Dünya Xəbər Agentliklləri Konqresinə sədrlik Azərbaycana keçib. Trend-in məlumatına görə, bu barədə qərar Dünya Xəbər Agentliklərinin Bakıda keçirilən V Konqresində verilib. AZƏRTAC Dövlət Xəbər Agentliyi 2016-cı ildən 2019-cü ilə qədər Konqresə sədrlik edəcək. AZƏRTAC-ın baş direktoru Aslan Aslanov 2019-2022-ci illər üçün Dünya Xəbər Agentliklləri Konqresin prezidenti seçilib.
Konqresin bağlanış mərasimində həmçinin bəyanat qəbul edilib. APA-nın məlumatına görə, bəyannamədə qeyd edilib ki, rəqəmsal erada müstəqil və qərəzsiz xəbərlər verilməli, jurnalistlərin təhlükəsizliyi təmin olunmalıdır.
Bəyanatda vurğulanıb ki, informasiya cəmiyyətində universal dəyərlərə, qanunun aliliyinə, irqi və etnik müxtəlifliyə hörmət media fəaliyyətində başlıca şərtdir: "Hamını plagiatlığa qarşı mübarizəyə səsləyirik. Qərəzli məlumatların qarşısının alınmasında hamının səylərini birləşdirməyə çağırırıq".
Bəyannamədə Konqresin növbəti iclasının 2017-ci ildə Bolqarıstanın Sofiya şəhərində keçiriləcəyi əksini tapıb.
Qeyd edək ki, 2013-cü ildə Dünya Xəbər Agentlikllərinın Ər-Riyadda keçirilən konqresində AZƏRTAC bir neçə xəbər agentliyi arasında gizli səsvermə yolu ilə daha çox səs tolpayaraq 2016-cı ildən 2019-cu ilə qədər konqresə sədrlik etmək hüququ qazanıb.
Pan Gi Mun Azərbaycana təşəkkür etdi
Bakıda Dünya Xəbər Agentliklərinin V Konqresinin bağlanış mərasimində BMT baş katibi Pan Gi Munun müraciəti oxunub. Müraciətdə söz və ifadə azadlığının qlobal yol xəritəsi üçün vacib olduğu qeyd olunub. Vurğulanıb ki, xəbər agentlikləri informasiyanın yayılmasında mühüm rol oynayır.
Müraciətdə bildirilib ki, internet sayəsində daha çox insanlar informasiya ala bilirlər. Səhv informasiyaların yayılması münaqişələrə, nifrətə zəmin yaradır.
Müraciətdə həmçinin Konqresin yüksək səviyyədə təşkilinə görə Azərbaycana təşəkkür ifadə edilib.
Mikloş Haraşti Bakıda keçirilən tədbiri çox faydalı adlandırdı
ATƏT-in KİV azadlığı üzrə sabiq nümayəndəsi Mikloş Haraşti deyib ki, Bakıda keçirilən Dünya Xəbər Agentliklərinin V Konqresi və Asiya və Sakit Okean Ölkələri İnformasiya Agentlikləri Təşkilatının XVI Baş Assambleyası dünya xəbər agentliklərinin bir-birini daha yaxından tanıması üçün yaxşı bir imkandır.
O qeyd edib ki, dünyada media azadlıqlarının, jurnalistlərin təhlükəsizliyinin təmin edilməsi üçün bir çox işlər görülməlidir: “Bu və ya digər mühüm məsələlərin müzakirəsi üçün Bakıda keçirilən bu tədbir çox faydalıdır”.
Azərbaycanın dünya mediasının inkişafına töhfəsi...
Dünya Xəbər Agentlikləri Konqresinin baş katibi Uffe Riis Sorensen isə deyib ki, Bakıda keçirilən tədbir təcrübə mübadiləsi aparmaq üçün çox yaxşı imkandır. O bildirib ki, Konqres çərçivəsində səmərəli görüşlər keçirilir və xəbər agentlikləri qarşısında duran çağırışlarla bağlı müzakirələr aparılır:
“Bu baxımdan da tədbirin əhəmiyyəti çox böyükdür. Azərbaycan tədbiri yüksək səviyyədə təşkil edib və bu, Azərbaycanın dünya mediasının inkişafına verdiyi bir töhfədir”.
