Azərbaycanın əzəli və əbədi düşməni olan Ermənistanın ölkəmizin irəliyə doğru hər addımına qısqanclıqla yanaşdığı yeni mövzu deyil. Azərbaycanla 20 ildən çoxdur sürən münaqişə dövründə özünün işğalçılıq siyasəti üzündən dünyadan təcrid durumuna düşən Ermənistanın SSRİ-dən ayrıldığı bu illər ərzində yerində sayması, Azərbaycanın isə əksinə, işğala məruz qalmasına və müharibəyə sürüklənməsinə rəğmən, özünün keçdiyi davamlı inkişaf səbəbindən söz sahibi ölkələrlə bir sırada yer alması düşmən dövlətin həzm edə bilmədiyi ən böyük gerçəklikdir.
Məsələ burasındadır ki, Azərbaycana qarşı əsassız torpaq iddialarında bulunan Ermənistanın üzünə Türkiyənin də öz qapılarını bağlaması onun dünyadan təcrid vəziyyətinə düşməsinə səbəb olduğundan, Ermənistan zaman-zaman İranın simasında özünə yeni müttəfiq tapmaq cəhdlərinə baş vurub və bəzi hallarda buna nail də olub. Amma görünür, İrəvanın ambisiyaları daha böyükdür və özünə dost olanın Azərbaycana sıcaq münasibətini heç cür həzm edə bilmir. Dediklərimizin daha bir sübutu olaraq bu günlərdə İranın informasiya texnologiyaları naziri Mahmud Vaezinin Xudafərin HES-in tikintisilə bağlı açıqlamasına erməni tərəfinin verdiyi reaksiyanı göstərmək olar. Xatırladaq ki, iranlı nazir İranın "Azərbaycanla sərhəddə, Araz çayı üzərində Xudafərin HES-in tikintisini sürətləndirdiyini, işlərin tamamlanmaq üzrə olduğunu bildirmişdi və bu xəbəri İran mənbələrinə istinadən Azərbaycanın "Trend” informasiya agentliyi yaymışdı. Bu gün erməni saytlarını birində sözügedən məsələyə toxunulub və bu xəbərin "qəribə” olduğu iddia edilib. Erməni tərəfinin iddiasına görə, İranın inşa etdiyi həmin hidro-elektrik stansiyası onun Azərbaycanla deyil, qondarma "DQR”-lə sərhədində yerləşir və bu HES-in tikintisilə bağlı İranla Ermənistan arasında razılaşma 2007-ci ildə imzalanıb. Erməni saytı onu da bildirir ki, Azərbaycan elə o zaman bu məsələyə etiraz etmiş, lakin guya İran buna əhəmiyyət verməmiş, lakin tikintini də yarımçıq qoymuşdu. İstər-istəməz sual yaranır: İran tərəfi Azərbaycanın etirazını qulaqardına vurmuşdusa, HES-in tikintisi bu illər ərzində niyə davam etdirilməyib? Cavab, təbii ki, aydındır. Bunun ardınca ötən il Azərbaycan Prezidentinin İrana baş tutan səfəri və bu səfər çərçivəsində bir sıra sənədlərin imzalanmasına diqqət çəkilir. Bildirilir ki, həmin sənədlər sırasında su resurslarının birgə işlənməsinə dair də sənəd imzalanıb ki, bu da "Xudafərin” və "Qız qalası” su hövzələrini əhatə edib. Sayt yazır ki, Qarabağ ərazisi olmasına baxmayaraq, sənəd İran və Azərbaycan arasında bir-birinin ərazi bütövlüyünə hörmət və su resurslarının birgə istifadə olunmasını ehtiva edir. Eyni zamanda bildirilir ki, həmin sənədin imzalanmasında İranın Azərbaycanın ərazi bütövlüyünün BMT qətnamələri əsasında təmin olunmasının zəruriliyi fikrində olduğu da əksini tapıb. Elə ən maraqlısı da odur ki, indi erməni tərəfi İranın bu hərəkətilə ona hansı mesajı verdiyi üzərində baş sındırır. Bildirilir ki, fevral ayında İranın bu hərəkəti onun Azərbaycana kart-blanş verməsi kimi yozulub. Və daha maraqlısı, sözügedən məsələ ilə dördgünlük müharibə arasında hansısa bağlar olduğu iddia edilir. Bildirilir ki, cəmi ay yarım sonra Azərbaycan Qarabağa hücum (!) etdi və hücum istiqamətlərindən biri Qarabağın İranla həmsərhəd ərazisi idi. Elə "xoruzun quyruğu” da bu məqamda görünür. Sayt İranın bu hərəkətilə "hansı mesajı verdiyini” götür-qoy edərkən, sanki özü də fərqində olmadan özünün əsl narahatlığını büruzə verir. Diqqət edin: məqalə bu sualla bitir:”İran bu sənədi imzalamaqla nə demək istədi? Yoxsa bu o deməkdir ki, HES inşa olunacaq və inşaat bitən zaman həmin ərazilər kimin əlində olacaqsa, əməkdaşlıq da onunla ediləcək?”
Əlavə şərhə ehtiyac olmasın gərək...
Samirə SƏFƏROVA
