Fransa hakimiyyətinin ermənipərəstliklə bağlı həyasızlığı daha da genişlənir. Ermənistanda səfərdə olan Fransanın xarici işlər naziri Katrin Kolonna Armenpress-ə müsahibəsində yenə aşırı təxribatçı mövqedən çıxış edib:
“Dağlıq Qarabağ nümayəndələri və Azərbaycan hakimiyyəti arasında beynəlxalq ictimaiyyətin dəstəyi ilə əhalinin hüquq və zəmanətlərinin məzmununa dair danışıqlar başlamasını istəyirik. Bu, o deməkdir ki, bu danışıqlar üçün əlverişli şərait yaradılmalıdır, həmçinin Laçın dəhlizindən sərbəst hərəkət bərpa edilməlidir. Fransa Dağlıq Qarabağın erməni əhalisinin öz tarixini, irsini və mədəniyyətini qoruyub saxlayaraq, orada təhlükəsiz yaşamağa davam edə bilməsini təmin edəcək istənilən qərarı dəstəkləyəcək. Bu, onun toxunulmaz hüququdur”.
Kolonna həmçinin Parisin Bakının Laçın dəhlizindən maneəsiz hərəkəti təmin etməli olduğu və Beynəlxalq Məhkəmənin bu haqda qərarının icrasının məcburi olduğu haqqında fikrini təkrar edib. Daha sonra Ermənistan SQ baş qərargah rəisinin müşayiəti ilə Cermuk şəhərinə, 2022-ci ilin sentyabrında döyüşlərin baş verdiyi yerə gəlib.
Sözügedən məsələni baki-xeber.com-a şərh edən siyasi şərhçi Azər Həsrət bütün bunlara görə Fransanı sərt tənqid etdi: “Düşünürəm ki, gərək Azərbaycan Fransa XİN başçısının ölkəmizə səfərini rədd edəydi. Yəni, nazirin səfərini qəbul etməməli idi. Hətta qəbul etsəydi belə, şərt qoyulmalı idi. Yəni, əvvəlcə Ermənistana səfər etsin, ondan sonra Azərbaycana. Çünki onların Ermənistanda nə deyəcəyi bizə bəllidir. Əgər Katrin Kolonna əvvəl Ermənistana, sonra Azərbaycana səfər etsəydi, orada belə irəli-geri danışacağı təqdirdə Bakıda onun cavabı verilə bilərdi. Ancaq bunlar əksinə ediblər. Fransa XİN başçısı əvvəl Azərbaycana gəldi, sonra Ermənistana gedib orada sözün həqiqi mənasında ağzına gələni danışdı. Təbii ki, Azərbaycan Fransanın cavabını verdi. Azərbaycan XİN-i bununla bağlı öz münasibətini bildirib. Ancaq hesab edirəm ki, bu, azdır. Hesab edirəm ki, Kolonna Azərbaycana gəldiyi halda prezident səviyyəsində qəbul olunmamalı idi. Çünki Kolonna Ermənistanda məlum açıqlaması ilə bütün diplomatik qaydalara, beynəlxalq hüquqa tüpürdü. Onlara öz yerlərini göstərmək lazımdır. Azərbaycan artıq Fransa ilə münasibətlərdə güzəşt limitini çoxdan doldurub. Bizim onlara güzəştə gedəcəyimiz artıq heç nə yoxdur. Fransa Cənubi Qafqazda iki xalq arasında münasibətlərdə normallaşma məsələlərinə kirli burnunu soxur. Nəticədə bu, normallaşmanın qarşısını alır, maneçilik törədir. Ona görə də Azərbaycan birmənalı olaraq Fransaya mövqe bildirməlidir. Ümumiyyətlə, bundan sonra Fransa ilə hər hansı bir məsələnin müzakirəsini dayandırmalıdır. Çünki Fransa konkret Ermənistandan yana seçim edib və bu, birmənalıdır. Belə olan halda biz niyə onlarla danışıqlar aparmalıyıq, görüş keçirməliyik, müzakirə aparmalıyıq? Zatən, Fransanın mövqeyi bəllidir. O üzdən hesab edirəm ki, artıq bundan sonrakı mərhələdə dövlətimiz Fransa ilə münasibətlər məsələsində fərqli yol xəritəsi cızmalıdır. Fransanın Qarabağ məsələsinə müdaxilə etməsinə şərait yaratmamalıdır. Fransa rəsmilərinin ölkəmizə səfərləri məhdudlaşdırılmalıdır. Həmçinin, Fransanın Azərbaycandakı səfirliyinə məsələ ilə bağlı rəsmi nota təqdim olunmalıdır”.
Vidadi ORDAHALLI