Artıq 4-cü dəfədir Bakıya gəldiyini deyən U.R.Sorensen şəhəri çox bəyəndiyini diqqətə çatdırıb: “Hər dəfə Bakıya gələndə şəhəri çox gəzməyə imkanım olmur, amma çox sevimli bir şəhərdir”.
Bakıdakı tədbirin dünya informasiya siyasətində yeri…
“Azərtac”ın baş direktoru Aslan Aslanov deyib ki, Dünya informasiya siyasətində Dünya Xəbər Agentlikləri Konqresinin çox mühüm yeri var. A.Aslanov deyib ki, dünyanın 7 böyük regional təşkilatı bu konqres ətrafında birləşir: “İlk dəfə 1956-cı ildə Avropa ölkələri xəbər agentlikləri bir araya gəlib Avropa xəbər agentliklərinin işinin istiqamətləndirilməsi, təcrübə mübadiləsi, idarəetmənin təkmilləşdirilməsi və digər məsələlərin həlli məqsədilə Avropa Ölkələri Xəbər Agentlikləri Alyansını yaradıblar. Bu təcrübə səmərəli olduğu üçün sonradan bu cür təşkilatlar digər regionlarda da yaradılmağa başlandı. UNESCO-nun köməkliyi ilə Ərəb ölkələri İnformasiya Agentlikləri Alyansı yarandı, Afrika ölkələri bir təşkilat yaratdı, Latın Amerikası ölkələri başqa bir təşkilatda birləşdilər. Ancaq 2004-cü ildə bu beynəlxalq təşkilatlar qərara aldılar ki, dünya informasiya siyasətinin əsas istiqamətlərini müəyyənləşdirmək üçün üst qurum lazımdır ki, regional təşkilatları öz ətrafında birləşdirsin, təcrübə mübadiləsi daha geniş şəkildə aparılsın və beləliklə də, Dünya Xəbər Agentlikləri Konqresi yaradıldı”.
A.Aslanov bildirib ki, ilk konqres 2004-cü ildə Moskvada keçirildi və dünyanın təxminən 60 ölkəsinin xəbər agentlikləri burada təmsil olundu: “Bu gün konqres dünyanın 100-ə yaxın xəbər agentliklərini öz ətrafında birləşdirir. İndiyə qədər Dünya Xəbər Agentliklərinin bir neçə konqresi keçirilib. Çox sevindirici haldır ki, 2013-cü ildə Ər-Riyadda keçirilən konqresdə biz bir neçə agentlik arasında gizli səsvermə yolu ilə daha çox səs tolpayaraq və 2016-cı ildən 2019-cu ilə qədər konqresə sədrlik etmək hüququ qazanmışıq”.
IRNA konqresin mətbuatın inkişafında yeni yollar tapmağa imkan verəcəyini dedi
Dünya Xəbər Agentliklərinin V Konqresinin keçirilməsi kütləvi informasiya vasitələri nümayəndələrinin bir-birini tanımasına imkan verir. Bu sözləri isə Trend-ə İranın IRNA informasiya agentliyinin icraçı direktoru Məhəmməd Xodadi deyib. O qeyd edib ki, adətən biz həmkarlarımızla ünsiyyət qurmuruq: "Biz evdə oturub ətrafda baş verənlərdən xəbəri olmayan insanlara oxşayırıq. Yeni imkanlardan istifadə etmək və çağırışlarla üzləşə bilmək üçün əməkdaşlığı artırmalıyıq. Fikrimcə, Bakıdakı Konqres mətbuatın gələcək inkişafı üçün yeni yollar tapmağa imkan verəcək”.
O qeyd edib ki, bu cür tədbirlərin keçirilməsi mətbuatın yeni simasını yaratmağa imkan verir.
