"Biz müharibə aparmamışıq, Ermənistan tərəfinin təxribatına cavab vermişik". Bunu Milli Məclisin spikeri Oqtay Əsədov bu gün keçirilən plenar iclasda deyib.
O.Əsədov deyib ki, əgər Azərbaycan müharibə aparsaydı, bir həftə sonra müharibə hara gedib çıxacaqdı, hamı onu yaxşı bilir: "Ona görə Azərbaycan ilk dəfə birtərəfli atəşkəs elan etdi. Azərbaycan həmişə münaqişənin sülh yolu ilə həll edilməsinin tərəfdarı olub. Ancaq Azərbaycan dövləti, onun hərbçiləri göstərdilər ki, biz bu məsələni hər cür həll etmək iqtidarındayıq və bu da o 5 günlük toqquşma zamanı özünü göstərdi".
Spiker əlavə edib ki, bu, Ermənistanı sülhə məcbur etmək üçün ən vacib məsələlərdən biri olub: "İndi danışıqlar gedir. Güman etmək istəyirik ki, bu məsələ öz həllini tapacaq".
Onlar özləri kölgədədir
Siyavuş Novruzov isə bildirib ki, Azərbaycan Prezidenti İlham Əliyevin apardığı siyasət nəticəsində bütün dünya ölkələrindən Azərbaycana dəstək gəlir.
O qeyd edib ki, İslam Əməkdaşlıq Təşkilatından da Azərbaycana çox böyük dəstək gəldi: "Bu Azərbaycan Prezidentinin apardığı siyasətin nəticəsi və ordumuzun gücünün göstəricisidir. Amma təəssüflər olsun ki, bəzi mətbuat orqanları xoşa gəlməyən yazılar yazır və Azərbaycanın bu uğurlarına kölgə salmağa çalışırlar. Bu da bəllidir ki, onlar antimilli qüvvələrin dəyirmanına su tökənlərin işidir".
S.Novruzov bildirib ki, cəbhə xəttində son hadisələr zamanı Azərbaycan xalqı göstərdi ki, Ali Baş Komandanla, Ordu ilə bir yerdədir: "Milli Məclisin deputatları da şəhidlərimizin dəfnində yaxından iştirak etdilər. Ancaq bəzi mətbuat orqanları yalan yazmaqla buna kölgə salmağa çalışır".
S.Novruzov bildirib ki, müvafiq qurumlar həmin mətbuat orqanları ilə əlaqədar iş görməlidir.
Milli Məclisin spikeri Oqtay Əsədov isə bildirib ki, həmin mətbuat qurumları özləri kölgədədir: "Çox təəssüf ki, ABŞ mətbuatında Ermənistanın işğalı haqqında bir məqalə çıxdı, amma həmin mətbuat orqanları bununla bağlı bir cümlədə yazmadı".
Vaxtilə 60-70 nəfərin qarşısından qaçanlar bu gün müharibə təbliğatı aparır
"Elə mövzular var ki, onların üzərində siyasət qurmaq olmaz, bu addımı atanlar lənətlənməlidir". Bunu isə deputat Qüdrət Həsənquliyev deyib. Q.Həsənquliyev bildirib ki, vaxtilə 60-70 nəfərin qarşısından qaçanlar bu gün müharibə təbliğatı aparır: "Avropa Şurasında çıxış edən Əli Kərimli demişdi ki, Ermənistan və Azərbaycanda hakimiyyətlər dəyişməyincə, münaqişə həllini tapmayacaq. O zaman hətta "Azadlıq" qəzeti yazdı ki, Əli Kərimli bu çıxışı ingilis dilində oxudu. İndi belə bir adam durub deyir ki, müharibə lazımdır. Bu cür riyakar insanlara qarşı cəmiyyət öz sözünü deməli, münasibətini bildirməlidir".
Q.Həsənquliyev deyib ki, indi hamı başa düşür ki, Əli Kərimli kimilər adamların vətənpərvərlik hisslərindən istifadə edərək siyasi hakimiyyətə gəlmək istəyirlər: "Onun atəşin dayandırılmasının əleyhinə çıxış etməsinin səbəbi xalqın əhval-ruhiyyəsinin həddindən artıq yüksək olması ilə bağlı idi. Gördü ki, qətiyyətli addımları və ortaya qoyduğu xarakter, şəhidlərə hörmət Prezidentin xalq arasında populyarlığını xeyli dərəcədə artırdı".
