçisi olması, özünün isə 1990-cı ilin 20 yanvarında Bakıya yeridilən sovet qoşunlarında zabit kimi iştirakı barədə məlumatlar azmış kimi, onun hazırda atdığı addımlar da qüsurludur.
Maraqlıdır ki, yeni komandan əvvəl Bakını ziyarət edib, öz missiyası barədə məlumat vermək əvəzinə yollanıb birbaşa Xankəndinə. Lentsovun təyinatı ilə bağlı rəsmi xəbər təsdiqlənməmiş artıq onun Xankəndidə və Laçın yolunda olduğu barədə erməni mediasında yayılan xəbərləri gördük. Lentsov dərhal Xankəndidə separatçılarla görüşdü, Arutyunyanı dinlədi. İndi isə Ermənistanda görüşlərə başlayıb – Ermənistan müdafiə naziri Suren Papikyanla bir araya gəlib.
Azərbaycan ərazisində xidmət aparacaq bu şəxsin Bakını ziyarət etmədən Xankəndi-İrəvan marşrutundan çıxa bilməməsi nə dərəcədə doğrudur?
Hərbi-siyasi şərhçi, ehtiyatda olan polkovnik-leytenant Daşdəmir Əliyev “Bakı-Xəbər”ə açıqlamasında bildirdi ki, Lentsovun təyinatından dərhal sonra Xankəndiyə, oradan da İrəvana gedib Ermənistan müdafiə naziri ilə görüşməsi Kremlin Bakıya xoş olmayan mesajıdır: “10 noyabr razılaşmasına görə, tərəflərdən biri, yəni Azərbaycan istəməsə 5 ildən sonra Rusiya hərbçiləri Qarabağı tərk etməlidirlər. Çox güman ki, Azərbaycanın belə bir addım atacağını təxmin edə bilərik. Rusiyalı rəsmilər doğru olaraq sülhməramlı kontingentin uzadılması barədə heç nə demir, açıqlama vermirlər. Ancaq onlar bu barədə bağlı qapılar arxasında danışırlar. Lentsovun təyinatından dərhal sonra Bakıya gəlmək əvəzinə İrəvana gedib Ermənistan müdafiə naziri ilə görüşməsi doğru addım deyil. Azərbaycan ərazisində xidmət edəcək komandanın Qarabağdakı fəaliyyətini ilk əvvəl Ermənistanın müdafiə naziri ilə müzakirə etməsi Kremlin Azərbaycanın ərazi bütövlüyünə qarşı növbəti təxribatıdır. Rusiya sülhməramlı kontingentinin Qarabağa yeni təyin olunmuş komandiri Aleksandr Lentsov da bu vəzifədə olan sələflərinin ondan əvvəl buraxdıqları səhvi edib. Sülhməramlıların qərargahının yerləşdiyi Xocalıya gələndən dərhal sonra o, Xankəndindəki qanunsuz rejimin qondarma “prezidenti” ilə görüşdü və bundan sonra Ermənistanın müdafiə naziri ilə görüşmək üçün Ermənistana getdi.
İlk baxışda demək olar burda nə var? Yəqin ki, daha sonra Azərbaycanın müdafiə naziri ilə görüşəcək.
Qarabağ Azərbaycanın bütün beynəlxalq ictimaiyyət tərəfindən tanınan ərazisidir. Əvvəllər de-yure idi, indi isə tamamilə de-faktodur. Əminliklə demək olar ki, aprelin 23-də Azərbaycan öz dövlət sərhədlərinin bütün perimetrini nəzarətə götürəndən sonra Qarabağı rəsmi Bakının nəzarəti altında olmayan hansısa xüsusi ərazi adlandırmaq olmaz.
Moskvadan təyin olunan general isə ilk növbədə bu ərazilərin sahibləri ilə, yəni Azərbaycan hökuməti ilə görüşüb özünü tanıtmağa borcludur. O isə bunu ən son edəcək, o da əgər icazə verilsə. Görünür, belə davranmaqla bağlı göstəriş Lentsov və onun sələflərinə Moskvadan verilir. Hamı bilir ki, Kremlin razılığı olmadan sülhməramlı kontingentin komandirləri Qarabağda bir addım belə atmırlar”.
Məhəmmədəli QƏRİBLİ
