Məlum olduğu kimi, Bakıda bəzi küçə və prospektlərdə sürət həddi endiriləcək. Bakı Nəqliyyat Agnetliyinin (BNA) İdarə heyyətinin sədri Vüsal Kərimli bir neçə gün əvvəl Facebook sosial şəbəkə hesabında bu barədə məlumat yayaraq bildirib ki, statistikalar paytaxt ərazisində baş verən yol nəqliyyat hadisələrinin əsas səbəblərindən birinin də yüksək sürət həddi olduğunu göstərir:
“Avtomobil yollarında icazə verilən sürət hədlərinin optimallaşdırılması Azərbaycan Prezidentinin Sərəncamı ilə təsdiqlənmiş "Azərbaycan Respublikasında yol hərəkətinin təhlükəsizliyinə dair 2019–2023-cü illər üçün Dövlət Proqramı"nda da öz əksini tapıb. Bakı Nəqliyyat Agentliyi tərəfindən yol hərəkəti təhlükəsizliyi səviyyəsinin artırılması, nəqliyyat axınlarının effektiv idarəolunması məqsədilə 14 yol sahəsində sürət hədlərinin endirilməsi ilə bağlı təkliflər hazırlanaraq Baş Dövlət Yol Polisi İdarəsi ilə razılaşdırılmışdır. Sözügedən yol sahələrində mərhələli şəkildə müvafiq yol nişanları quraşdırılacaq. Sürücülərimizin sürət hədlərinə riayət edəcəyinə inanırıq. Sizin təhlükəsizliyiniz bizim məsuliyyətimizdir”.
Ancaq bu fikir və paylaşım sosial şəbəkədə narazılığa səbəb olub. Hesab edilir ki, yollarda sürət həddinin aşağı salınması tıxacı daha da artıracaq. Həmçinin o da bildirilir ki, sürət həddinin aşılmasına görə cərimələr də artacaq.
- Ərşad Hüseynov: “Qərar qəbul edənlər insanları inandırmalıdırlar ki, belə qərarlar cərimə tətbiqinə, yolda daha çox vaxt itirilməsinə yox, etibarlı hərəkət mühitinin yaradılmasına xidmət edəcək”
Nəqliyyat eksperti Ərşad Hüseynov bildirdi ki, Bakı şəhərinin və Abşeron yarımadasının bəzi küçə və yollarında sürət həddinin dəyişdirilməsi ilə bağlı qərar keçmişdə buraxılmış ciddi səhvlərin düzəldilməsidir: “Vaxtilə sürücüləri sıx məskunlaşma ərzilərindən keçən küçə və yollarda yüksək sürətə öyrəşdirən belə səhvlər olmamalıydı, yaxud çoxdan aradan qaldırılmalıydı. Nəhayət ki, edildi. Amma iş təkcə sürət həddini endirməklə bitməyəcək. Təhlükəsizliyi artırmaq üçün Dövlət proqramında nəzərdə tutulan xeyli digər işlər (yol tikəndən başlamış yolda nişan qoyanadək hər kəsin peşəkar və məsuliyyətli fəliyyətinin təmini, sürücü hazırlığı və sürücü olma işinin təkmilləşdirilməsi, cəmiyyətdə təhlükəsiz davranış mədəniyyətinin formalaşdırılması və s.) də görülməlidir. Ən ciddi işlərdən biri də qəbul edilən qərarların düzgünlüyünün və ən yaxşısı olduğunun cəmiyyətə çatdırılması, insanların buna inandırılmasıdır. Qərar qəbul edənlər müasir elmi-texniki yanaşmalara istinadla insanları inandırmalıdırlar ki, belə qərarlar daha çox cərimə tətbiqinə, yolda daha çox vaxt itirilməsinə yox, hər kəs - piyada, sürücü, sərnişin üçün daha təhlükəsiz və daha fasiləsiz, daha dayanıqlı və etibarlı hərəkət mühitinin yaradılmasına xidmət edəcək”.
- Aqil Rəhimov: “Yollarda sürət həddinin 10-20 kilometr azaldılmasının tam tərəfdarıyam, çünki son aylarda…”
Nəqliyyat üzrə eskpert Aqil Rəhimov hesab edir ki, sürətin azaldılması sürücülərin birinci növbədə təhlükəsizliklərinə xidmət edir: “Məlumdur ki, sürətli yollarda sürət həddi 110 kilometr-saatdan 90-a qədər azaldılıb. “Yol hərəkəti haqqında” qanunda deyilir ki, şəhər içində yol avtomagistral deyilsə, maksimal sürət 90 ola bilər. Sürət həddinin 20 kilometr-saata endirilməsi qəzaların azalmasına səbəb olacaq. Amma maarifləndirmə işi də aparmaq lazımdır. Çünki bəzi sürücülər bundan narazıdırlar. Halbuki, sürətin azaldılması onların birinci növbədə təhlükəsizliklərinə xidmət edir. Yollarda sürət həddinin 10-20 kilometr azaldılmasının tam tərəfdarıyam. Çünki son aylarda ağır qəzaların, piyada vurulması sayının artması müşahidə olunur. Belə hadisələrin 99%-i yüksək sürətlə əlaqədardır. Buna görə Avropa ölkələrində də şəhər daxilində normal sürət 45-50 kilometr-saata icazə verilir. Hesab edirəm, dar küçələrdə sürət 50 kilometr-saatdan artıq olmamalıdır”.
Günel CƏLİLOVA