Bəzi deputatlar avtomobilləri üçün xüsusi nömrə tələb edirlər
Millət vəkilləri Tahir Kərimli və Fəzail Ağamalı isə tədbirlərə gedərkən avtomobillərinin yol polisi tərəfindən müxtəlif vaxtlarda saxlanılmasından şikayətləniblər (APA). F. Ağamalı deyib ki, Milli Məclisin iclasına tələsərkən də avtomobillərinin yol polisi tərəfindən saxlanılması halları olub. O bildirib ki, hətta yol polislərinə parlamentin iclasına tələsdiklərini deyərkən də bu, nəzərə alınmayıb: "Araşdırmışam, elə nömrələr var ki, saatda 200 km sürətlə gedərkən də həmin avtomobil saxlanılmır. Deputatlara da 2020-ci ilə qədər həmin nömrələrdən verilsin. Sonra kim yenidən seçilsə, nömrə qalsın, seçilməyən nömrəni təhvil versin”.
Sədr Oqtay Əsədov isə qeyd edib ki, xüsusi nömrə məsələsi yoxdur: "Milli Məclisin iclasına gecikməmək üçün tələsərkən avtomobiliniz saxlanılıb, cərimələnsəniz, o cəriməni mən verərəm. Ancaq hər kəs qanunun tələblərinə riayət etməlidir”.
Öz dilində danışmayan, öz dilini bilməyən elita milli elita sayılmır
Tahir Kərimli Bakı şəhərində Azərbaycan dilinə sayğısızlığın olmasından da şikayətlənib. T. Kərimli deyib ki, şəhərdə az qala uşaqlar da rus dilində danışır. T. Kərimli bildirib ki, xüsusən milli elitaya daxil olan bir sıra şəxslər Azərbaycan dilində danışmırlar. Millət vəkili bu kimi hallara nəzarət edilməsini vacib sayıb.
Spiker Oqtay Əsədov isə qeyd edib ki, öz dilində danışmayan, dilini bilməyən elita milli elita sayılmır: "Azərbaycan dili dövlət dilidir. Azərbaycanda həm də rusdilli məktəblər var. Lakin mən elə bir dövlət təşkilatı tanımıram ki, orada Azərbaycan dilində danışmasınlar. Dövlət dili ilə bağlı qanunlar qəbul etmişik və çalışmalıyıq ki, bu qanunları pozmayaraq”.
Əflatun Amaşov mətbuatın fəaliyyəti barədə tənqidlərə münasibət bildirdi
Mətbuat Şurasının sədri, millət vəkili Əflatun Amaşov isə Milli Məclisdə bəzi mətbuat orqanlarına qarşı yönələn tənqidlərə münasibət bildirib. Ə. Amaşov bildirib ki, Dağlıq Qarabağda 4 günlük hərbi əməliyyatlar dövründə Azərbaycan mətbuatı bütövlükdə normal fəaliyyət göstərib: "Lakin təəssüf ki, bəzi hallarda bəzi mətbuat orqanları baş verən olaylara kiçik prizmadan yanaşdı”.
Ə. Amaşov mətbuatda Milli Məclis üzvlərinin fəaliyyəti ilə bağlı yazılara da münasibət bildirib: "Milli Məclislə bağlı yazılar kifayət qədər qərəzli və qeyri-obyektivdir. Mən Mətbuat Şurasının sədri kimi bu məsələni qınayıram. Çalışmalıyıq ki, nəinki Milli Məclis, heç bir qurum barədə neqativ, qərəzli məlumat getməsin”.
Sosial evlərdə kirayə haqları 100 manat və daha aşağı olmalıdır
"ASAN xidmət" layihəsi kimi, sosial evlər layihəsinin də Azərbaycan modeli yaradılmalıdır". Bunu isə millət vəkili Əli Məsimli deyib.
"Son 10 ildə Azərbaycanda sosial ipoteka ilə ev alanların sayı 4 min nəfərdən artıqdır. Hesab edirəm ki, sosial evlər layihəsi ilə ev alanların sayı sürətlə artacaq. Bunun üçün "ASAN xidmət" kimi, sosial evlər layihəsinin də Azərbaycan modeli yaradılmalıdır. Bunun üçün məqsədli planın hazırlanması, atılacaq addımların müəyyənləşdirilməsi və maliyyələşmə imkanlarının yaradılmasına xüsusi diqqət yetirilməlidir. Sosial evlər layihəsində xarici maliyyə mənbələrindən də istifadə etmək olar" – deyə deputat bildirib.
