Ölkədə dərman preparatlarının baha qiymətə satılması, apteklərdə tapılmaması gündəm mövzulardan biridir. Milli Məclisin Səhiyyə komitəsinin iclasında da dərman bazarında yaşanan problemlər müzakirə edilib.
Millət vəkili Rəşad Mahmudov qeyd edib ki, Azərbaycanda dərmanların qiyməti qonşu ölkələrlə müqayisədə 3-4 dəfə bahadır: “Ölkədə zəruri dərmanları tapmaq çətindir. Həmin dərmanları xəstəlik dövründə tapmamaq vəziyyəti daha da çətinləşdirir. Qonşu ölkələrlə müqayisədə dərmanların qiyməti qat-qat bahadır. Bu problemi özəl şirkətlərdən də soruşduqda, “siz bizim dərdimizi başa düşmürsünüz” deyirlər”.
Onu da qeyd edək ki, əvvəllər əksər insanlar xaricdən gələn dostuna-tanışından, qohumundan xahiş edir ki, ona lazım olan dərmanları alıb gətirsin. Əvvəllər əldə dərman gətirməyə bir söz deyilməsə və insanlar onlardan xahiş edilən dərmanları sərbəst şəkildə gətirsələr də, son zamanlar yalnız bir dərmanın gətirilməsinə icazə verilir.
Sözsüz ki, bu da insanlar arasında narazılıq yaradır. Bizim apteklərdə odu bahasına olan dərmanların qardaş Türkiyədə və başqa ölkələrdə su qiymətinə olması insanlarımıza imkan yaradırdı ki, müəyyən vasitələrlə o ölkələrdən dərman əldə etsinlər.
Qeyd etdiyimiz kimi, bu gün ölkənin dərman bazarında çoxlu sayda problemlər yaşanır. Bu sahədə yaşanan problemlər necə həll edilməlidir ki, insanlar xəstələnən zaman dərman qıtlığı və qiyməti ilə bağlı narahatlıq yaşamasın.
“Yaxşı olar ki, əhali üçün əlçatan, xüsusilə qiymətlərdə müvafiq dərmanların idxalı Türkiyədən həyata keçirilsin…”
Professor, tibbi ekspert Adil Qeybulla bildirdi ki, bu gün Azərbaycanın dərman bazarında böyük problem yaşanır: “Məlumdur ki, "Azərbaycana dərman Ukrayna, Belarus və Rusiyadan idxal olunurdu. Rusiya ilə Ukrayna arasında gedən müharibə və infrastrukturun xeyli zərər çəkməsi müəyyən dərmanların yoxa çıxmasına gətirib çıxardıb. Azərbaycan dərmanla bağlı idxaldan asılı olan ölkədir. Bizim dərman sənayemiz, demək olar ki, məhdud həcmi əhatə edir. Bu, problemin obyektiv səbəbidir. Subyektiv səbəblərə gəlincə, deyə bilərəm ki, bu, dərman idxalı ilə məşğul olan strukturların vəziyyəti vaxtında dəyərləndirməyib, lazımı tədbirlərin görülməməsidir. Məsuliyyət onların üzərindədir. Yaxşı olar ki, əhali üçün əlçatan, xüsusi ilə qiymətlərdə müvafiq dərmanların idxalı Türkiyədən həyata keçirilsin. Həm bu dərmanlar kifayət qədər keyfiyyətlidir, həm də qiymətləri bizə müvafiqdir”.
Günel CƏLİLOVA
