Son zamanlar “Kristal Abşeron”un inşa etdiyi binaların təhlükəsizliyi ilə bağlı məlumatlar yayılır. Məlumatlara əsasən, adıçəkilən şirkətin inşa etdiyi binalar təhlükəsizlik qaydaların uyğun deyil. Hətta bu günlərdə Qaradağ rayonu “Qobu Park-2” yaşayış kompleksində inşa edilən binanın əyilməsi ilə bağlı məlumat yayıldı.
Həmin binada yaşayan sakinlərin özləri binanın önə doğru əyildiyini video görüntü formasında sosial şəbəkədə paylaşıblar. Sakinlər binanın istifadəyə yararsız olduğunu iddia edir və hər an təhlükə yaşana bilməsindən narahatdırlar.
Qeyd edək ki, “Kristal Abşeron”un inşa etdiyi binaların təhlükəsizliyi ilə bağlı məsələ Milli Məclisdə də müzakirə edilib. Millət vəkilləri həmin binaların istifadəyə yararsız olduğunu bildiriblər və hətta aşma təhlükəsi ilə üz-üzə olan binanın sakinlərinin köçürülməsini də tələb ediblər.
Ramil Osmanlı: “Kristal Abşeron”un Abşeron və Xırdalanda inşa olunmuş binalarında müəyyən qədər problemlər var”
Daşınmaz əmlak məsələləri üzrə ekspert Ramil Osmanlı bildirdi ki, "Kristal Abşeron”un Abşeron və Xırdalanda inşa olunmuş binalarında müəyyən qədər problemlər ola bilər: “Yəni infrastruktur baxımından müəyyən problemlərin olması mümkündür. "Kristal Abşeron”un binaları bir-birinə yaxın, sıx və qarışıq bir formada inşa olunub. Əhalinin bu baxımdan belə şikayət etməsi başadüşüləndir. Ayrıca, hər hansı bir tikinti şirkətinin belə bir problemi mövcuddursa, hesab edirəm ki, zaman-zaman onların hamısı ortaya çıxacaq. Çünki yeni tikililərin əksəriyyəti artıq fiziki baxımdan köhnəlmə, aşınma dövrünü yaşayır. Bir neçə il bundan qabaq tikililərin istismar müddəti aşağı idi, illər ötdükcə bu artır və artıq problemlər ortaya çıxnağa başlayır. Hesab edirəm ki, problemlər dərinləşmədən, Mənzil Tikinti kooperativləri və yaxud MMC binalarını inşa edənlər yoxa çıxmadan hökumət bu istiqamətdə müəyyən addımlar atmalıdır. Tikinti şirkətləri problemləri aradan qaldırmalıdırlar. Çünki idarəetməni özlərində saxlasalar da, idarəetmə səviyyəsi çox aşağıdır. Yəni sakinlərin faktiki olaraq hüquqlarının kobud şəkildə pozulmasına rast gəlinir. Ona görə də düşünürəm ki, gələcəkdə dövlətin üzərində qalmasın deyə, bu problemlər birdəfəlik həll olunmalıdır".
Elnur Fərzəliyev: “Əyilmiş binanın sökülməsinə qərar verilsə belə, bu özü də əlavə problem yaradacaq”
Əmlak eksperti Elnur Fərzəliyev bildirdi ki, əyilən, çatı olan, problemli binalar sökülməlidir. Onun sözlərinə görə, Bakıda bu iş çox ləng aparılır: “Bakıda kifayət qədər qəzalı bina var və hər birində də minlərlə sakin var. Bunların hamısı sökülməlidir. Bu gün söküntü işlərini dövlət deyil, özəl sektor aparır. Onlar da əsasən hansı söküntüdən onlara daha çox gəlir gəlirsə, birinci o binaları sökürlər. Türkiyədəki zəlzələdən sonra binalarda monitorinqlər aparılacağı deyildi. Ancaq hələ ki, belə yoxlamanın aparıldığı gözə dəymir. Bakı şəhərində “Kristal Abşeron” şirkətinə məxsus əyilmiş bina kimi həddən artıq təhlükə altında olan bina var. Eyni bu bina kimi onlarla bağlı da heç bir tədbir görülmür. “Qobu Park-2” kompleksində əyilmiş bina ilə bağlı FHN yoxlayıb və rəy verib ki, bina təhlükəli deyil. Ancaq belə açıqlamalar hansısa faciə zamanı təhlükənin qarşısını almır. İnsanlar orada yaşamağa ehtiyat edirlər. Bu yaşayış kompleksində bina digər binadan gözəçarpacaq dərəcədə aralanıb. Bunun qarşısı alınmasa faciə böyük ola bilər. Bərkidilmə işləri aparıla bilər. Ancaq təəssüf ki, şirkətin tikdiyi bina şəhərdən aralı olduğu üçün laqeyd münasibət var. Bina şəhərin mərkəzində olsaydı, çoxdan tədbir görülmüşdü. Tikinti şirkəti hesab edir ki, onun işi binanı tikib təhvil verməkdir. Tək bu bina deyil, bunun kimi şəhərdə əyilmiş, qəzalı, təhlükəli minlərlə bina var. Şəhərdə binalar bir-birinə çox yaxındır. Əyilmiş binanın sökülməsinə qərar verilsə belə, bu özü də əlavə problem yaradacaq. Ona çox yaxın neçə bina var ki, bu əyilmiş binanın sökülməsini çətinləşdirəcək. Həmçinin həmin ərazi seysimik cəhətdən aktiv zonadır. Aşağı ballı təkanlarda belə, faciə qaçılmaz ola bilər”.
Günel CƏLİLOVA
