Azərbaycanlı ekofəallar Laçın-Xankəndi yolunda keçirdikləri etiraz aksiyasını aprelin 28-də saat 18:00-dan müvəqqəti dayandırıb. Aksiya başa çatandan sonra Laçın-Xankəndi yolu Şuşa polisi və Daxili Qoşunların əməkdaşları tərəfindən nəzarətə götürülüb.
138 gün davam edən və beynəlxalq miqyasda böyük reaksiya qazanan aksiyada ekofəalların əsas tələbləri Azərbaycan ərazilərində faydalı qazıntı yataqlarının qanunsuz istismarının dayandırılması, habelə Laçın yolunda Azərbaycanın nəzarət-buraxılış məntəqəsinin yaradılması və sair ilə bağlı olub.
Ekofəalların aksiyanı dayandırmasının səbəbi nədir? 138 gündə ekofəallar nəyə nail oldular?
Aydın Quliyev: “...Ekofəallar böyük qələbə çaldılar, Azərbaycanın dövlət və ictimai mənafelərinin Laçın yolunda müdafiəsi naminə şanlı bir tarix yazdılar”
“Bakı-Xəbər” media qrupunun rəhbəri, siyasi ekspert Aydın Quliyev bizimlə söhbətində bildirdi ki, Laçın yolunda ekofəalların 138 günlük aksiyası Azərbaycanda dövlət və ictimai mənafelərin vəhdət şəklində mövcud olduğunu və inkişaf etdiyini bir daha sübut etdi: “Ekofəalların aksiyasının dayanması Azərbaycan cəmiyyətinin dövlətin siyasətini və dövlətimizin mənafelərini çox yaxşı başa düşdüyünü göstərir. Eyni zamanda ekofəalların aksiyasının başlanması və müəyyən vaxtdan sonra dayanması həm də onun təsdiqi, sübutu oldu ki, Azərbaycan dövləti də hər zaman ictimaiyyətin ən ümdə məsələlərlə bağlı tərpənişlərinə, hərəkətinə və fəaliyyətinə dəstək verməyə hazırdır. Bu aksiyanın 138 gündən sonra könüllü olaraq dayanması həm də onun təsdiqidir ki, Azərbaycan hakimiyyəti, şəxsən Prezident və Azərbaycan cəmiyyəti arasında başadüşülən bir anlaşma mövcuddur. O anlaşma dövlətimizin və cəmiyyətimizin qarşısında duran istənilən problemi, məsələni həll etmək gücündədir. Ekofəalların aksiyası öz məntiqi sonluğuna aid olan bir hədəfi vurdu. Bu da ondan ibarətdir ki, Laçın yolunda ekofəallara Azərbaycan dövləti tərəfindən verilən dəstəyin nəticəsi olaraq Azərbaycanın suveren hüquqları tam şəkildə bərpa olundu. Laçın yolunda nəzarət-buraxılış məntəqəsinin qoyulması bu yolda təhlükəsizliyə və Azərbaycan dövlətinin suveren hüquqlarının qorunmasına artıq böyük bir təminatdır. Artıq Azərbaycanın suveren parçası olan Xankəndi və onun ətrafına qanunsuz yüklərin daşınması və bütünlüklə bu prosesin üzərində şəffaflığın təmin olunmasına şərait yarandı. Belə şəraitdə nəzarət-buraxılış məntəqəsinin yaradılmasının ekofəallar tərəfindən anlayışla qarşılanması bir daha sübut etdi ki, ekofəallar həm özlərinin missiyasını, həm bu aksiyanın hədəflərini gözəl dərk edirlər, həm də aksiyanın gələcəkdə hansı hədəflərə yönəldiyini lazımı şəkildə qiymətləndirirlər. Təsadüfi deyil ki, ekofəallar nəzarət-buraxılış məntəqəsinin yaradılması ilə Laçın yolunda Azərbaycanın suveren hüquqlarının və hərəkətin təhlükəsizliyinin təmin olunmasına lazımı qiyməti verdilər. Eyni zamanda onu da nəzərdən qaçırmırlar ki, Xankəndi ətrafında bizim təbii sərvətlərimizin talan edilməsinin dayandırılması, bu ərazidə monitorinqlərin aparılması üçün lazımı şəraitin yaradılması qarşıda dayanan ümdə vəzifələrdən biridir”.
