Bəşəriyyəti daha çox düşündürən, sonu ölümlə, fəlakətlə bitən narkomaniya son illər cənub mirvarisi Lənkəranda geniş yayılıbdır.
Odur ki, insan həyatını məhv edən, “ağ ölüm” kimi tarixə düşən bu dəhşətli bəlaya qarşı daha ciddi, sistemli tədbirlər görmək tələb olunur. Lənkəran polisi tərəfindən bu missiya müxtəlif kollektivlərdə, eləcə təhsil, mədəniyyət ocaqlarında vaxtaşırı aparılır. Lənkəran Şəhər Tibb Kollecində Şəhər Gənclər və İdman İdarəsinin, Lənkəran Şəhər-Rayon Polis Şöbəsinin birgə təşkilatçılığı sayəsində baş tutan tədbir də sağlam həyat tərzinin təbliği, narkomaniyadan, digər yanlış hərəkətlərdən, neqativ hallardan gəncləri uzaq salmaq məqsədi daşıyırdı. "Narkomanlığın insanların həyat və sağlamlığına zərərli təsiri" və "Sağlam həyat tərzi" mövzusunda maarifləndirici tədbirə qatılanlar isə Şəhər Gənclər və İdman İdarəsinin nümayəndəsi Yusif Xamiyev, Şəhər-Rayon Polis Şöbəsinin şəxsi heyətlə iş üzrə rəis köməkçisi, polis polkovnik-leytenantı Anar Həbibzadə, polis mayoru Fazil Bağırov, polis əməkdaşı İsmət Fərəcli, Kollecin direktoru Solmaz Babayeva, eləcə kollecin 103 tələbə və bir qrup müəllim heyəti idi.
Tədbir zamanı natiqlər dövrümüzün ağır bəlasına çevrilən narkomaniyanın zərərindən, insan sağlamlığı üçün yaratdığı təhlükədən, narkotik vasitələrdən yaranan asılılıqdan, ölkəmizdə, həmçinin Lənkəranda “ağ ölüm”ə qarşı aparılan mübarizədən söhbət açdılar: “Narkotik vasitələrdən istifadə edən hər bir şəxs uğurlu gələcəyindən imtina etməklə, cəmiyyətdə həmişə geridə qalır və aludəçiliyin, zərərli təsirlərin ağır fəsadlardan qurtula bilmir. Gələcəkdə xalqı, Vətəni üçün gərəkli övlad olmaq istəyən bu günün gənci ilk növbədə zərərli vərdişlərdən, o cümlədən narkomaniyadan uzaq durmalıdır”.
Natiqlər onu da vurğuladılar ki, dövlət başçısı İlham Əliyev ölkə vətəndaşlarının sağlam həyat sürməsini prioritet məsələ kimi irəli sürür. Sağlam gələcək naminə indiki zamanda gəncləri idman məşqlərinə və kütləvi idman tədbirlərinə cəlb etmək olduqca böyük əhəmiyyətə malikdir.
Daha sonra mövzu ətrafında tələbələrlə müzakirələr aparıldı, onlar düşündürən suallara polis əməkdaşlarının tərəfindən ətraflı cavab verildi. Narkomaniyanın törətdiyi fəsadları özündə əks etdirən video-çarxın nümayiş ilə tədbir başa çatdı.
Zəfər ORUCOĞLU
Azərbaycan Jurnalistlər Birliyinin üzvü
