“Xalqların sülhə hazırlanması prosesində humanitar məsələlər daha ciddi rol oynaya bilər”
Məlum olduğu kimi, Avstryanın paytaxtı Vyana şəhərində Azərbaycan Prezidenti İlham Əliyevlə Ermənistanın baş naziri Nikol Paşinyan arasında görüş keçirilib. ATƏT-in Minsk Qrupunun həmsədrlərinin iştirakı ilə baş tutan görüşdə Prezident İlham Əliyevlə Paşinyanın humanitar sahədə müəyyən tədbirlər keçirməklə bağlı razılığa gəldikləri qeyd edilir. Bu barədə ATƏT-in Minsk Qrupunun yaydığı bəyanatda bildirilir. “Görüş pozitiv və konstruktiv şəraitdə keçib, hər iki liderə öz mövqeyini aydınlaşdırmaq imkanı verib. Onlar tənzimlənmə prosesi üzrə əsas məsələlər haqda fikir mübadiləsi aparıblar. Hər iki lider sülh şəraiti vəziyyətinin yaradılması və münaqişənin dinc yolla həlli yollarının tapılması üçün konkret və qəti addımlar atılmasının əhəmiyyətini vurğulayıb.
Tərəflər Düşənbə danışıqlarını xatırlayaraq, atəşkəs rejiminin qorunub-saxlanmasının vacibliyini vurğulayıblar. Həmçinin, humanitar sahədə bir sıra tədbirlərin hazırlanması barədə razılığa gəliblər. Prezident İlham Əliyev və baş nazir Nikol Paşinyan öz ölkələrinin xarici işlər nazirlərinə yaxın gələcəkdə ATƏT-in Minsk Qrupunun həmsədrləri ilə yenidən görüşməyi tapşırıblar. Onlar birbaşa dialoqu davam etdirmək barədə də razılığa gəliblər”-deyə bəyanatda vurğulanır.
İlham Əliyev və Paşinyan hansı humanitar mövzuda razılaşma əldə etdi?
Millət vəkili, politoloq Elman Nəsirov mövzunu baki-xeber.com-a şərh edərkən qeyd etdi ki, humanitar sahədə razılaşmanın əldə olunması yenidən “xalq diplomatiyası”nın dirçəldilməsi deməkdir. “Azərbaycan Prezidenti İlham Əliyevlə Ermənistanın baş naziri Nikol Paşinyan arasında martın 29-da Avstryanın Vyana şəhərində keçirilən görüşdə münaqişə ətrafında 3 saat yarımlıq müzakirələr keçirilib. Danışıqların gedişatında münaqişənin həlli ilə bağlı ətraflı fikir mübadiləsi aparılıb və burada da humanitar sahədə əməkdaşlıq məsələsi xüsusi qabardılıb və bu istiqamətdə müəyyən razılaşmalar əldə olunduğu haqqında məlumatlar var. Humanitar sahədə əməkdaşlıq deyəndə, hesab edirəm ki, bu ilk növbədə “xalq diplomatiyası”nın yenidən gündəmə gətirilməsi və Azərbaycan və Ermənistan ziyalıları arasında təməsların qurulması ilə bağlıdır. Bu istiqamətdə ziyalıların qarşılıqlı şəkildə səfərləri də ola bilər. Bilirsiz ki, əvvəllər də analoji yanaşma olmuşdu. Sonralar isə Sarkisyan rejimi gördü ki, Ermənistandan Azərbaycana gələn ziyalılar, nüfuzlu şəxslər, ictimaiyyət nümayəndələri Ermənistana geri qayıtdıqdan sonra onların münaqişənin həlli ilə bağlı mövqeyi dəyişir. Ermənistan ictimaiyyətinin nümayəndələri hesab edirlər ki, Ermənistanın Azərbaycana qarşı həyata keçirdiyi işğalçılıq siyasəti nəticəsində həm siyasi, həm iqtisadi, həm sosial, həm hərbi baxımdan bu ölkə geridə qalıb. Belə olduğu təqdirdə Sarkisyan bu prosesi dayandırdı ki, bu təmaslar, bu görüşlər Ermənistanın güddüyü maraqlara ziddir”-deyə bildirən E.Nəsirov hesab edir ki, humanitar sahədə gəlinən razılıq nəticəsində iş sürətlənə bilər. Millət vəkilinin sözlərinə görə, keçən ilin dekabr ayında Milanda xarici işlər nazirləri səviyyəsində aparılan danışıqlarda və ondan sonra xarici işlər nazirlərinin Parisdə keçirilən görüşündə də xalqların sülhə hazırlanması ilə bağlı razılaşmalar əldə edilib. “Xalqların sülhə hazırlanması prosesi bu gün razılaşdırılmış məsələlər sırasında hesab olunur. Xalqların sülhə hazırlanmasında isə hümanitar əməkdaşlıq məsələsi xüsusi əhəmiyyət kəsb edir. Fikrimcə, məsələnin kökündə bu amil dayanır. Xalqların sülhə hazırlanması prosesində hümanitar məsələlər daha ciddi rol oynaya bilər. Bu baxımdan mən “xalq diplomatiyası”nı təsadüfi vurğulamadım”-deyə millət vəkili bildirdi.
İradə SARIYEVA
