Dörd günlük aprel müharibəsində Azərbaycanın Qarabağ bölgəsində onilliklərdir işğal altında saxladıqları ərazidə bir neçə yüksəkliklə bərabər həm də Rusiya kimi dayağını itirən Ermənistan üstəlik artıq Qərbin də gözündən düşdüyünün, "məzlum xalq” maskasının yırtıldığının fərqindədir və belə görünür ki, bu itkilərilə qətiyyən barışmaq niyyətində deyil.
Bunun konturlarını elə bu ölkənin şər-böhtan dolu gündəlik mətbuatını izləməklə də görmək olar. Şər mətbuatının bugünkü qəhrəmanı isə deputat, "Çiçəklənən Ermənistan” partiyasının sədri Naira Zoqrabyandır. Erməni deputat budəfəki çıxışında aprel müharibəsinin əsasının AŞPA-nın yanvar sessiyasında qoyulduğunu bildirərək bəyan edir ki, qurum Sərsəng su anbarı ilə bağlı məsələnin lehinə səs verməklə Azərbaycana "özünün genişmiqyaslı aqressiyasını yeritmək üçün kart-blanş verib”. O, eyni zamanda, AŞPA sədri Pedro Aqramuntun "Əliyev rejimini dəstəklədiyinə görə” məsuliyyətə cəlb olunmasına çağırıb. İç üzləri açılandan sonra artıq kimləri qandırmağa hesablandığı bəlli olmayan tipik erməni iftiraları ilə dolu çıxışında erməni deputatı Azərbaycan tərəfinin dördgünlük müharibədə "törətdiyi vəhşiliklərdən” ağızdolusu danışsa da, onları daha çox ağrıdan məsələnin Qərbin himayəsindən kənarda qalmaqları olduğu aydın sezilir. Belə ki, o, AŞPA prezidenti Pedro Aqramuntu "sivil dünyanın gözü qarşısında aqressiyanı dəstəkləməkdə” günahlandırmaqla qalmayaraq, həmin günlərdə Assambleyanın Azərbaycanı dəstəkləyən bəyanatının "hərbi cinayətkarları ruhlandırdığını” bildirir. Bu yerdə erməni partiya lideri AŞPA prezidentini İlham Əliyevin mətbuat katibi adlandırmaqdan da çəkinmir və bildirir ki, Pedro Aqramuntun AŞPA-da "Azərbaycanın rəsmi nümayəndəsi olduğu hər kəsə məlum həqiqətdir”.
"AŞPA-nin tarixində belə bir presedent yxdur ki, qurumun rəhbəri təşkilatçılıqla deyil, ayrı-ayrı ölkələrin maraqlarını dəstəkləməklə məşğul olsun. AŞPA prezidenti seçilməsinin ardından ilk səfərini Azərbaycana etməklə, Pedro Aqramunt Əliyevə sədaqətini nümayiş etdirdi. O ağır günlərdə (2-5 aprel) isə verdiyi bəyanatda açıq mətnlə Azərbaycana dəstək verdi” – deyə Zoqrabyan bildirib. Onun sözlərinə görə, 47 ölkənin birləşdiyi, 800 milyon avropalının maraqlarını müdafiə etməli olan qurumun rəhbəri obyektiv olmaq əvəzinə özünü "Azərbaycan Prezidentinin mətbuat katibi kimi” aparır. Deputatın fikrincə, qurumun yanvar sessiyasında Azərbaycanın humanitar fəlakət kimi təqdim etdiyi Sərsəng su anbarı ilə bağlı məsələnin gündəliyə salınmasında məqsədi əslində problemi həll etmək deyil, Sərsəngi ələ keçirmək idi və son hadisələr də bunun davamı oldu: "Aqressiya günlərində Azərbaycan Ordusunun qüvvələrinin yerdəyişməsini izləyin və o zaman əmin olacaqsız ki, Sərsəng məsələsində onların lehinə səs verməklə Azərbaycana aqressiyasını yürütmək üçün kart-blanş verdiniz”.
Məsələ burasındadır ki, Qarabağ probleminin başladığı dönəmdən indiyə kimi istər özlərinin fitnəkarlıq bacarıqları, istərsə də lobbilərinin bir çox aparıcı dünya ölkələrində güclü olması səbəbindən ermənilər hər zaman müxtəlif ranqlı beynəlxalq təşkilatlarda onların lehinə qərar çıxarılmasına artıq alışıblar. Lakin Azərbaycanın bu illər ərzində özünü toparlaması zaman alsa da, artıq son illərdə bu zamanın onların lehinə işləmədiyinin fərqindədilər ki, bu da az qala onları affekt vəziyyətinə gətirir. Belə ki, Azərbaycan hazırda regionun aparıcı dövləti olmaqla haqq səsini daha ucadan səsləndirməyə başlayıb və artıq dünya bu səsi eşitməyə məhkumdur. Təklənən və arxasız durumu ilə heç cür barışmaq istəməyən Ermənistan isə, haqsız durumda olduğunu bilsə belə, daxilində saatlı bomba kimi hər dəqiqə onu təhdid edən sosial narazılığı yatırmaq üçün daxili auditoriyaya hesablanmış belə çıxışlarla emosiyaları qismən yatırmaqdan başqa çıxış yolu görmür.
Xatırlayırsınızsa, hələ ötən iln sonlarında AŞPA-nın yanvar sessiyasında Azərbaycanla bağlı gündəliyə salınan məsələlərin dəstəklənəcəyinin "qoxusunu alan” ermənilər ciddi hərəkətə keçmişdilər və əks-həmləyə hazırlıq görürdülər. Lakin AŞPA-da səs çoxluğunun Azərbaycanın yanında olması onları susmağa vadar etdi. Partiya sədri səviyyəsində verilən son açıqlamalar isə göstərir ki, ermənilər bu fiaskonu həzm edə bilməyib və onu dördgünlük müharibənin zəmini adlandırır. Bunu həm də "müharibəni Azərbaycan başladı” kimi dövriyyəyə buraxdıqları cəfəng fikrin şüurlara yeridilməsi cəhdi saymaq olar. Amma özləri də fərqindədirlər ki, artıq belə cəhdlər keçmir: nahaq deməyiblər ki, haqq nazilər, üzülməz...
Samirə SƏFƏROVA
