Azərbaycan dövlətinə qarşı fəaliyyətdə təqsirli bilinərək Rusiyada saxlanan Fəxrəddin Abbasovla (Abboszoda) bağlı daha sonra fərqli məlumatlar yayıldı.
Əvvəlcə, xaricdə fəaliyyət göstərən bir sıra KİV-də Fəxrəddin Abbasovun saxlandığı cəzaçəkmə müəssisəsindən müəmmalı şəkildə yoxa çıxdığı bildirildi. Sonra məlum oldu ki, həmin şəxs Azərbaycan dövlətinin tələbi əsasında Bakıya ekstradisiya edilib. Martın 1-i günün ikinci yarısında Dövlət Təhlükəsizliyi Xidmətinin yaydığı bəyanatda bildirildi ki, Azərbaycan Respublikasının vətəndaşı Abbasov Fəxrəddin Fərman oğlu Azərbaycan Respublikası Cinayət Məcəlləsinin 281.2 (Dövlət əleyhinə yönələn açıq çağırışlar) və 283.1-ci (Milli, irqi nifrət və düşmənçiliyin salınması, milli ləyaqətin alçaldılması) maddələrində nəzərdə tutulan cinayət əməllərini törətməkdə şübhəli bilinərək, bu əməllərə görə təqsirləndirilən şəxs kimi məsuliyyətə cəlb edilməsinə dair qərar qəbul edilib. Qeyd edilib ki, Bakı şəhəri Səbail Rayon Məhkəməsinin 14 iyul 2018-ci il tarixli qərarı ilə Abbasov Fəxrəddin Fərman oğlunun barəsində həbs qətimkan tədbiri seçilib. Abbasov Fəxrəddin Fərman oğlu Rusiya Federasiyasında müvəqqəti yaşamaq hüququ müddətinin bitməsi ilə əlaqədar Moskva vilayəti Lyuberetsk şəhər məhkəməsinin deportasiya haqqında qərarı icra olunarkən 28 fevral 2019-cu ildə Bakı şəhəri Beynəlxalq Hava Limanında Azərbaycan Respublikası hüquq-mühafizə orqanları tərəfindən saxlanaraq istintaqa cəlb edilib. Hazırda Azərbaycan Respblikasının vətəndaşı Abbasov Fəxrəddin Fərman oğlunun Ermənistan Respublikasına səfərləri, özünün də bildirməsinə görə, Ermənistan xüsusi xidmət orqanı əməkdaşı ilə apardığı görüş və əlaqələrinin mahiyyəti, Ermənistan Respublikasında keçirilən və kütləvi informasiya vasitələrində, sosial şəbəkələrdə yayımlanan tədbirlərə canlı yayımda qoşularaq Azərbaycan Respublikası və onun ərazi bütövlüyü əleyhinə etdiyi çağırışlar və digər əlaqəli məsələlərlə bağlı istintaq araşdırmaları davam etdirilir. Bizim əldə etdiyimiz məlumata görə, Fəxrəddin Abbasovun erməni kəşfiyyatı ilə əlaqədə olduğunu sübut edən kifayət qədər sübut və dəlillər mövcuddur və heç də şübhə yoxdur ki, istintaqa onun düşmən ölkə ilə əməkdaşlığa gedib, Azərbaycan əleyhinə işlər gördüyünü sübut etmək çətin olmayacaq. Abbaszadənin düşmən ölkə ilə əlbir fəaliyyətini onun gizli olmayan addımları da sübut etmiş olur. Abbaszadənin özü sosial şəbəkələrdəki hesablarında bu barədə ətraflı məlumatlar verib, yazılar dərc edib. Xatırladaq ki, Azərbaycana qarşı radikal çıxışlar edən separatçı təşkilat rəhbəri, “Talış Milli Hərəkatı” adlanan qondarma qurumun sədri Fəxrəddin Abbaszadə Moskva vilayətinin Lyuberets rayonunda ötən ilin sentyabr ayında həbs olunub. 