Ermənistanın baş naziri Nikol Paşinyan hökumətin iclasında Laçın rayonunda quraşdırılan buraxılış məntəqəsindən danışıb. O bildirib ki, Azərbaycanın Dağlıq Qarabağı ermənilər üçün yeni sərhədə çevirmək cəhdlərinə son qoyulmalıdır və bunun yeganə yolu Qarabağda geniş beynəlxalq mandata malik nümayəndələrin olmasıdır.
Paşinyan deyib ki, "Dağlıq Qarabağ" ermənilərinin hüquqları və təhlükəsizliyi Xankəndi ilə Bakı arasında beynəlxalq format çərçivəsində danışıqların predmetinə çevrilməlidir: “Ermənistanla Azərbaycan arasında mümkün sülh müqaviləsinə gəlincə, onun başadüşülən, funksional icra zəmanətləri və mübahisələrin həlli mexanizmləri sisteminə malik olması lazımdır. Sərhədin delimitasiyası parametrləri aydın şəkildə sənədləşdirilməli və hər hansı eskalasiyanın qarşısını almaq üçün aydın mexanizmlər işə salınmalıdır. Vəziyyətin daha da gərginləşməsinin qarşısını almaq və hərtərəfli nizamlanmaya nail olmaq üçün bizdən və beynəlxalq ictimaiyyətdən konkret və səmimi səylər tələb olunur. Ermənistan bu istiqamətdə mümkün olan bütün səyləri davam etdirəcək. Lakin bu səylərə paralel olaraq Dağlıq Qarabağda və Laçın dəhlizində daha geniş beynəlxalq iştirak hər gün daha çox zəruri olur. Azərbaycanın Dağlıq Qarabağı ermənilər üçün yeni sərhədə çevirmək səylərinə son qoyulmalıdır və bunun yeganə etibarlı yolu Dağlıq Qarabağda geniş beynəlxalq mandata malik nümayəndələrin olmasıdır. İlk addım kimi Laçın dəhlizinə və Dağlıq Qarabağa təcili beynəlxalq faktaraşdırıcı missiya göndərmək lazımdır”.
Deməli, belə çıxır ki, Paşinyan Rusiya sülhməramlılarına etibar etmədiyini açıq etiraf edir?
Hərbi-siyasi ekspert Emin Həsənli “Bakı-Xəbər”ə açıqlamasında bildirdi ki, Paşinyan və onun komandasının Rusiyaya münasibıti bəllidir: “O, hətta Ermənistan-Azərbaycan sərhədinə belə Avropadan müşahidəçiləri dəvət edib, ora yerləşdirdi. Paşinyan Rusiya ilə münasibətlərinin kəskin olmasını zaman-zaman büruzə verir. Bu ozünü həm də onun Kollektiv Təhlükəsizlik Müqaviləsi Təşkilatına (KTMT) olan münasibətində göstərir. Açıq şəkildə deyirlər ki, Rusiya öz hərbi bazalarını Ermənistandan çıxarmalıdır və bundan sonra Ermənistan var gücü ilə Avropaya inteqrasiya olunmalıdır. ABŞ-ın ən böyük səfirliyi məhz Ermənistandadır. Qərb və ABŞ-ın Ermənistana açıq dəstəyini ifadə edir. Paşinyan məhz onların layihəsi kimi meydana çıxdı və Rusiya ilə sıx əlaqədə olan Köçəryan-Sarkisyan ittifaqına qarşı qoyuldu. Bu səbəbdən də Rusiyanın özünün və ordusunun nüfuzdan düşməsi üçün Paşinyan xeyli xidmət göstərir. Rusiya sülhməramlıları bizim əraziləri tərk edəndən sonra bizim öz silahlı qüvvələrimiz bölgədə sülhü təmin edəcəklər. Ermənilər bilir ki, bunun başqa bir alternativi yoxdur. Onlar anlamalıdlr ki, zamanında işğal etdikləri ərazilərimizi sülh yolu ilə azad etməməklə çox böyük yanlışlığa imza atdılar. Həmin səhvi bu mövzuda da buraxmamalıdılar. Azərbaycan dövləti heç bir kənar müşahidəçiyə Qarabağa girməyə icazə verməyəcək. Biz heç Ermənistanın dəvət etdiyi Avropa missiyasına ərazimizdə fəaliyyət göstərməyə icazə vermədik. Sülhməramlıların da orada olmaları müvəqqəti xarakter daşıyır. Mandatlarının müddəti bitən kimi oranı tərk edəcəklər. Bu baxımdan da, Paşinyan ictimai rəyi çaşdırmamalıdır. Yaxşı olar ki, ümumiyyətlə bizim daxili işimizə qarışmasın. Qarabağdakı ermənilərlə bağlı məsələ bizə aiddir və Azərbaycan onlara öz təklifini verib. Vətəndaşlığımızı qəbul edib normal yaşasınlar. Bir nəfər də olsun erməni silahlısı orada qalmamalıdır”.
Məhəmmədəli QƏRİBLİ
