Azərbaycan məktəblərinin xeyli bir hissəsi gündəmə uğurları və nailiyyətləri ilə gəlmir, daha çox qalmaqallarla diqqəti çəkir. Xüsusən də, bəzi məktəblərə rəhbərlik edən şəxslərin davranışları daim müzakirə predmetinə çevrilir.
İndiyə qədər bir neçə məktəb direktoru qeyri - ciddi davranış sərgiləyib ki, bu da ciddi söz-söhbətə səbəb olub. Xəzər rayonu Mərdəkan qəsəbəsi 124 saylı məktəbin direktoru Adil Əliyevin də məlum davranışları xeyli tənqid olunub. Belə ki, bu günlərdə Novruz bayramı ərəfəsində Xəzər rayonu Mərdəkan qəsəbəsi 124 saylı məktəbin direktoru Adil Əliyev bayram tədbirlərinin birində əyninə qırmızı xalat geyinib, başına tac qoyaraq özünü Ərtoğrul Qaziyə bənzədib.
Direktor səhnələşdirilmiş tədbirə o qədər aludə olub ki, əmr və göstəriş verib, şagirdləri sıraya düzüb.
Onun bu davranışı sosial şəbəkələrdə gülüş, tənqid, istehza dolu fikir və şərhlər doğurub.
Lakin direktorun bu addımını təqdir edənlər də olub. 124 nömrəli tam orta məktəb direktorunun özünü “Ərtoğrul bəy” kimi aparması iddialarına münasibət bildirilib. Məktəbdən “Report”un sorğusuna cavab olaraq bildirilib ki, Novruz bayramı ilə əlaqədar təhsil müəssisəsində təşkil olunmuş tədbirdə tarixi məzmunda şagirdlərin dünyagörüşünü genişləndirmək və onların bədii təxəyyülünü inkişaf etdirmək üçün məktəbin direktoru məktəblilərlə bərabər kiçik səhnəcikdə (10 dəqiqəlik) çıxış edib.
Qeyd edilib ki, tədbirin təşkil olunmasının əsas məqsədi məktəblilərin yaradıcılıq bacarıqlarını artırmaq, istedadlı şagirdləri aşkara çıxarmaq, onların yetkin vətəndaş kimi formalaşdırılması işinə dəstək verməkdan ibarətdir.
Mövzuya şərh verən ekspertlər hesab edirlər ki, bəzi məktəb direktorları öz davranışları ilə nümunə ola bilmirlər. Ekspertlərə görə, bəzi şəxslər müxtəlif yollarla vəzifə əldə edə bilir və bu da xoşagəlməzliklərə yol açır.
Filologiya üzrə fəlsəfə doktoru Elyar İslamoğlu “Bakı-Xəbər”ə şərhində bildirdi ki, məktəb direktorunun davranışının bu qədər tənqid edilməsi təbiidir. “Məktəb direktoru məktəbdəki bütün problemlər həll olunduqdan sonra şagirdlərlə birlikdə hansısa tamaşada rol alsaydı, bəlkə də onun davranışı ictimaiyyət tərəfindən müsbət qarşılanardı. Məktəb direktorunun bu davranışı cəmiyyətimiz tərəfindən kifayət qədər tənqidlə, narazılıqla qarşılandı. Bununla bağlı xoş olmayan rəylər yazıldı, bu da tam təbiidir. Çünki bu gün məktəblərimizdə kifayət qədər problemlər var. Gözlənilir ki, həmin problemlər Elm və Təhsil Nazirliyi tərəfindən tezliklə həll olunsun. Uzun müddətdir ki, bu problemlər öz həllini tapmır. Bu gün məktəblərimizdə psixoloq çatışmazlığı var ki, bu da şagirdlərimizin narkomanlığa, alkoqola aludə olmasına, üstlərinə bıçaq gəzdirməsinə, oğru aləminə meyl etməsinə səbəb olur. Bu gün məktəblərdə pul yığılır, bunun qarşısını almaq lazımdır. Bir çox hallarda görürük ki, elə də keyfiyyətli dərs keçilmir və nəticədə də şagirdlər dərsdən sonra repititor yanına getsinlər. Bunlara görə hər zaman məktəblər qınaq obyektinə tuş gəlir. Məktəblərdə bu qədər problemlər ola-ola direktorun iş-gücünü atıb tamaşada rol oynaması təbii olaraq gülüş hədəfinə çevrilib. Yaxşı olardı ki, məktəb direktoru məktəbdəki problemlərin qarşısını alsın. Bütövlükdə, məktəb direktorları məktəblərdəki problemlərin həllinə çalışmalıdır, eyni zamanda şagirdləri iş dəftəri və sair kimi ağır yükələrdən xilas etməlidir, normal insanları psixoloq vəzifəsinə götürməlidir”.
O hesab edir ki, məktəblərdə direktorlar bütün neqativ halların qarşısını almalıdır ki, nəticədə də şagirdlər zərərli vərdişlərə meyl etməsinlər...
Leyla QARAXANLI
