Erməni mətbuatının xəbərinə görə, iyunun əvvəlində Almaniya Bundestaqı "erməni genosidi” ilə bağlı qətnaməyə baxacaq. Bundestaqda sözügedən sənədə baxılmasının 3 dəfə təxirə salındığını qeyd edən düşmən mətbuatı bu dəfə artıq qurumdan konkret cavab gözləyir. Lakin veriləcək cavabın onları qane edib-etməyəcəyi də indi erməni dairələrində ciddi narahatlıq predmetidir.
Bu arada özünün məkrli mahiyyətini göstərməkdən çəkinməyən erməni tərəfi diqqəti Almaniya ilə Türkiyə arasında son zamanlar daha da yaxınlaşan münasibətlərə çəkir və bildirir ki, milyonlarla türkün yaşadığı Almaniya Ankaranın Avroittifaqla münasibətlərinin əsas formalaşdığı ölkədir.
Yazıda Türkiyənin bu günlərdə Şengen ölkələrilə viza rejimini ləğv etməsinə və Türkiyənin miqrant böhranına verdiyi dəstəyə təşəkkür əlaməti olaraq Aİ ölkələrində də Türkiyə vətəndaşları üçün viza rejiminin qaldırılmasına diqqət çəkilir və maraqlıdır ki, burada da ənənəvi "erməni yanaşması” özünü göstərir. Belə ki, müəllif bildirir ki, Avropa "xristian birliyinin”
"Türkiyənin yad sivilizasiyası” ilə qaynayıb-qarışmasına razı ola bilməz və bu halda Türkiyəni uzaqlaşdırmaq üçün ən "optimal variant” "erməni genosidi” ola bilər. Öz aləmində Almaniya üçün "yol xəritəsi” cızan erməni yazar Almaniyanın ATƏT-in fəaliyyətdə olan sədri kimi iyunun 2-də adıçəkilən sənədi qəbul etməklə Qarabağ münaqişəsinə də son qoya biləcəyini bildirir.
Yazııda yer verilən daha bir detal da ermənilərin Almaniyadan gözləntilərinin özünü doğrultmadığından xəbər verir. Bildirilir ki, aprel müharibəsindən dərhal sonra Ermənistan prezidenti Serj Sarkisyan Almaniyaya səfər edərək Angela Merkelə insidentlərin araşdırılması üçün qoşunların təmas xəttində mexanizmlər yerləşdirməyi təklif edib. Üstəlik ona da diqqət çəkir ki, Rusiya XİN rəhbəri İrəvanda olarkən Qarabağ tənzimlənməsi missiyasının Almaniyaya ötürüldüyünə işarə edib. Lakin bundan bir qədər sonra – 23 apreldə Angela Merkelin Aİ başçısı Donald Tuskla birlikdə "genosidin 101 illiyini qeyd edən Ermənistana deyil”, onun guya baş verdiyi Türkiyəyə səfər etməsi ermənilərin yarasına əməlli-başlı duz basıb. Hələ bu da azmış kimi, Merkel burada Türkiyə rəhbərliyilə bir sıra anlaşmalar əldə edib ki, bunlardan biri də Almaniyanın Türkiyə ərazisində "İncirlik” tipli baza inşa etməsidir. Bütün bunlar isə sözügedən iki ölkə arasında hərbi, strateji və digər sahələrdə əlaqələrin daha da inkişaf etməsindən xəbər verir ki, erməni tərəfini qıcıqlandıran da məhz bunlardır.
Bütün bunlar göstərir ki, proseslərin gözlədikləri istiqamətdə getmədiyinin, üstəlik Rusiyanın da öyrəşdikləri dəstəyi kəsdiyinin fərqində olan erməni tərəfini hazırda bir sual çox düşündürür:”Almaniya kimi seçəcək?”
Samirə SƏFƏROVA