2018-ci il sentyabrın 7-də isə Moskva vilayəti Luberets rayon məhkəməsinin hakimi İ.Juravllyovun hökmü ilə Azərbaycana ekstradisiya olunması üçün barəsində həbs-qətimkan tədbiri seçilmişdi. Fəxrəddin Abbaszadə (özünü Faxroddin Abboszoda adlandırır) Azərbaycana düşmən kəsilən separatçı, bir zamanlar ölkəmizi bölməyə və "Talış-Muğan Respublikası" yaratmağa çalışmış Ələkrəm Hümbətov tərəfindən 1993-cü ildə qondarma qurumun "parlamentinin spikeri" təyin olunmuşdu. Xəyanətin qarşısı alındıqdan sonra qaçıb Rusiyaya sığınan F.Abbaszadə uzun müddətdir xaricdən Azərbaycan dövlətçiliyi əleyhinə mütəmadi təxribat xarakterli kəskin çıxışlar edirdi. O, ermənilərə məxsus mətbuat orqanlarında da Azərbaycana qarşı separatçı çıxışlar sərgiləyib. Fəxrəddin Abbaszadənin Ermənistan xüsusi xidmət orqanları ilə sıx əlaqədə olduğuna şübhə yeri qalmırdı. Dəfələrlə İrəvanda separatçı tədbirlərə qatılan Fəxrəddin Abbaszadə Azərbaycanı, hakimiyyəti, müxalifəti, siyasi partiyaları, medianı ən müxtəlif "cinayətlər, repressiyalar, təqiblərdə” suçlayıb. Təsadüfi deyil ki, onun ilk müdafiəsinə qalxanlar da erməni ziyalıları oldu. O, Moskvada saxlanan an Ermənistanda bir qrup alim Fəxrəddin Abbaszadəyə Ermənistan vətəndaşlığının verilməsi üçün baş nazir Nikol Paşinyana müraciət etdi. Onlar vətəndaşlığın Fəxrəddin Abbaszadənin Ermənistan Respublikası və erməni xalqı qarşısında xidmətləri, həmçinin Azərbaycan əleyhinə dövri mətbuatda yazdığı məqalə və açıqlamalarına görə verilməsini təklif ediblər. Müraciəti ünvanlayanlar arasında Ermənistanın Kanadadakı keçmiş səfiri, “Modus Vivendi” analitik mərkəzinin rəhbəri Ara Papyan, keçmiş deputat Araqats Axoyan, BMT-nin eksperti, “Noravank” fondunun vitse-prezidenti Ara Marcanyan, politoloq Qrayr Ulubabyan, Ermənistan Yezidlərinin Milli İttifaqının sədri Əziz Tamoyan, “Arevelk” analitik mərkəzinin rəhbəri Karen Sirunyan, “Ayq” psixoloji mərkəzinin direktoru Varujan Melkonyan, yazıçı Movses Akopyan, jurnalist Natalya Oqanova, əməkdar artist Razmik Xosroyev, ekoloq Karine Danielyan və daha 12 professor var. Maraqlıdır ki, bu cür xaini müdafiə etmək cəhdləri də müşahidə edilir. Əsasən də xaricə mühacir adı ilə sığınan bəzi ünsürlər Abbaszadəni öz millətinin “haqqları” uğrunda mücadilə edən bir cəfakeş donunda cəmiyyətə sırımağa çalışırlar. Onların bu yöndə olan fəaliyyəti əsasən sosial şəbəkələrdə nəzərə çarpır. Azərbaycan cəmiyyətinin isə bu həbsə reaksiyası birmənalı olaraq müsbətdir. Məsələyə ilk reaksiya verənlərdən biri Abbaszadə ilə eyni regionun təmsilçisi olan millət vəkili Hadı Rəcəbli olub. O hesab edir ki, Fəxrəddin Abbasovun taleyi bir çoxları üçün görk olmalıdır: “Avropanın müxtəlif yerlərində oturub ölkəmizin, dövlətimizin əleyinə çağırışlar edən, yalanlar yayanlar, hürən adamlar da ölkəmizə gətirilməlidir. Bu onlara bir mesaj olmalıdır. Bu addım alqışlanmalıdır ki, ölkə, dövlət rəhbərinin əleyhinə aparılan məqsədli kampaniyaya görə onlar hüquqi normalarla cavab verəcəklər. Təmsil etdiyim Lənkəran bölgəsi prezidentimizin ətrafında sıx birləşib və onun apardığı daxili və xarici siyasəti dəstəkləyir. Mən hesab edirəm ki, Fəxrəddin Abbasovun həbsi kimi digərləri barədə də tədbirlər görülməlidir”. Bütün bunlardan bir nəticəyə gəlirik: xəyanətkarın milləti və vətəni olmur. O yalnız ən ağır cəzaya layiqdir.
Məhəmmədəli QƏRİBLİ