A.Quliyevin fikrincə, ekofəallar aksiyanı dayandırmaqla bərabər, Rusiya komandanlığının üzərinə də böyük bir məsuliyyət qoydular. Bu da ondan ibarətdir ki, komandanlıq Xankəndi ətrafında təbii ehtiyatların qanunsuz talanmasının dayandırılması və ərazilərdə Azərbaycanın müvafiq dövlət orqanlarının monitorinqinin keçirilməsinə şərait yaratmalıdır. “Əgər bu şərait yaradılmayacaqsa. bizim ekofəalların sülhməramlı komandanlığın üzərinə qoyduğu öhdəlik, məsuliyyət, eyni zamanda bu aksiyanın müəyyən bir müddətdən sonra bərpa olunacağı ehtimalını da gündəmdə saxlayır. Çünki ekofəalların qoyduqları şərt, yəni təbii sərvətlərin, ehtiyatların talan edilməsinə son qoyulması və monitorinqlərə şərait yaradılması şərti yerinə yetirilməyəcəyi təqdirdə aksiya yenidən bərpa oluna bilər. Heç şübhəsiz, ekofəllar özləri də bu şərtin müəyyən müddət sonra yerinə yetirilməyəcəyi halda yeni aksiyaların başlanması üçün əsas olacağını istisna etmirlər. Ona görə də ekofəalların bu aksiyanı dayandırması, fikrimcə, müvəqqəti bir qərar da ola bilər və onun müvəqqəti qərar olub-olmayacağı Qarabağdakı rus sülhməramlı kontingentinin bundan sonrakı davranışlarından çox asılı olacaq. Amma bütün hallarda ekofəallar böyük qələbə çalıdılar, Azərbaycanın dövlət və ictimai mənafelərinin Laçın yolunda müdafiəsi naminə şanlı bir tarix yazdılar”-deyə A.Quliyev vurğuladı.
Rauf Zeyni: “138 gün davam edən aksiya öz müsbət nəticələrini verdi və ekofəallar öz missiyasını uğurla başa çatdırdı”
Milli QHT Forumunun prezidenti Rauf Zeyni “Bakı-Xəbər”ə “Təbii ki, 12 dekabrdan başlayan ekoaksiya dinc aksiya oldu. Bu aksiyanın məqsədi Azərbaycanın faydalı qazıntı yataqlarında qanunsuz istismara son qoyulması, ermənilərin ekoloji terroru dayandırmasına, ermənilərin həyata keçirdiyi eko terrorun dünyaya çatdırılmasına, eyni zamanda Laçın yolunda Azərbaycanın nəzarət-buraxılış məntəqəsi qurmasına nail olmaq idi. Bilirsiz ki, artıq Laçın yolunda nəzarət-keçid məntəqəsi qurulub və gömrük məntəqəsi qurulması da nəzərdə tutulur. Bununla da demək olar ki, ekofəallar qarşılarına qoyduqları məqsədə nail oldular. Eyni zamanda da Volkov rus sülhməramlıları rəhbərliyindən azad olundu və onun yerinə başqası təyin edildi. Demək istəyirəm ki, bu aksiya bütün mənalarda özünün çox böyük tarixi missiyasını yerinə yetirdi. Mən o aksiyanın bütün iştirakçılarına öz təşəkkürümü bildirirəm. Qara, borana, yağışa baxmayaraq onlar istəklərinə nail olana qədər dinc mübarizə apardılar, Azərbaycanın haqlı mövqeyini, haqq səsini dünya ictimaiyyətinə çatdırdılar. 138 gün davam edən aksiya öz müsbət nəticələrini verdi və ekofəallar öz missiyasını uğurla başa çatdırdı”-deyə qeyd etdi.
O vurğuladı ki, Azərbaycanın milli dövlətçilik maraqlarına zidd olan hadisələr baş verərsə belə aksiyalar ölkəmizdə və ölkəmizdən kənarda davam edəcək. O qeyd etdi ki, vətəndaş cəmiyyəti, gənc fəallar və sair hər zaman xalqımızın və dövlətlərimizin maraqlarını müdafiə edir, bundan sonra da bu yolda davam edəcəklər.
İradə SARIYEVA
