Avroparlamentin bir neçə prinsipial hüquqi və siyasi məsələdə Azərbaycana birbaşa aidiyyəti olan son qətnaməsi həm bu qurumun öz tarixi, həm də Azərbaycan-Avroparlament əlaqələri tarixində əhəmiyyətli faktdır.
Bu sözləri baki-xeber.com-a eyni adlı qəzetin və saytın baş redaktoru, siyasi şərhçi Aydın Quliyev deyib. Onun sözlərinə görə, Avroparlamentin "Xarici fəaliyyət və təhlükısizlik siyasəti"qətnaməsi Şərq tərəfdaşlığı məkanındakı münaqişələrə ikili standart yanaşmanı qadağan etdi, qaçqınlarımızın haqqını etiraf və qəbul etdi,qaçqınlara yardım barədə Avropanın üzərinə öhdəlik qoydu, ermənilərin qətnaməyə milli müqəddəratın təyini ilə bağlı əlavə etmək cəhdinin qarşısını aldı, Azərbaycanın ərazi bütövlüyünün tanınmasına daha bir hüquqi baza yaratdı. Aydın Quliyev deyir ki, qətnamədəki "Avropa Birliyi və üzv ölkələr" ifadəsinin xüsusi qeyd edilməsi məsələnin çox incə və perspektiv nəticələrə hesablanmış nüanslarından biridir:”Bu o deməkdir ki, qətnamə müddəalari tək ümumavropa strukturları üçün yox, eyni zamanda ayrı-ayrı ölkələr üçün də məcburidir. Tək-tək Avropa ölkələrinin dövlət orqanlarının bundan sonra münaqişələrə ikili standartla yanaşması onlar üçün məsuliyyət yaradacaq. Nəzərə alsaq ki, biz dəfələrlə bəzi Avropa ölkələrindən Dağlıq Qarabağ münaqişəsinə digər münaqişələrdən fərqli münasibət görmüşük, qətnamədə bu nüansın əhəmiyyəti bir daha təsdiqlənir. Avropa Parlamentinin qətnaməsi illərdir Azərbaycanın apardığı diplomatik siyasi mübarizənin istiqamətlərindən birinin rəsmən təsdiqi baxımından da əhəmiyyətlidir. Azərbaycan diplomatiyası Avropanın Ukrayna, Gürcüstan, Moldova və Azərbacanın cəlb olunduğu münaqişələrə ikili münasibətlə yanaşdığını sübut etmək üçün prinsipial səylər göstərirdi”.
Siyasi şərhçi qeyd edir ki, Azərbaycan ikili standarta başqa dövlətləri inandırmağa çalışanda bunu bəzən subyektiv yanaşma kimi qəbul edənlərə rast gəlinirdi:”Avroparlamentin qətnaməsi bütün Avropanın skeptik qüvvələrinə təsirli bir dərs oldu. Onu xüsusi qeyd edək ki, Ermənistanın lobbisi Avropanın Dağlıq Qarabağ münaqişəsinə ikili standartla yanaşmasına və bu münaqişənin Gürcüstan, Ukrayna və Moldovadakı münaqişələrdən fərqli dəyərləndirilməsinə nail olmaq üçün çox pullar xərcləyirdi, müəyyən bir dövr üçün buna hətta nail ola da bilmişdi. Avroparlamentin qətnaməsi Ermənistanın 1988-ci ildən Avropada həyata keçirmək istədiyi diplamatik platformanı tam iflasa uğratdı. Azərbaycan bu böyük nəticəyə qədər uzun və çətin yol keçdi. Əldə edilmiş böyük diplomatik-siyasi uğurun arxasında Azərbaycan Prezidentinin şəxsi istedadı və diplomatik bacarıqları ilə müəyyən olunan balanslı siyasət, Avropanın enerji təhlükəsizliyinə səmimi töhfələr və əlbəttə Avropanin sağlam qüvvələri ilə aparılan ardıcıl işbirliyi siyasəti dayanır. Azərbaycan diplomatiyası ən azı 30 il Avropanın canına keçmiş erməni lobbisinin zəhərli dişlərini sındırdı”.
Baki-xeber.com
