Xəbər verildiyi kimi, 2022-ci il dekabrın 22-də Ankara şəhərində imzalanmış “Azərbaycan Respublikası Hökuməti ilə Türkiyə Respublikası Hökuməti arasında tikintidə normativ və qiymətqoyma sisteminin təkmilləşdirilməsi sahəsində əməkdaşlığa dair Anlaşma Memorandumu” təsdiq edilib. Prezident İlham Əliyev bununla bağlı Fərmanı imzalayıb.
Qeyd edildiyi kimi, Azərbaycanla Türkiyə arasında tikintidə normativ və qiymətlər sistemi təkmilləşdiriləcək.
Maraqlıdır, tikintidə norma və qiymətlər üzrə Azərbaycan-Türkiyə razılaşması tikinti bazarına necə təsir edəcək? Tikinti materiallarının keyfiyyəti artacaqmı?
“Anlaşma memorandumunun təsdiq olunması bu sahədə nəzarət, tikintidə innovativ texnologiyaların tətbiqi kimi prioritet məsələlərdə mühüm rol oynayacaq”
Milli Məclisin İqtisadi siyasət, sənaye və sahibkarlıq komitəsinin üzvü Aydın Hüseynov “Bakı-Xəbər”ə açıqlamasında qeyd etdi ki, Azərbaycan və Türkiyə arasında şəhərsalma, memarlıq və tikinti sahəsində sıx əməkdaşlıq əlaqələri mövcuddur. Son illərdə bir çox sahələrdə olduğu kimi tikinti sahəsində də birgə təcrübənin bölüşdürülməsi, memarlıq və şəhərsalma ilə bağlı təcrübə mübadiləsi, bu istiqamətdə müasir meyarların tətbiqi genişlənir: “Ötən il dekabrın 22-də “Azərbaycan Respublikası Hökuməti ilə Türkiyə Respublikası Hökuməti arasında tikintidə normativ və qiymətqoyma sisteminin təkmilləşdirilməsi sahəsində əməkdaşlığa dair Anlaşma Memorandumu”nun təsdiq edilməsi bu istiqamətdə əməkdaşlıq üçün yeni imkanlar yaradıb. Bu günlərdə Cənab Prezident İlham Əliyev tərəfindən “Azərbaycan Respublikası Hökuməti ilə Türkiyə Respublikası Hökuməti arasında tikintidə normativ və qiymətqoyma sisteminin təkmilləşdirilməsi sahəsində əməkdaşlığa dair Anlaşma Memorandumu”nun təsdiq edilməsi də bu istiqamətə yeni yanaşmaların tətbiqi imkanlarının artırılmasından xəbər verir”.
Millət vəkilinin sözlərinə görə, Memorandum tikintidə qiymətqoyma sisteminin təkmilləşdirilməsi, tikintidə nəzarət, təbii fəlakətlər nəticəsində tikililərə və infrastruktura dəymiş zərərin qiymətləndirilməsi və aradan qaldırılması, tikintidə innovativ texnologiyaların tətbiqi kimi prioritet sahələr üzrə əməkdaşlıq məsələlərini əhatə edir. Anlaşma memorandumunun təsdiq olunması bu sahədə nəzarət, tikintidə innovativ texnologiyaların tətbiqi kimi prioritet məsələlərdə mühüm rol oynayacaq. Bu meyarların tətbiqi həm tikintidə keyfiyyətin yüksəldilməsi, həm də bazar qiymətlərinin təkmilləşdirilməsi baxımından faydalıdır.
A.Hüseynov onu da əlavə etdi ki, Türkiyə şirkətləri ölkəmizdə tikinti sektorunda geniş təmsil olunub, hazırda işğaldan azad edilmiş ərazilərdə geniş vüsət alan tikinti və quruculuq işlərində də qardaş ölkənin şirkətləri fəal iştirak edir, müasir tikinti normaları, memarlıq üslubu tətbiq edirlər. Hazırda azad edilmiş ərazilərdə ən müasir texnolayihələrdən olan “Ağıllı şəhər” və “Ağıllı kənd”lərin təşkili, inşaat işlərinin ərazi planlaşdırılması sənədlərinin tələblərinə uyğunluğu, şəhərlərin yenidən qurulması və digər sahələrdə Türkiyənin innovativ yeniliklərinin də rolu böyükdür.
Günel CƏLİLOVA
