“Dünyada gedən proseslər göstərir ki, maraqların birgə müdafiəsinə duyulan zərurət get-gedə artır”
Üzv dövlətlərin maraqlarının BMT çərçivəsində birgə səylərlə müdafiə olunması xüsusi əhəmiyyət kəsb edir. Bunu Prezident İlham Əliyev Bakıda Qoşulmama Hərəkatına üzv ölkələrin dövlət və hökumət başçılarının XVIII Zirvə Görüşündəki nitqində deyib. Dövlət başçısının sözlərinə görə, Azərbaycan bu yöndə səylərini daha da artıracaq: “Azərbaycan Qoşulmama Hərəkatında sədrliyi zamanı digər təsisatlarla dialoqun qurulması və inkişaf etdirilməsi, əməkdaşlığın coğrafiyasının genişləndirilməsi üçün səylər göstərəcəkdir. Qoşulmama Hərəkatına üzv ölkələrin əksəriyyəti inkişaf etməkdə olan ölkələr olduğundan, Hərəkat çərçivəsində iqtisadi sahədə əməkdaşlığın inkişaf etdirilməsi çox mühümdür. Bu mənada, keçən ay Azərbaycanın “77-lər qrupu”na qoşulması sosial-iqtisadi sahədə beynəlxalq miqyasda səylərimizi daha da artırmağa imkan verir. Üzv dövlətlərin maraqlarının BMT çərçivəsində birgə səylərlə müdafiə olunması xüsusi əhəmiyyət kəsb edir”. Prezidentin sözügedən ideyanı səsləndirməsi çox mühüm əhəmiyyət kəsb edir. Məsələ ondadır ki, QH-yə üzv dövlətlərin maraqlarının BMT çərçivəsində birgə səylərlə müdafiə olunması reallaşsa, o zaman adıçəkilən hərəkat BMT-də daha mütəşəkkil gücə çevriləcək. Bu da, öz növbəsində, bir sıra problemlərin həllinə öz müsbət təsirini göstərəcək. O üzdən, ölkə başçısının irəli sürdüyü ideyanı ekspertlər necə dəyərləndirir?
Məsələyə münasibət bildirən VİP-in sədr müavini Ramil Hüseynovun sözlərinə görə, QH-də təmsil olunan dövlətlər bunu reallaşdıra bilsələr, o zaman hərəkatın BMT-də real təsir imkanları artacaq: “Nəzərə almaq lazımdır ki, Qoşulmama Hərəkatında 120 dövlət təmsil olunur. Dünyada müstəqil dövlətlərin ümumi sayının 200 olduğunu nəzərə alsaq, 120 dövlətin hərəkatda təmsil olunması kiçik rəqəm deyil. Ona görə də üzv ölkələrin ümumi maraqlarını birgə müdafiə etmələrinə böyük ehtiyac var. Dünyada gedən proseslər göstərir ki, maraqların birgə müdafiəsinə duyulan zərurət get-gedə artır. Xüsusən də QH ölkələri üçün bu daha vacibdir. Adından da göründüyü kimi, QH üzvü olan ölkələr hansısa hərbi blokların üzvü deyil. Bu baxımdan sözügedən dövlətlər öz maraqlarını birgə səylərlə müdafiə etsələr, daha effektiv nəticələrin əldə olunmasına nail olacaqlar. Ən başlıcası, BMT-də ciddi güc mərkəzinə çevriləcəklər. Hansı ki, BMT neçə illərdir bir neçə böyük dövlətin siyasi iradəsindən daha şox asılıdır. Söhbət BMT Təhlükəsizlik Şurasının 5 daimi (ABŞ, Çin, Rusiya, Böyük Britaniya, Fransa) üzvündən gedir. Hesab edirəm ki, QH üzvü olan ölkələr xüsusən separatizm və ikili standartlarla mübarizə məsələlərində səylərini birləşdirməlidir. Çünki separatizm problemi bir sıra ölkələri təhdid edir”.
Vidadi ORDAHALLI