M.Xodadi deyib: “Jurnalistikanın peşəkarlığını artırmaq, eləcə də jurnalistlərin bacarıq səviyyəsini yüksəltmək lazımdır. Eyni zamanda, təqdim olunan informasiyanın həcmini genişləndirmək lazımdır. Bu sualları müzakirə etmək üçün imkan yaratdığına görə Azərbaycana minnətdarlığımı bildirirəm”.
Azərbaycan üçün çox möhtəşəm bir hadisə…
Ukrayna Milli İnformasiya Agentliyinin baş redaktoru Natalya Kostina isə Bakıda keçirilmiş Dünya Xəbər Agentliklərinin V Konqresinin çox uğurlu tədbir olduğunu deyib. Onun sözlərinə görə, tədbir təkcə ayrı-ayrı mövzulara görə yox, ümumi proqramına görə çox zəngin keçib.
N.Kostina bu Konqresin Azərbaycan üçün çox möhtəşəm bir hadisə olduğunu qeyd edib və bu tədbir çərçivəsində dünyanın müxtəlif xəbər agentliklərinin nümayəndələri ilə ünsiyyət yaratmaq imkanı olduğunu vurğulayıb.
Bakıda əldə edilən təcrübə dünya mediası üçün vacib əhəmiyyət kəsb edir
Bakıda keçirilən Dünya Xəbər Agentliklərinin V Konqresi və Asiya və Sakit Okean Ölkələri İnformasiya Agentlikləri Təşkilatının XVI Baş Assambleyasında əldə edilən təcrübə dünya mediası üçün vacib əhəmiyyət kəsb edir. Bunu isə Portuqaliyanın “Lusa” xəbər agentliyinin prezidenti Teresa Marques deyib.
Dünya Xəbər Agentlikləri Konqresində birinci dəfə iştirak etdiyini deyən T.Marques yeni təcrübə qazandığını bildirib: “Əlbəttə, bu çox yaxşı haldır. Biz hamımız eyni sahədə fəaliyyət göstəririk və bu cür tədbirlər vasitəsilə bir-birimizi daha yaxından tanıyırıq, qarşımızda duran vacib çağırışlarla bağlı müzakirələr aparırırq və onların həlli yollarını araşdırırıq”.
O, tədbirin ev sahibi olan Azərbaycan üçün əhəmiyyətini də qeyd edib: “Dünyanın aparıcı xəbər agentliklərinin rəhbərlərinin gəlib ölkəni tanıması əlbəttə ki, çox yaxşı haldır. Elə mən də birinci dəfədir Bakıya gəlirəm və şəhəri çox bəyəndim, çox gözəl şəhəriniz var”.
“Ukrinfo”nun baş direktoru Bakıdakı Konqresi peşəkarlılıq cəhətdən çox böyük təcrübə hesab edir
Ukrayna Milli İnformasiya Agentliyinin baş direktoru Aleksandr Xarçenko isə deyib ki, Dünya Xəbər Agentliklərinin V Konqresi peşəkarlılıq cəhətdən çox məlumat verir, bu çox böyük təcrübədir. O bildirib ki, burada mətbuat nəhənglərinin inkişafının sirlərini başa düşmək, onların iş üslubu və texnologiyaları ilə tanışmaq olar:
"Çox qısa müddət ərzində bu qədər böyük təcrübə qazanmaq yalnız belə tədbirlər zamanı mümkün ola bilər”.
Dünya Xəbər Agentliklərinin V Konqresi çox vacib tədbirdir
Dünya Xəbər Agentliklərinin V Konqresi çox vacib tədbirdir. Bu sözləri isə Rusiyanın TASS informasiya agentliyinin baş direktoru Sergey Mixaylov deyib.
O qeyd edib ki, yüzə yaxın xəbər agentliklərinin bir yerdə toplanması bu sahədə olan problemlərin müzakirəsinə, təcrübə mübadiləsinə, yeni imkanların və texnologiyaların müzakirə olunmasına imkan verir.
