“Deyilən 3 qurumla bağlı sənədlər təqdim edilsə, cinayət işinin açılması mümkündür”
Artıq bir neçə gündür ki, ölkənin gündəmini müxalif dairələrin adının hallandığı saxta mühacir biznesi mövzusu zəbt edib. Bu mövzu əvvəllər də gündəmə gətirilsə də, Almaniya polisinin həyata keçirdiyi əməliyyatdan sonra daha da aktuallaşıb. Son proseslərdə daha çox Müsavat Partiyasının adı hallanır. Ancaq gedən müzakirələrdən görünür ki, bu məsələdə başqa müxalif təşkilatlar da təqsirsiz deyillər. Xatırladaq ki, mühacir alveri ilə məşğul olduğu bildirilən bu şəbəkə Azərbaycandan vətəndaşları aldadaraq pul müqabilində onlara saxta sənədlər, arayışlar verib, habelə onların müxtəlif ölkələrdə yerləşdirilməsinə şərait yaradıb. Uzun müddət mühacir biznesini araşdıran, hazırda Avropada yaşayan jurnalist Xəqani Əliyev son müsahibəsində maraqlı faktlar açıqlayıb: “Mən qaçqın düşərgələrində ən çox NİDA təşkilatının adından gələn şəxsləri gördüm. Sonradan məlum oldu ki, şəbəkədə bu təşkilatın saxta möhürü var. Gəncləri miqrasiya xidmətinə, əsasən NİDA-çı kimi təqdim edirdilər. Siyasi partiyalardan isə ən çox rast gəldiyim Vətəndaş Həmrəyliyi (VHP) və Müsavat partiyalarının adları idi. Hətta VHP-nin adından o qədər müraciət vardı ki, Almaniya Miqrasiya Xidmətinin əməkdaşları bu partiyanı Azərbaycanda ən çox basqılara məruz qalan siyasi təşkilat hesab edirdilər. Müraciət edənlərin bəziləri piketlərdə, mitinqlərdə fotolar çəkdirmişdilər. Çox polis əməkdaşları ilə təmas halında olan fotolara üstünlük verirdilər. Amma sonralar artıq Almaniya miqrasiya idarələrində buna əhəmiyyət vermirdilər”.
Göründüyü kimi, hətta müxalif mövqeli insanlar da mühacir alverində yalnız Müsavatın deyil, digər qurumların da adının daha çox hallandığını qeyd edirlər. Bu xüsusda daha çox 3 müxalif qurumun adı hallanır. Söhbət sənəd saxtalaşdırılması kimi cinayətdən gedirsə, Azərbaycan hüquq-mühafizə orqanları həmin partyalarla bağlı burda araşdırmalara başlaya bilərmi və ya Almaniya polisinin belə tələblə buranın güc qurumlarına müraciət etmək hüququ varmı? Hüquqşunas Mehman Muradlı “Bakı-Xəbər”ə açıqlamasında bildirdi ki, burda işi yalnız partiyalarla məhdudlaşdırmaq olmaz: “Hesab edirəm ki, Azərbaycan hüquq-mühafizə orqanları bu transmilli cinayətkar şəbəkəni kökündən araşdırmalıdır. Belə saxta sənədləri bir çox QHT-lər də verib. Xüsusilə də fəaliyyəti dayandırılan QHT-lər şəxslərə sənədlər verirlər ki, güya onlar ölkədə təqib edilir. Məhz sizin dediyiniz jurnalistin müsahibəsində media adından istifadə edənlərlə də bağlı maraqlı məqam var. Qeyd edir ki, Almaniyanın bir əyalətində sığınacaq almaq istəyən 35 “jurnalistə” rast gəlib. Yadınızdadırsa, biz iki dəfə sizin qəzetdə bu məsələyə toxunmuşuq. Hələ xeyli müddət əvvəl hüquq-mühafizə orqanlarının belə bir araşdırma aparmalı olduğunun zəruriliyini qeyd etmişdik. Burada dərc edilən məlumatlarda konkret faktlar ortaya qoyulurdu, ictimailəşdirilirdi. Həmin vaxt ölkənin daxilində sözügedən qurumlara qarşı cinayət işi başlanmalıydı. Sənəd saxtakarlığı korrupsiya cinayətinə aiddir. Yəni ilkin cinayət işinin başlanması üçün kifayət qədər əsas olub. Almaniya polosinin hərəkətlərindən sonra isə bunu etmək zərurəti bir daha ortaya çıxıb. Hesab edirəm ki, hazırda Azərbaycan hüquq-mühafizə orqanlarının əlində daha ciddi əsaslar var. Əvvəl bunu hətta qanuni əsaslarla etsəydilər belə, daxildəki qüvvələr bunu tam siyasiləşdirməyə çalışacaqdı. Çünki mövzu siyasi qurumları əhatə edəcəkdi. Almaniya ilə bizim aramızda hüquqi yardımla bağlı müqavilə yoxdur. Buna baxmayaraq , kommunikasiyaya keçib, bəzi məlumatları onlardan əldə etmək olar. Güman edirəm ki, bu müraciəti etmək zərurəti Almaniyada yaranacaq. Çünki onların apardıqları cinayət işinin bir qolu konkret olaraq bura gəlib çıxır. Deyilən 3 qurumla bağlı sənədlər təqdim edilsə, cinayət işinin açılması mümkündür”.
Məhəmmədəli QƏRİBLİ