Ə. Məsimli qeyd edib ki, sosial evlər layihəsinin icrasına başlanan zaman ölkədə ali təhsil müəssisələrinin, sənaye obyektlərinin Bakı şəhərinin kənarına köçürülməsi məsələsi nəzərə almalıdır: "Azərbaycanda orta aylıq əmək haqqı 500 manatdan azdır. Büdcə təşkilatlarında çalışanlar 200-300 manat əmək haqqı alır. Regionlarda əhalinin gəliri isə ölkədəki orta aylıq əmək haqqından 1,5-2 dəfə aşağıdır. Bunu nəzərə alaraq sosial evlər layihəsinin icrasına başlanan zaman kirayə haqlarının 100 manat və ya bundan aşağı məbləğdə müəyyən edilməsini təklif edirəm".
Bankirlər parlamentə dəvət edildi
Millət vəkili Vahid Əhmədov isə bildirib ki, Azərbaycanın bank sektorunda çox ciddi problem yaranıb. Bu problemlərin həll edilməsi üçün ölkədəki bank rəhbərləri Milli Məclisə çağırılmalıdır. "Banklarda likvidlik problemi var. Kredit portfelində göstəricilər qənaətbəxş deyil. Azərbaycanda əmanətlərin 83%-i dollarda saxlanılır. Əmanətlərin sığortalanması haqqında qanun qəbul etsək də, manatda olan əmanətlərin həcminin artmasını müşahidə etmədik. Əhali banklarda olan 5-10 min manat əmanətini belə geri götürə bilmir. Mən əvvəllər də təklif etmişdim. İndi də təklif edirəm ki, bu məsələ ilə əlaqədar gəlin bankların rəhbərlərini Milli Məclisə dəvət edək. Problemləri müzakirə edək. Bu vəziyyəti aradan qaldırmaq üçün çox ciddi addımlara ehtiyac var. Qısa müddətdə bu istiqamətdə addımlar atılmasa, Azərbaycan iqtisadiyyatında çox ciddi problemlər yaranacaq. Azərbaycan prezidenti tütünçülük, pambıqçılıq və sair sahələrin inkişafı ilə bağlı göstərişlər verib. Bu göstərişlərin yerinə yetirilməsi üçün bank sistemi çevik işləməlidir. Bir daha müraciət edirəm ki, bank rəhbərləri Milli Məclisə dəvət olunsun və problemlər birgə müzakirə olunsun” – deyə V.Əhmədov bildirib.
Şagirdə görə valideynin 100 manat cərimələnməsi ləğv edildi
Milli Məclisin iclasında "Azərbaycan Respublikasının İnzibati Xətalar Məcəlləsində dəyişiklik edilməsi haqqında” qanun layihəsi də müzakirəyə çıxarılıb. Dəyişiklik 4 ay əvvəl qüvvəyə , İnzibati Xətalar Məcəlləsinin 189-cu maddəsinin 2-ci bəndinin ləğv edilməsi ilə əlaqədardır.
İnzibati Xətalar Məcəlləsinin 189-cu maddəsinin 2-ci bəndinə əsasən müvafiq icra hakimiyyəti orqanının müəyyən etdiyi səbəblər istisna olmaqla, dünyəvi icbari ümumi orta təhsil üzrə dərs gününün şagird tərəfindən bir ay ərzində 7 gündən çox buraxılmasına görə valideynlər və ya onları əvəz edən şəxslər yüz manat məbləğində cərimə edilir.
Millət vəkili Elmira Axundova Milli Məclisin 4 ay əvvəl qəbul etdiyi qanunun ləğvini düzgün saymayıb. Spiker Oqtay Əsədov isə ötən illərdə çoxlu sayda qanun layihələrinin geri qaytarıldığını xatırladıb: "Elmira xanım, siz bu məsələyə niyə belə reaksiya verirsiniz?”.
Məsələ Milli Məclisdə səs verməyə çıxarılaraq qəbul edilib və övladının məktəbə davamiyyətsizliyinə görə valideynin cərimələnməsi nəzərdə tutan cəza ləğv edilib.
